கன்னியாகுமரி பகவதி தேவியலங்காரம்

1

இருநூறு வருட ஜமீன் வீடு
சாலையில் பத்தடிக்கு தாழ்ந்து கிடக்கிறது
ஆனால் ஜமீன் வீட்டு மாடுகளுக்கு ஆயிரம் வயது
அவை சமவெளியில்தான்
மேய்கின்றன
தாழவில்லை

ஒவ்வோர் ஆண்டும் மணல் அள்ளிப் போட்டு
ஜல்லியடித்து
உயரும் தார்ச்சாலைகளை
பள்ளத்துக்குள்ளிருந்து
தலைநீட்டி
எம்மாம் பெரிய ரோடு
என வியக்கும்
சின்ன ஜமீனுக்கு
இன்றைய தேதியில்
துணை
பக்கத்தில் வாழும்
பொய்முலை
இசக்கி

2

காந்திமதியம்மன் இரட்டைச் சடை பின்னல் போட்டு
நகரப்பேருந்தின் ஜன்னலோரம்
தூங்கிக் கொண்டிருக்கிறாள்
தலையசைந்து மோதி மீட்டும்
துயில்

பிறைவடிவ மல்லித் தொடர் கூந்தல்

திரையிசைப் பாடல்களுக்கு ஏன்
பாடிக் கொண்டிருக்கிறோம் ? என்னும் திசைக் குழப்பம்

உச்சி வெயிலில்
நெல்லையப்பர்
நடையடைத்திருக்கிறது

3

அபிராமி துவைத்துக் போட்ட ஆடைகள்
மேல்மாடிக் கொடியில் ஆடுவது பார்த்து
திரும்பிக்
கொண்டிருக்கும் தம்பி

நேற்றே குளியலறையில் யாருக்கும் தெரியாமல்
சோப் திருடிய திருடருடன்
சென்றிருக்கிறாள்
திரும்பி வர நாளாகும்

அபிராமிக்கு மட்டும் பின்புறம் எப்படி
கச்சிதமாய் அமைந்திருக்கிறது
என்று வியக்கும்
பேய்முலைகள் கண்ட
கவிஞா

கோடி பிரகாசக் குழந்தையை
எடுத்துக் கையில்
வைத்துக் கொள்ள விரும்பும்
ஞானக் குருவே

கோமளவல்லி நீங்கள் தொட்டதும்
இறங்கி
ஓடுகிறாள்
பாருங்கள்

மென்முலைதான்
எடுத்தால்
கற்சிலை

கற்சிலைதான்
அப்பாமல்
நின்றாலோ
ஆனந்த வல்லி
அபிராம சுந்தரி

4

கட்டிடத்தில் நுழைந்தேன்
வேலைப்பாடுகள் ,நுட்பங்கள் ,நறுமணம்
எல்லாம் உணர்ந்தேன்
பின்பு கட்டிடத்திலேயே உட்கார்ந்த போது
எதையும்
காணவில்லை

நானிலத்தின் நகரும் சமவெளி
எவ்வளவு தினுசு ?
எல்லையில்லா தூரம்
பின்பு அருகிருந்தேன்
எதையுமே
காணவில்லை

சுகந்தம்
களபம்
சாமியின்
வாசனை
சுற்றித் திரவியம் எடுப்பதற்குள்
காலியாயிற்று
குடுக்கை

அப்படியானால் முதலில் இருந்தவன்தான்
நான் என்று சொல்லலாமா
என் செல்ல மாணவர்களே ?

இரண்டாவதுதான் நீ என்பவர்கள்
துரிதமாக
வந்து சேருங்கள்
நாமினி
புதிய இடம் நோக்கிப்
புறப்படுவோம்

5

கன்னியாகுமரி பகவதி தேவியலங்காரம்

மெல்ல புலரியின் இருள்மேனி திறக்க
அம்மை நின்று கொண்டிருக்கிறாள்
கடலடி சத்தத்தின் மேலே

பாலாபிஷேகத்தில் முலையிடை வழியாக
நழுவிய
என் மனம் துயில் எழும்புகிறது
மேற்கு மலைகளில் சூரிய பிரகாசம்

நீதானே அழைத்தாயம்மா
ஏனென்று சொல்லேன் ?

மலைகள் துயில் எழ
இருள் மத்தியில் இருந்து
நுரைக்கும் கடலில்
என் மேனி மலர்வதைக் கண்டாயா ?

எத்தனை முறை தவற விட்டேன் அம்மா
சோர்வால் ஒரு முறை
அழுத்தத்தால் ,கொடும் அகந்தையால் பல முறை
துக்கத்தில் தூக்கத்தில் என என

சந்தனம் முகத்திலேறி
வைரம் ஜொலிக்க
பட்டிற்குள் சிறு முலைகள் மறைந்து கொள்ள
கண்ணாடி பிம்பத்தில் சிறுமிக்கு
மேக்கப் முடிவுறுகிறது

கருவறையிலிருந்து வெளியேறி திறந்து
கைபிடித்து
நாங்கள் பார்த்துக் கொண்டிருக்கிறோம்
முதல் சூரியோதயத்தை
இணைந்து

[ தேவிக்கு சமர்ப்பணம் ]

பா.ஜ.க அடுத்த முறை ஆட்சிக்கு வரக்கூடாது.

பா.ஜ.க அடுத்த முறை ஆட்சிக்கு வரக்கூடாது.

கொஞ்சம்  கொஞ்சமாக அவர்களின் அதனை வேஷங்களும் கலைந்து கொண்டிருக்கின்றன .மீண்டும் அவர்கள் ஆட்சிக்கு வந்தால் சர்வாதிகாரத்தின் உச்சநிலையை அடைவார்கள் என்பதில் சின்ன சந்தேகங்களும் வேண்டியதில்லை.அறிஞர்கள் ,பன்முகப் பார்வை கொண்டோர்கள் ஒருவர் கூட அக்கட்சியில் இல்லாதது ,அல்லது அவர்களால் இவர்களை பாதிக்க இயலாது என்பது நிரூபணம் ஆகிறது . இது  அவர்களுடைய மாபெரும் துரதிர்ஷ்டம் .வாய்ப்பு கிடைத்தால் பேன் பார்க்க தொடங்கி விடுவார்கள் என்கிற ஐயம் உண்மையாகி கொண்டிருக்கிறது

பழமைவாதம் மட்டுமே  நிறைந்த ஒரு வீட்டிற்குள் இருந்து கொண்டு,நான்கு பேர் என்ன முடிவுகள் எடுப்பார்களா ,அது போலவே மொத்த நாட்டிற்கும் அனைத்து விதமான,  இந்திய துணைக் கலாச்சாரங்கள்  அத்தனைக்கும் சேர்த்து அவர்கள் முடிவெடுக்கிறார்கள்.இதனை அவர்களுக்கு புரிய வைப்பதற்கோ ,அப்படியில்லை விஷயங்கள் என்பதனை படிப்பித்து கொடுப்பதற்கோ வாய்ப்புகள் இல்லை .காரணம் அறிவுலகத்தின் மீதும் ,பிற கலாச்சாரங்கள் மீதும் அவநம்பிக்கை மட்டுமே கொண்டவர்கள் அவர்கள் . ஒற்றைக் கலாச்சாரம் தவிர்த்து பிற எவற்றின் பேரிலும் அவர்களுக்கு நம்பிக்கை இல்லை  என்பதை  மீண்டும் மீண்டும் தெளிவுபடுத்திக் கொண்டே இருக்கிறார்கள்.தாங்கள் ஒரு மூடர் கூடம் என்பதை பகிரங்கமாக நிரூபிக்கிறார்கள்.

அரசு அமைப்புகள் அனைத்தையும் அதிகாரத்தால் கறையுண்டாகுகிறார்கள்.அது ஏற்கனவே கறை கொண்டிருந்ததுதான்.இவ்வளவிற்கு நலிவடைவது இப்போதுதான்.நீதித்துறை உட்பட உயர் அரசு அமைப்புகள் எல்லாம் முடங்கியுள்ளன.அரசு உணர்வதை செயலாக்கும் கருவிகளாக அவை அனைத்துமே மாற்றப்பட்டிருக்கின்றன.பண்பாட்டாளர்கள்,எழுத்தாளர்கள் ,கவிஞர்கள் ,கலைஞர்கள் அரசாங்கத்தால் உளவு பார்க்கப் படுகிறார்கள்.ரஷ்யாவில் ஸ்டாலின் காலத்தில் இருந்ததை போல.ஒரு அவசரகால பிரகடனத்தின் கீழ் பொதுமக்கள் வாழ்வது போன்றதொரு பிரக்ஞய் செயல்பட்டுக் கொண்டே இருக்கிறது.

தங்கள் கட்சிக்குள்ளேயே மாறுபாடு கொண்டோர் இருப்பார்கள் ஆயினும் அமைப்பு அவர்கள் மீது பாயுமளவிற்கு மோடி பதற்றத்தை ஏற்படுத்துகிறார் அரசு அமைப்புகளை பயன்படுத்தி.இசைவற்றவர்கள் மீதெல்லாம் அமைப்பு ; அவர்கள் தப்பிக்க இயலாத காரணங்களை முன்வைத்து பாய்வது என்பது முன்னெப்போதும் கண்டிராத விஷயங்கள்.இந்த பண்பு தனிமனித சர்வாதிகாரத் தன்மையை நோக்கி அரசாங்கத்தைக் கொண்டு செலுத்தக் கூடியது.சோனியாவும் ,ராகுலும் தகுதியற்றவர்களாக இருக்கலாம்.ஆனால் காங்கிரசில் தான்தோன்றித்தனமாக யவர் ஒருவரும்  முடிவுகளை எடுப்பது கடினம்.இன்னும் அங்கே   நிறைய தலைவர்கள் , அரசியல் வல்லுநர்கள் , நிபுணர்கள் இருக்கிறார்கள்.

காங்கிரஸ் எவ்வளவு தகுதி இழந்த நிலையிலும் கூட நிறைய நிபுணர்களையும் கொண்ட கட்சி.அது நிச்சயமாக மூடர் கூடம் இல்லை.

பா.ஜ.க நிறைய பாடங்கள் கற்க வேண்டியுள்ளது.ஒற்றைக் கலாச்சாரம் என்னும் அவர்களுடைய கோட்பாடு தொடர்ந்து வெளிப்பாட்டுக் கொண்டே இருக்கிறது மிக மிக வேகமாக.இது கிளர்ச்சியையும் நாசத்தையும் விளைவிக்கக் கூடியது.

காங்கிரஸ் ,இடதுசாரிகள் தங்கள் பார்வைகளில் கொண்டுள்ள கலோனியல் எச்சங்களை கைவிட்டு விட்டு , பா.ஜ.கவை அதிகாரத்தில் இருந்து இறக்குவதற்கு தங்களை முதலில் தகுதிபடுத்திக் கொள்ளவேண்டும்.

தார்மீகரீதியிலான பின்னடைவை பா.ஜ.க தொடர்ந்து அதிகாரத்தில் இருந்தால் இந்தியாவில் ஏற்படுத்தப் போவது உறுதி.

மாடு அதிகம் தின்றால் கொழுப்பு புரையேறும் என்பது உண்மைதான் ,ஆனால் தயிர் சாதம் மட்டுமே தின்று கொண்டிருந்தால் மூளை பிறழ்வு ஏற்பட்டு விடும் என்று தோன்றுகிறது.

பால்ய கால நண்பன் தேடி வந்திருந்தான்

பால்ய கால நண்பன் தேடி வந்திருந்தான்

நீ இன்னும் பால்ய காலங்களையே தேடித் கொண்டே இருக்கிறாயா ? எனக் கேட்டேன்.அவனுக்குள் இருந்த சிறுவனுக்கு நான் என்ன கேட்கிறேன் என்பது விளங்கவில்லை.பால்ய காலங்களை மீண்டும் தேடித் செல்வது நரக ஒத்திகையில் நன்றாக  ஈடுபடுவது.அந்த காலம் எங்குமே கிடைக்காது.நினைவில் வாழுகிற மிருகம் அது.பழைய காதலியை தேடித் செல்வதை ஒத்தது இந்த பயணம் .அப்படியே கண்டு பிடித்து விட்டால் இவள் ஏன் இப்படியிருக்கிறாள் என்று தோன்றும்.எல்லாமே மாறிவிட்டது என்று சொன்னான்  ஜவகர்.ஒன்றுமே மாறவில்லை நாம்தான் மாறியிருக்கிறோம் என்று சொன்னேன் நான்.காலமும் வாழ்வும் சதா நம்மைப் புரட்டிப் போட்டுக் கொண்டே இருக்கிறது. பால்யம் நினைவில் நின்றெரிதலே சுகம்.

ஏராளமான வடுக்கள்,முகம் களைத்துப் போயிருக்கிறது.வாழ்க்கை எத்தனை முறை அவனைப் புரட்டியடித்திருக்கும் ? ஆனாலும் அவனுள் வசிக்கும் சிறுவன் அப்படியே உளம் வாடாமல் இருக்கிறான்.அந்த சிறுவன் வா... நாம் சென்று பழைய விளையாட்டுகளை விளையாடுவோம் என்று அழைக்கவில்லை  .அழைக்கும் தைரியம் இப்போது அவனிடம் இல்லை.அந்த கொதிகலன் அவனுள் உடைந்து விட்டது.

ஜவகர் என்னுடைய ஆரம்ப காலக் கதைகள் சிலவற்றில் இடம் பெற்றிருக்கிறான்.அப்படியே அல்ல.என்னுடைய கதா   பாத்திரங்கள் யாருமே அப்படியே வந்து கதைகளில் உட்கார்வது கிடையாது.உடுப்புகளை மாற்றிவிடுவேன்.உறுப்புகளையும் மாற்றிவிடுவேன்.கதைகளில் வருகிறவர்கள் பிறிதொன்றாக மாறி விடக் கூடியவர்கள். அவர்களை நானே கூட அப்படியே தேடுவதில்லை.அவர்களின் ஒரு சொட்டுக்குப் பெயர் சூட்டியிருப்பேன் அவ்வளவுதான்.

கடல் நண்டுகள் பிடிப்பதில் பலே கில்லாடி ஜவகர்.கடலுக்குள் இறங்கி பாறைகளில் கையிட்டுப் பிடித்து கரைக்கு எடுத்து வருவான்.ஒருவகையில் பார்த்தால் அவன் பிடித்துக் கொண்டுவருகிற நண்டுகள்தான்   எங்கள் பால்யம்.அது அத்தனை சுவையானது ?.கடற்கரைகள் முழுக்க எங்கள் பகுதிகளில் பெரிய பெரிய தேரிக் காடுகள் .உயரம் உயரமான மணல் தேரிகள்.பெரியவர்கள் எங்களை வேறு திக்குகளில் தேடித் திரிவார்கள்.நண்டுகள் பிடிக்கக் கூடாது என்பார்கள் .எங்களுக்குள் பால்யம் தந்த ஊற்று இந்த நண்டுகள் என்பதை அவர்கள் உணர்ந்தார்கள்.நாங்களோ மீண்டும் மீண்டும் நண்டுகள் பிடித்துக் கொண்டிருந்தோம்.

ஒருமுறை கிறிஸ்மஸ் அன்று  ஜவகர் காணாமல் போய்விட்டான் .காணாமல் போனவனைக்  காட்டிலும் பிற குழந்தைகள்தான் பெரியவர்களிடம் மாட்டிக் கொண்டோம்.ஏன் நண்டு பிடிக்கப் போகக் கூடாது என்பதற்கு அவர்களுக்குத் தெளிவான காரணம்  அன்று கிடைத்திருந்தது.விடியற்காலை வரையில் கடற்கரையெல்லாம் தேடித் கொண்டே இருந்தோம்.அவனை அலைகள் இழுத்து சென்று வேறு ஒரு துருவத்தில் கொண்டு   செல்ல மீனவர்கள் மீட்டு வீட்டிற்கு அனுப்பி வைத்தார்கள் .அது போன்ற ஒரு நாளாக இருந்தது அவனோடு இன்றிருந்த நாள்.

அவன் விடைபெற்றுச் சென்ற பிறகு என்னுடைய சிறுவன் என்னுடைய மடியில் ஏறி அமர்ந்திருப்பதை உணர்ந்தேன்.அவன் கொண்டு வந்து சேர்த்த பால்யத்திற்கு நன்றி.

கேட்பவரே

கேட்பவரே

ஒரு கவிஞனோடு ,எழுத்தாளனோடு அறிமுகம் கிடைத்த மாத்திரத்திலேயே என்ன தொழில் செய்கிறீர்கள் எனக் கேட்காதீர்கள் .நீங்கள் புதிதாக அறிமுகம் ஆகிற ஒரு நபரின் பிறந்த சாதியை அறிய எந்த ஊர் ? என கேட்பதைப் போன்ற அநாகரீகம் இது.நான் ஒரு நடிகன் என வைத்துக் கொள்வோம் ,நீங்கள் எடுத்த மாத்திரத்திலேயே என்ன தொழில் செய்கிறீர்கள் என கேட்பீர்களா ? ஓவியன்,இசைக் கலைஞன் ,நடனக் கலைஞன் என்றால் இந்த கேள்வியைக் கேட்பீர்களா ? ஒரு விஞ்ஞானியை இந்த கேள்வியால் எதிர் கொண்டிருக்கிறீர்களா ? எழுதுகிறவனை என்ன தொழில் செய்கிறீர்கள் ? என கேட்கிற சமூகம் ,இனம் கேடு தெளிய இன்னும் வெகுகாலம் ஆகும்.இதில் என்ன விளக்கெண்ணெய் தமிழ் தேசியம் வேண்டிக் கிடக்கிறது ? .கடந்த ஒரு நூற்றாண்டில் மட்டும் தமிழில் என்ன நடந்திருக்கிறது என்பதை அறியத் தெரியாத  ஒருவன் , தான் ராஜராஜ சோழனின் தந்தை ,கொள்ளு பேரன் என்றெல்லாம் கூவித் திரிதல் மனகுரங்கின் சிரங்கை சொரிந்து திரிதல் போல.

அறிமுகம் தொடங்கிய மாத்திரத்திலேயே உளவறியத் தொடங்குவது ஆகாத மனநிலை.கொஞ்சம் பழக்கம் கூடிய பின்னர் உளவறியத் தொடங்குதல் அதனினும் ஆகாத மனநிலை.தமிழர்கள் பொதுவாக பெரும்பாலும் துப்பு சுல்தான்கள். நான் படித்த ,பின்பற்றிய ,பழகிய  தமிழின் எந்த முக்கிய எழுத்தாளனின் சொத்து மதிப்பும் எனக்குத் தெரியாது.சமூக மதிப்பும் எனக்கு அவசியப்பட்டதில்லை.பிரான்சிஸ் சாக்கடையில் இருந்து எழுந்து வந்தாலும் முத்தமிடுவேன்.பாலை நிலவன் மதுக்கடையை பொத்துக் கொண்டு வந்தாலும் முத்தமிடுவேன்.

பொதுவாக தரகர்களிடம்தான் தனிமனிதர்களிடம் உளவறியும் தன்மை அதிகம்.இங்கே தமிழ் சமூகம் மொத்தமுமே தரகர் மனநிலையில் இந்த கேள்விகளைக் கேட்டுத் திரிதல் பச்சை ஆபாசம். பெண்தரகர்களுக்கென்று தனித்த மனோபாவம் உண்டு.உங்களுக்குத் பெண்குழந்தை இருக்கிறதா ? என்கிற கேள்விக்கு அவனிடம் பதில் சொல்லி விட்டீர்கள் எனில் உடனேயே திருமணமாகி விட்டதா ? என்று கேட்பான்.அது தொடக்கப் பள்ளியில் படித்துக் கொண்டிருந்தாலும் கூட.திருமணமாகி விட்டது இரண்டு நாட்கள் ஆகின்றன , என்றால் எத்தனை குழந்தைகள் ? என்பான்.அவனுக்கு கேள்விதான் முக்கியம் பதில் முக்கியமில்லை.இதுபோலத்தான் மொத்த சமூகமும் பலசமயங்களில் உள்ளது.

என்னிடம் ஊர் கேட்பவர்களை உடனேயே புரிந்து கொள்வேன்.பச்சென்று முகத்தில் அடித்தவாறு எனது சாதியைச் சொல்லிவிடுவேன்.இல்லையில்லை,இதற்காகக் கேட்கவில்லை என்று நவுசுவார்கள்.இல்லையில்லை இந்த பதிலை நான் சொல்லவில்லையானால் இன்னும் இதன் தொடர்ச்சியில் நீங்கள் கேட்கும் நான்கைந்து கேள்விகளுக்குப் பதில் சொல்ல வேண்டியிருக்கும்,என் இருப்பிடத்தை வைத்து உங்கள் கேள்விக்கு  விடையறிதலும் கடினம்.உங்களுக்கு திருப்தி ஏற்படாது. எதற்கிந்த பொருள் விரயம் ? அதிலும் என்னுடைய சாதியை பற்றி பலவாறு யூகங்கள் உண்டு.என்னை இன்னார் இன்னார் இன்னார் என்றே  நினைத்துக் கொண்டிருக்கிறார்கள்.அது நல்லதுதான்.இதையெல்லாம் அறிந்து எனக்குப் புதிதாக பெண் பார்க்கவா போகிறீர்கள் ? இல்லை எனக்கேதும் நீங்கள் நினைப்பது போன்ற தொழிலில்லையென்றால் ஏதேனும் நீங்கள் உத்தேசித்து போன்ற  தொழில் தரப் போகிறீர்களா ? எதற்கு உங்களுக்கு இந்த வீண் வேலை ?

ஏராளமான தொழில்கள் செய்திருக்கிறேன்.வேலைகள் பார்த்திருக்கிறேன்.எந்த சந்தர்ப்பத்திலும் இந்த கேள்வி எனக்கு இடையூறான கேள்வியாக இருக்கிறது.சுமார் இருபத்தைந்து வருடங்களுக்கு மேலாக எழுதிக் கொண்டிருக்கிறேன்.அறிமுகம் ஆனவுடன் என்ன புத்தகங்கள் எழுதியிருக்கிறீர்கள் ?என்று கேட்டால் கூட அதில் நியாயம் இருக்கிறது.துரத்தித் துரத்திக் கேட்டுக் கொண்டேயிருக்கிறார்கள் தமிழில் இந்த கேட்பவர்கள்.

என்னுடைய " கேட்பவரே " கவிதைத் தொகுப்பிலுள்ள ஒரு கவிதையின் தலைப்பு இந்த கேட்பவரே ...

கேட்பவரே
------------------

என்ன செய்து கொண்டிருக்கிறீர்கள்
என எப்போதும் என்னை நோக்கிக் கேட்பவரே

ஆடு மேய்கிறேன்
உரியும் வெயிலில்
உங்கள் வீட்டின் புதிய கட்டிடப்பணியில்
கையாளாயிருந்தேன்
சுவர் வலிக்கக் கையுடைத்து
உங்கள் வீட்டு மின்வெளிச்சம்
நான் சரிப்படுத்தியது நான்தான்  
மேலாக

உங்கள் மேல்நாட்டுக் கழிப்பறை
உடைந்து ரத்தம் சிந்திய போது
உங்களுடைய
" ஆண்கள் பெண்கள் குழந்தைகளின் "
மல ஓட்டத்தைக்
கையுறையின் மனபாரம் ஏதுமற்று
கையாண்டு
எனது சுதந்திரத்தைப் பிரகடனப்
படுத்தியவனும்
நானே

பிச்சையும் எடுக்கிறேன்
அதில் பாதியை தானமும் செய்கிறேன்
கொள்ளளவு தெரியாமல் குடிக்கிறேன்
இதை ஒப்ப ஒரு செயலாகத் தான்
கவிதைகளையும்
எழுதிக் கொண்டிருக்கிறேன்

உங்களால் இயலாததையெல்லாம்
சதா செய்து கொண்டேயிருக்கும் எனை நோக்கி
கேட்டுக் கொண்டேயிராதீர்
கேட்பவரே


ரஜினி அரசியலுக்கு வருவதுதான் தமிழ்நாட்டுக்கு நல்லது

ரஜினி அரசியலுக்கு வருவதுதான் தமிழ்நாட்டுக்கு நல்லது

தமிழ்நாட்டின் அடுத்த முதல்வராக ரஜினி காந்த் மக்களால் தேர்வு செய்யப்படுவார் எனில் ; தமிழ்நாட்டின் அடுத்த முப்பதாண்டு காலம் தொடங்கி விடும்.தமிழ் நாட்டு மக்களால் தலைவராக ஏற்றுக் கொள்ளப்பட பிரபலமும் ,புகழும் ,மக்கள் சக்தியும் அவசியம்.வெற்று தொழில் அதிபர்கள்,வியாபாரிகள் ,கல்வியாளர்கள் அதிகாரத்தில் துணையாக பங்கு பெற முடியுமே தவிர , தானைத் தலைவனாகவோ தலைவியாகவோ ஆக முடியாது.வெற்று தொழில் அதிபர்களையும் ,வியாபாரத்தின் பின்னணியிலிருந்தும் மேலதிக அரசாங்கம் பந்தாடுவதை நாம் நேரடியாகப் பார்த்துக் கொண்டிருக்கிறோம்.மக்கள் சக்தி அவர்களிடம் இல்லை என்பதே அதற்குக் காரணம்.

ப.சிதம்பரம் வரையில் வேட்டையாடப்படுகிறார் என்றால் நிலை என்ன என்பதை யூகித்துக் கொள்ளுங்கள்.ப.சிதம்பரம் சாதாரணப்பட்ட ஆளில்லை.ஆனால் சுயசாதிப் பின்னணி கூட சரியாக அமைய பெறாதவர். மக்கள் சக்தியற்றவர்.பீட்டர் அல்போன்ஸ் மட்டும்தான் அங்கே பொய் நிற்க முடிகிறது. ஆனால் அவரை வேட்டையாடுபவர்களுக்குத் தெரியும், அவருக்கும் தங்களை மீண்டும் வேட்டையாடுவதற்காக வாய்ப்புகள் மீண்டும்  வரக் கூடும் என்பது. மட்டுமில்லாமல் தமிழ்நாடு ,ஆந்திரம் போன்ற பெரிய தேசிய இனங்களைக் கொண்ட மாநிலங்களுக்கென்று பிரத்யேகமான சில பண்புகள் உள்ளன.அவற்றை என்ன என்று விசாரிப்பது இப்போதைய என்னுடைய நோக்கமல்ல.

ரசிகர்கள் மத்தியில் இன்று ஆற்றப்பட்ட  ரஜினியின் உரை மக்களின் முன்பாக பேசப்பட்ட மிகவும் நூதனமான ஒரு உரை.உள்ளடுக்குகள் நிறைந்தது.மிகவும் தெளிவான ஒரு அரசியல் உரை அது.எல்லாவிதமான தமிழ்நாட்டு அரசியல் கிளைகளையும் முன்வைத்து ஆற்றப்பட்ட உரை அது. இந்த உரையைக் கேட்டதிலிருந்து தமிழ்நாட்டின் அடுத்த முதல்வராக வரக் கூடிய ஒருவரின் சப்தம் அது என்று தோன்றிக் கொண்டே இருக்கிறது.ராமதாஸ் உட்பட,சீமான் உட்பட பிரதிநிதித்துவம் கொண்ட எல்லோரையும் கருத்திற்கொண்டு அவர்  உரை அமைந்திருந்தது . பிராமணர்களையும் அனுசரிப்பேன் என்பதின் பொருட்டே சோ.ராமசாமி அவர் பேச்சில் இடம் பெற்றார்.பிராமணர்களின் சாய்வு இல்லாமல் தமிழ்நாட்டில் காமராஜ் உட்பட எவருமே  முதல்வர்கள் ஆனதில்லை.பிராமணர்களில் அன்றாட பிராமணர்கள் ராஜாஜியை ஆதரிப்பவர்களாகவும் ,முற்போக்கு பிராமணர்கள் காமராஜை ஆதரிப்பவர்களாகவும் இருந்தார்கள். திருமாவளவன்  பேரில் ரஜினிக்கு உள்ள மதிப்பு என்பது எப்போதும் தலித்துகளுக்கு சாதகமற்றுப் போகாது என்பதை சூசகமாக வெளிப்படுத்துகிறது.இது மிகவும் குறிப்பிடத் தகுந்த விஷயம்.

தமிழ்நாட்டில் முன்னைக் காட்டிலும் சாதி பிளவுகள் கூர்மையடைந்திருக்கின்றன.தமிழ்நாட்டின் எந்த குறிப்பிட்ட சாதியிலிருந்து ஒரு தலைவன் வந்தாலும் ,அவன் தற்போது அந்த குறிப்பிட்ட சாதியின் அடையாளமாகத் தான் பார்க்கப்படுவானே அன்றி , பொதுமக்கள் தலைவனாக தமிழ்நாட்டைச் சார்ந்த ஒருவர் ஏற்கப்படுவதற்கான சாத்தியங்கள் இல்லை.ஒவ்வொருவரையாக மனம் எண்ணி யோசித்துப் பார்த்தால் இது விளங்கும்.அப்படி யாரும் இல்லை என்பதும் தெரியும்.சட்டியில் இருப்பதிலிருந்துதானே அகப்பையில் வரும்.இல்லாததை பேசுவதில் ஒரு பலன் கிடையாது.நடைமுறையிலிருந்து அனைத்து தரப்பு மக்களையும் அனுசரிக்கும் பண்பு கொண்ட ,மக்கள் சக்தி மிக்க தலைமையே தமிழ்நாட்டிற்குத் தேவை.அது ரஜினியிடம் இருக்கிறது. மேலும் தமிழ்நாட்டைச் சார்ந்தவராக அல்லாத ஒருவரையே வெகு மக்கள் தமிழ்நாட்டில் விரும்புகிறார்கள் என்பதற்கும் சமூகவியல் காரணங்கள் நிறைய உள்ளன.

மற்றபடி ரஜினி முதல்வர் ஆவதை தனிப்பட்ட முறையில் விரும்புவார்களா? என  நீங்கள்  கேள்வி எழுப்புவீர்களேயாயின் "ஆம் "என்றே பதில் சொல்வேன் நானொரு கமல் ரசிகன் என்றாலும் கூட.எல்லாம் நானோ ,நீங்களோ விரும்புவது  மட்டுமே உலகத்தில் நடக்க வேண்டுமாயின் ,தனி உலகத்தை ஏற்படுத்திக் கொண்டு குகைகளுக்குள்தான் செல்ல வேண்டியது வரும்.அரசியல் என்பது இப்போது சக்தி மிக்கதாகவும் ,அனைவரையும் அனுசரித்துப் போகும் தன்மை நிரம்பியதாகவும்  இருக்க வேண்டியது அவசியம்.அது ரஜினி ஒருவரால் மட்டுமே சாத்தியமாகும் இங்கே என்று உறுதியாக நம்புகிறேன்.குறிப்பாக மத்திய அரசாங்கத்திற்கு வீட்டிற்குள் நுழைந்து ரைடு நடத்தும் தைரியம் வரவே கூடாது.மற்றபடியுள்ள காரியங்களேயெல்லாம் வகுத்தது வகுத்தபடி நடக்கும் .எடப்பாடிக்கு பா.ஜ.க சாய்வு ஏற்படுவதற்கும் ,ரஜினிக்கு பா.ஜ.க சாய்வு ஏற்படுவதற்கும் ஏணி வைத்தாலும் எட்டாத வேறுபாடுகள் உண்டு.ரஜினியை மத்தியில் இருந்து ஓரளவிற்கு மேல் யாரும் கட்டுப்படுத்த முடியும் என்று தோன்றவில்லை.மக்கள் பின்னிருக்கும் போது கிடைக்கிற பலம் அது.

கொள்கை பேசிகள் ஐம்பது வருடத்திற்கு பழமையானவர்கள்.நிலவுடமை மனோபாவம் கொண்டவர்கள்.நிலவுடைமைவாதிகள் அனைவருமே சாதியை மேல்புறமாக எதிர்த்து கோசங்கள் எழுப்பினாலும் சாதியவாதிகளே. நேரடியாகவே இங்குள்ள நவீன தலைவர்கள் பலரை  அறிவேன்.அவர்கள் பனங்காடுகளிலிருந்தே இன்னும் வெளியேறத் தெரியாமல் பரிதவிக்கும் நரிகள் என்பதை. பழைய தலைமுறை இருபுறமும்  சாய்ந்து விட்டதுதான் அனைவருக்கும் தெரியுமே?

இரண்டு கவிகள் இரண்டு விதம் - தேன்மொழி தாஸ் - சூர்யா

இரண்டு கவிகள் இரண்டு விதம் - தேன்மொழி தாஸ் - சூர்யா

ஒரு கவிதையை ஏன் உங்களுக்கு பிடிக்காமற் போயிற்று ? எனக் கேட்டு வாசகனை வற்புறுத்த இயலாது.பிரம்பு கொண்டு அடிக்கவும் முடியாது. சிறந்த கவிதைகள் வாசகனுக்கு இயலாமற் போய் விடக்கூடிய சாத்தியங்கள் உண்டு.அதனால் சிறந்த கவிதைகள் அத்தனையும் வாசகனுக்கு அந்நியமானவை என்று முடிவு செய்ய இயலாது.பொதுவாக நல்ல கவிதைகளுக்கு தானாக வாசகனைச் சென்றடையும் கரிசனம் உண்டு கால தாமதம் ஏற்பட்டாலும் கூட.. கவிதையின் நடிப்பு காத்திருப்பது அதனையும் நோக்கித்தான்.அது சில வரைபடங்களை வரைந்து வரைந்து சமர்ப்பிப்பது அதன் வினோத நடிப்பை ஏதேனும் ஜீவி அறிந்து கொள்ளும் என்கிற தவிப்பின் அடிப்படையிலேயே.எனவே கவிதையை பொறுத்தமட்டில் உதாசீனமாக கடந்து செல்வது ஆகாத பழக்கம்.வாழ்க்கையின் எந்த துருவத்தில் இருந்தாலும் கூட கவிதை நளினம் செய்வது ,வரைந்து தன்னை வெளிப்படுத்துவது  தொடர்பின் அடிப்படையிலேயே

எண்பதுகளின் கவிஞர்கள் தங்களை மனித குலத்திற்கு விளங்காத அரூபிகளாக  நடித்துக் காட்டினார்கள் .அப்படியவர்கள் நடித்துக் காட்டியமைக்குப் பொருள் கிடையாது என்று சொல்ல முடியாது.சிவாஜி,எம்.ஜி.ஆர்.காலம் அது. ஆனால் அந்த இருள் மனோபாவம் தற்போது தமிழில் காலம் சென்று விட்டது என்று தோன்றுகிறது.அந்த மனோபாவம் நான் மட்டுமே  மேன்மையானவன் என்பதில் அடங்கியிருந்தது.இப்பொது அப்படியான ஒரு மனோபாவமும்,வெளிப்படுத்தும் முறையும் கேலிப்பொருளாகி விடும்  .

"நீயோ நானோ விஷேசமானவர்கள் ஒன்றும் கிடையாது ஆனால் நீ கண்ட விசித்திரத்தை மட்டும் சொல் பீடிகைகளை அகற்று " என்கிற வாசகர்கள் உருவாகிவிட்டார்கள்.இது ஒரு குறிப்பிடத்தகுந்த வாசக மாற்றம் என்றே கருதுகிறேன்.இந்த மாற்றத்தின் உக்கிரத்தைத் தமிழில் அடைந்திருப்பதை கண்டராதித்தனின் சமீபத்திய கவிதைகள்.சபரி நாதனின் லெகு தன்மை ஆகியவற்றினுடே விளங்க முடியும். சிவாஜி கணேசன் போலவே எல்லா காலத்திலும் நடித்துக் கொண்டிருந்தால் அது போலி நடிப்பென்றாகி விடும் .இசை,நடனம் எல்லாமே கால மாற்றம் கொள்வது போன்ற கவிதையில் ஏற்படும்  மாற்றமே இதுவும்.

எனினும் தத்துவத்தின் விசாலமான அறிவு,அனுபவ விசாலம் ,இவற்றையொட்டி கவிதை எட்டுகிற மகா தரிசனம் எல்லாம் கூடி இணையும் போது    கவிதைகள் சிறப்புப் பேறு பெறுகின்றன.சிலர் முக்கி முக்கி எழுதுகிறார்கள் ஆனால் ஒருபோதும் இவர்கள் கவிதைகள் எழுத முடியாது என்பது அவர்கள் எழுதுபவற்றை வைத்து தெரிந்து விடுகிறது.சிலருக்கு கவிதை பற்றின சகல பொருள் விளக்கமும் தெரிகிறது ,கவிதை மட்டும் வரவில்லை .அவர்களிடம் நமக்கு எடுத்துச் சொல்கிற தைரியம் ஏற்படுவதில்லை.உள்ளூர அவர்கள் மிக விரைவிலேயே இவற்றிலிருந்து விடுபட்டு விடுவார்கள் என்பதும் விளங்கி விடுகிறது.சிலர் தாங்கள் எழுதுகிற கவிதைகள் மிகவும் சிறப்பானவை என்றோரு துண்டுச் சீட்டும் இணைத்து படிக்கச் சொல்லும் போது ,துண்டுச் சீட்டைப் படித்து விட்டு விலகி ஓடி விடுகிறோம்.பைத்தியங்கள் அபாரமாக எழுதுகின்றன.அதற்காக பைத்தியங்கள் போல நடித்துக் காட்டுபவர்களையும் நம்மால் விலகிட முடியும்.ஒன்றையும் தீர்மானித்துச் சொல்ல இயலாவிட்டாலும் கூட கவிதை என்பதே பெரும் போக்கு,இயக்கம் ஒரு மொழியில் .மனவோட்டத்தின் வெளி.

அண்மையில் வாசித்தவற்றில் ஈர்ப்பை ஏற்படுத்திய கவிதைகளில்  ஒன்று தேன்மொழி தாஸின் "சூனு"  .மற்றொன்று "மரணத்தின் நடனம் " என்கிற சூர்யாவின் கவிதை.

"சூனு " விந்தையும் விசித்திரமும் ஒருங்கே அமையப்பெற்ற சிறந்த கவிதை.இப்படி எவர் ஒருவர் ஒரு மொழியில் சிலவற்றைப் படைத்து  விட்டாலும் அவர் சிறந்த கவி என்பதில் சந்தேகமே இல்லை.இவர்களே படைக்கிற மற்றொரு கவிதை ,  இதன் பக்கத்தில் வைத்தே படிக்க இயலாததாகவும் இருக்கலாம்,அப்படித்தான் இருக்கவும் செய்யும்.எல்லாமே செம்மையாக இருந்தால் அது கவிதையல்ல,செய்யுள் .தமிழ் கவிதைக்கென்று ஒரு பெருந்தொகுதி உருவானால் தேன்மொழி தாஸின்  இந்த கவிதையைத் தவிர்க்கவே முடியாது.இல்லாத கர்ப்பத்தின் மாயை காமத்தில் இழையும் மந்திரம் இந்த கவிதையில் பெரும் உயரம் நோக்கிஎழும்புகிறது.

சூனு
~~~~~
இரும்புக் கதவொன்றில் உனது பிஞ்சுக் கை அசைந்து கொண்டேயிருக்கிறது
சூனு
யாரும் நம்புவதில்லை
எனக்குள் நீ வளர்வதை வாழ்வதை
சோப்புக் கரைசலால் குமிழ் படைக்க
மூச்சுக் காற்றை ஊதுவது போல்
நீ கதவு திறப்பதை
அம்மா என அழைத்தபடி ஓடிவருவதை
பூக்களால் கன்னத்தில் ஒத்தடமிடுவதை
மணல்களை எனக்கான மாத்திரைகள் என்பதை
இரவை ஊஞ்சலாக்குவதை
எனது கண்களை தசமபாகமாக சிதறவிடுவதை
நித்திரைகளைப் புன்னகையாக்குவதை
நிலத்தின் ஆழத்தை எடுத்து
நீ எனக்குப் பொட்டு வைப்பதை

உனது அப்பாவின் பெயரை ஆன்மாவின் தண்டில் எழுதுவதை
மனதிற்குள்ளும் நஞ்சுக்கொடி வழியாகத்தான் உனக்கு உயிர் தருகிறேன் என்பதை
யாரும் நம்புவதில்லை சூனு


சூர்யா எழுதத் தொடங்கிய குறுகிய காலத்திலேயே உயரங்களை சென்றடையும் சில கவிதைகளை எழுதியாயிற்று.குழப்பமான திகட்டல்  ,சஞ்சலம் இவற்றையடிப்படையாகக் கொண்டு எழுதப்படுகின்ற சூர்யாவின் சில கவிதைகள் பிரமாண்டமான வீச்சு கொள்கின்றன.தொகுப்பாக கவிதைகள் வெளிவராத நிலையிலேயே வாசகர்களிடம் பாதிப்பை ஏற்படுத்தும் தன்மை கொண்டவையாக சூர்யாவின் கவிதைகள் உள்ளன.அழுகுணர்ச்சியை நரம்பு வழியே புறமுதுகிலேற்றும் தன்மை இவருடைய "திரு நகத்தழகி " போன்ற சில கவிதைகளில் நூதன வடிவம் பெறுகின்றன.மரணத்தின் நடனம் கவிதையில் ஏராளமான உள் மடிப்புகள்  இயல்பாகவும்,எளிமையாகவும் சிரசிலேறியிருத்தல் விஷேசம்.

தமிழின் உலகத் தரம் இந்த கவிதைகள்.சிந்தை கவிதையானால் சித்திரமும் கவிதையாகும் .

மரணத்தின் நடனம்
-------------------
ஒரு அகதியாக எனை கற்பனை செய்து கொண்டபோது
ஒரு அகதி முகாம் தென்படத் தொடங்கியது
முகாமுக்கு வெளியே பார்த்தேன்
சுதந்திரம் தென்படத் தொடங்கியது
சுதந்திரத்துக்கு வெளியே பார்த்தேன்
போர்விமானங்கள் தென்படத் தொடங்கின
விமானங்களுக்கு வெளியே பார்த்தேன்
பிணங்கள் தென்படத் தொடங்கின
பிணங்களுக்கு வெளியே பார்த்தேன்
ஒரு ம்ருகமனிதன் தெரியத் தொடங்கினான்
அந்த ம்ருகமனிதனுக்கு வெளியே பார்த்தேன்
எண்ணிலடங்கா ஆண்குறிகளுடைய மரணத்தின் நடனம் தெரிந்தது
அந்த மரணத்திற்கு வெளியே பார்த்தேன்
அமைதி மட்டுமே தெரிந்தது
ஆம்
அமைதி மட்டுமே தெரிந்தது

தீவிரவாதி என்பார்கள் - கவிதைகள்

 தீவிரவாதி என்பார்கள் - கவிதைகள்
-----------------------------------------------------------

அவள் சிரிக்கும் போது
இப்பொழுதிலிருந்துதான் சிரிக்கிறாள்
ஒரு பூ விரிவதைப் போல
ஒரு சூரிய அஸ்தமனத்தை ஒப்ப
ஒரு நதியில் மூழ்கி எழுவது பயின்று

அழும்போதுதான் எந்த நூற்றாண்டிலிருந்து கொண்டு
அழுகிறாள் என்று தெரியவில்லை
பயமாக இருக்கிறது

ஏழுகடல் தாண்டும் சித்தன்
எந்த நூற்றாண்டிற்குச் சென்று
சமாதானம் சொல்வது ?

2

எனது குயில்கள் கூவத் தொடங்கும் போது
மாலை இப்போது ஆறு மணி
இந்த மொத்த நாளிலிருந்து
எனக்கு கிடைத்த பிரபஞ்சத் துண்டு.

நாளின் அசதி நீரில் கழிய

போருக்குச் சென்று திரும்பியது போலும்
காணாதிருந்த கண்களில்
ஒரு பச்சைக் கிளி
கொண்டு நிரப்புகிறது
காட்சிகளின் பெரும் ஊற்றை

3

கைப்பிடியளவு கடல்தான் இந்த உடல்
என்ற ஒருவனை கடலில் கரைத்து விட்டுத் திரும்பினோம்
அப்படியானால்
எத்தனை கைப்பிடியளவு கடலாக இருக்கும்
இந்த கடல் ?

ஒவ்வொரு கைப்பிடியிலும் கடலளவு
நிறைந்திருக்கும் காமம் என்றால்
கைப்பிடியளவும் தீராக்
கடல்தானோ ?

கரைந்து சென்றவன் விட்டுச்
சென்ற அனுபவ எச்சம் மௌனம் பேசா
மணலுறுத்தல்
இன்றைய காட்சியெங்கும்

4

தென்காசி

ஒரு மடியில் மற்றொரு மடி
மற்றொரு மடியில் பிறிதொரு மடியென நீண்டு செல்லுகிற வீடுகள்
எல்லாமடிகளும் கால் நீட்டிப் படுத்திருக்கும் தெரு
கழிவு வாய்க்கால்கள் தெருவிற்குப் பின்புறத்தே
ஒளிந்து தெரியும் மஹா கோபுரம்

ஒரு மடியில் மற்றொரு மடி
மற்றொரு மடியில் பிறிதொரு மடியென படிந்த
ஓட்டுக் கூரை வீடற்ற வீடு

கவிஞனின் மடியில் படுத்துறங்க
இந்த நகரத்தில் வியாபாரிகள் அகன்ற பிறகு
வரும் இரவு
கோபுரத்திற்குப் பின்னே பவுர்ணமியில்
உதித்து வெளியேறுகிறான்
விக்ரமாதித்யன்

இப்போது இந்த நகரம்
அவனுடையதாயிற்றே

[ விக்ரமாதித்யனுக்கு ]

5

ஒரு மாபெரும் சர்வாதிகாரி எனக்குள்ளமர்ந்து
பொட்டல் வெளியில்
பயணிக்கையில்
இந்த நிலமெங்கும் என் சாம்பலை தானியங்களைப் போல தூவுங்கள் என கத்துகிறான்
அவன் கவித்துவத்திற்கு கைத்தட்டல்கள் சேருகின்றன

கொஞ்சம் பொறுக்கமாட்டானா இந்த பிச்சைக்காரன் ?
தானியமாய் தூவுவது இருக்கட்டும்
களவுபோய்விட்ட எனது தானியங்களை கைவசமாக்குங்கள் முதலில்
பிறகு பேச்சுவார்த்தையை வைத்துக் கொள்ளலாம் என்கிறான்

நாடோடிக்கு அந்திச் சூரியனின் ரெத்தக்கலங்கலில்
குருதியின் வெப்பம் பூக்க அம்மன் பிரச்சனமாகிறாள்

சூபி பத்துதலைகளை வேடிக்கை
பார்த்தாயிற்று
பத்துதலைகளும் இல்லையானால் யாதடா மனுஷா நீ
என்றொரு சாதுவைக் கடக்க
எல்லார் முகத்திலும் வந்து
ஒடுங்கிற்று பத்து முகம்

அன்பின் முகத்தை மட்டுமே தாளம் செய்தவன் முதுகில்
ஒங்கி மிதித்தவன் வழிப்பறிக்காரன்

அப்படியானால் சர்வாதிகாரிக்கும் மீதம் இருப்பது
ஒன்பது முகங்களா
மிஸ்டர் சாப்ளின் ?

6

பனிரெண்டு தினங்களில்

நான்கு பேர் இறந்து போய்விட்டதாகச் சொன்னார்கள்
நானறியவில்லை

புயல்மழைச் செய்திகள் நாற்பது
கடந்ததாம்

நின்றவர் பறந்ததும் பறந்தவர்
வந்ததும்
நானறியவில்லை

புதிதாக பாலம் திறந்திருக்கிறார்கள்
புரோட்டா கடையிருந்தயிடத்தில்
கல்யாண மண்டபம்

ஒரு நூறுபேருக்கு கல்யாணம்
முடிந்திருக்கிறது
பத்து நூறுபேர் பட்டதாரியாகியிருக்கிறார்கள்
எங்கள் நகரத்தில்

எண் கணித ஜோதிடத்திற்கொரு நிபுணர்
வந்திருக்கிறார்
நரம்பியல் மருத்துவர் இருவர் புதியவர்
பாலாலயத்திலிருந்து சாமி
வீதிவலம் புறப்பட்டுச் சென்றிருக்கிறார்

இன்னும் ஏராளம் நடந்து விட்டது என்கிறார்கள்
நானேதும் அறியவில்லை
அவர்களோடொப்பம் நானும் வசித்தலைவது
 இதேயூர்தானென்றாலும்

7

மசால் வண்டிக்காரனின் மகள்

"அப்பா வண்டிய மாத்துப்பா" என்ற போது
மகள் பெரியவளாகிவிட்டாள் என்பதை அப்போதுதான்
கவனித்தான் மசால் வண்டிக்காரன்

"நீ தேவைப்பட்டால் வாடகைக் கார் அமர்த்தி
சென்று வா மகளே"
என்கிற பதிலில் அவன் கோபம் கொள்ளவில்லை.
இயல்பாகச் சொன்னான்

அழுக்கடைந்த தனது டி.வி.எஸ்.50 இருபுறமும்
மசால் பாக்கட்டுகள் சுமந்து இந்த நகரத்தின் சந்து பொந்தெல்லாம்
சுற்றித் திரும்பும்
அழுக்கடைந்தது அதன் புறம் மட்டும்தான்
இன்ஜினுக்கு இருப்பதோ மகளின்
இருதயத் துடிப்புதான்

பின்னிருக்கையில் இருந்து
"நான் அவனிடம் பேசவில்லை" என்னும் தொனியோடு
காதலனுடன் பேசிக் கொண்டு வந்தவளை
வேண்டுமானால் வண்டியை ஓரமாக நிறுத்துகிறேன்
"பேசி முடித்த பின் செல்லலாம் மகளே"
என்றவன் சொன்னபோது
எங்கோ உள்ளுக்குள் பட்ட அடியின் வலி

அவள்
உணரத் தகாது என்பதுதான் அவன் விருப்பம்
அவளும் உணரவில்லை
நன்று

அப்பாவுக்கு எதுவுமே புரியாது என்பதில்தான் என்னே ஒரு சந்தோசம்
 மசால் வண்டிக்காரனின் மகளுக்கு

8

பிரான்சிஸ் கிருபாவின் ஊரில்
தொடுவானம் தரையில் வந்து விழுகிறது
சூரிய அஸ்தமனம் தரையில் தெரிகிறது

உதயமும் இவ்வாறே இருக்கக் கூடும்
கைக்கெட்டும் தூரத்தில் வானம்
இடுகாடும் இருக்கிறது சுடுகாடும் இருக்கிறது
குறையொன்றும் இல்லை

உனைக் கொன்றுவிடுவேன் என்கிற
பகிரங்க வெயில்

எல்லாவற்றையும் தாண்டி
எட்டு பெட்டிகளைக் கொண்ட ரயில்
ஊருக்குப் புறத்தே செல்கையில் கைகாட்டி விட்டு
வீடு திரும்பினேன்

பத்தினிப்பாறை என்பது இவ்வூரின் மேலே
வந்து விழுகிற எவ்வளவு
கடுமையான வன்சொல்

9

சொல்லிக் கொள்ளும் படியாக
ஒரு வேலையும் இல்லாமல்
வந்து திரும்புகிறவனிடம்
வேறொரு மொழியில் இந்த நகரம் உரையாடத் தொடங்குகிறது

தனது ஒப்பனைகளில் ஏன் உனக்கு ஆர்வமில்லை என அது
கேட்பதில்லை

ஒளி ஆபரணங்களைப் பூட்டி
அவனை அந்தியில் வழியனுப்பும் போது
என்னைப் பரபரப்பில்லாமல் பார்த்துச் செல்பவனே நீ வாழ்க என வாழ்த்துகிறது
வாழ்த்தொலி கேட்கையில் கொண்டு வந்திருந்த கத்தியை எடுத்து ஒளித்து வைத்துக் கொண்டேன்

எனினும் சபையில் கவனிக்கப்படாத பேரரசியை ஒப்ப
எனது முதல்பார்வையில் நகரத்தின் உடல் நடுங்கியதை யாருக்கும்
தெரிவிக்கமாட்டேனென உத்திரவாதம் கூறி திரும்பிக் கொண்டிருக்கிறேன்

எப்போதும் போல ஜன்னலோரம் தானெனதிருக்கை

10

சொல்லிக் கொள்ளும் படியாக
ஒரு வேலையும் இல்லாமல்
வந்து திரும்புகிறவனிடம்
வேறொரு மொழியில் இந்த நகரம் உரையாடத் தொடங்குகிறது

தனது ஒப்பனைகளில் ஏன் உனக்கு ஆர்வமில்லை என அது
கேட்பதில்லை

ஒளி ஆபரணங்களைப் பூட்டி
அவனை அந்தியில் வழியனுப்பும் போது
என்னைப் பரபரப்பில்லாமல் பார்த்துச் செல்பவனே நீ வாழ்க என வாழ்த்துகிறது
வாழ்த்தொலி கேட்கையில் கொண்டு வந்திருந்த கத்தியை எடுத்து ஒளித்து வைத்துக் கொண்டேன்

எனினும் சபையில் கவனிக்கப்படாத பேரரசியை ஒப்ப
எனது முதல்பார்வையில் நகரத்தின் உடல் நடுங்கியதை யாருக்கும்
தெரிவிக்கமாட்டேனென உத்திரவாதம் கூறி திரும்பிக் கொண்டிருக்கிறேன்

எப்போதும் போல ஜன்னலோரம் தானெனதிருக்கை

11

ஒரு நாள்தான்
இடைவெளி போலும்

சாலையில் விழுந்த பர்ஸை எடுத்துக் கொண்டு
நிமிர்ந்து நோக்கும் விஜய லெட்சுமி

தளர்ந்த தன் முகம் திருப்பி
வண்டியில் காலுதைத்துக் கிளம்புகிறாள்

ஒருநாளுக்கு அப்புறம் நாணயத்தின்
மறுபக்கத்தை கவிழ்த்தி
என்னுடன் பாட்டம் விளையாடிய
விஜய லெட்சுமியை
 அவளிடம் கைநீட்டுகிறேன்

அடையாளம் காண இயலாத
விஜய லெட்சுமியின் வண்டி விரைந்து
முன்னேறிக் கொண்டிருக்கிறது பணிக்களைப்பில்

சிறுமியை என்ன செய்வது என்று தெரியாது
அறைக்கு அழைத்து வந்து விட்டேன்

சாலையில் தொப்பென்று விழுந்தது
 அவள் பர்ஸ் மட்டுமல்ல
ஒருநாள் முன்பக்கம் இருந்த அவள்
சிறுமியும்
சேர்ந்துதானே

தங்கள் சிறுமியை தொலைத்தோரே
வந்து பெற்றுச் செல்லுங்கள்

ஒருநாள் அளவிற்குத்தான் தூரம் இருவருக்கும்
ஆனால் எவ்வளவு மகா தூரத்தில் இருக்கிறார்கள் இருவரும்


12

எனது அறை திறந்துதான் இருக்கிறது
எப்போதும் போலவே

எப்போது வேண்டுமாயினும் நீங்கள் வரலாம்

நீங்கள் யார் என்று கேட்க மாட்டேன்
ஊர் பெயர் அவசியமற்றது
உங்கள் பாலினம் என்ன ? தேவையில்லை

முதலில் கண்ட கனவில் திறக்கப்பட்டதிந்த கதவு
எட்டு பாழிகள் இருந்தன

நீங்கள் உங்கள் பெருமைகளை எடுத்து வந்தால்
இங்கே உங்களுக்கு சோர்வு தட்டக் கூடும்

திறக்கப்பட்ட எட்டு பாழிகள் வழியே
தொடர்ந்து பார்த்துக் கொண்டிருக்கிறேன்
தெருக்கள் சாலைகள் வீடுகள் கேந்திரங்கள்
கிளிகள் சிட்டுக் குருவிகள் என
எனக்கு ஒன்பது கண்கள் தெரியுமா ?
எட்டாவது பாழியிலிருந்து உற்றுப் பார்த்துக் கொண்டிருப்பது
எனது முதிர்ந்த ஆண்குறி
என்னுடைய மூன்றாவது கண்

எட்டு கண்களுடன் நீங்களும் வந்திணைந்தால்
நாம் ஒன்பதாவது கண் வழியே ஒன்றாகக் காண்போம்
நதிகளையும் ,மாமலைகளையும் ,தொடுவானத்தையும்

தேகம் இதில் முதல் கண்
தேக்கமற்றது இரண்டாவது கண்
பரலோகம் ஒரு கண்
பார்க்க இயலாதைவை இரண்டு கண்கள்
பார்க்க இயலாதவற்றைக் காணும் கண்கள் இரண்டு

நெற்றிக்கண் என்கிறார்களே
அது எப்போதும் கனவு பார்ப்பது எனக்கு

திறந்துதான் இருக்கிறேன்
உள்ளே வரலாம்
இல்லாத அறைக் கதவை தட்டுவதற்குப் பதிலாக
"சாப்பிட்டு விட்டீர்களா ?" என்று கேட்டு விட்டு வாருங்கள்
இல்லையெனிலும் எப்போதும் உங்களுக்கான உணவை
எடுத்துதான் வைத்திருக்கிறேன்
உடலின் அப்பம் போல

நீங்கள் திரும்பிச் செல்கையில் என்னிடம்
சொல்லத் தேவையில்லை

இரண்டு கண்களோடு மட்டும் இந்த அறைக்குள் உட்புகுந்தால்
கருக்கரிவாள் இன்னும் பதமாகத் தானிருக்கிறது
இரண்டு கண்கள் கொண்ட தலைகளை கொய்த்தெடுக்க
அது தயாராக இருக்கக் கூடும்
ஜாக்கிரதை

13

நீ வெளியேறிச் செல்லும் போது
ஒரு கொக்கு சாலையில் குறுக்கே பறந்து சென்றால் நீ
பாக்கியவான்

ஒரு செம்பருந்தைக் காணாமல் திரும்புவதை ஒருபோதும்
பயணமென்று கூறாதே

கூட்டமாக பறவைகள் நீலத்தின் உயரத்தில்
வரிசையாக நகரும் போது அப்படியே நின்று விடு

மரங்களில் இருந்து சப்தத்தில் விடற்கும்
சிறகுகள் மீண்டும் அமரும் வரையில் காத்திரு
செம்மறிகளை தொட்டுப் பார்த்து
பீதியுண்டாக்காதே

எதையும் தொட்டுப் பார்க்க விழையாதே
அது சம்சாரியின் வேலை

இரண்டு மைனாக்கள்
உனக்குக் காத்திருக்கும்
பேசிப் பழகி விடு.

நீ பேசுவது அவற்றுக்கும்
அவற்றின் மொழி உனக்கும்
எட்டும் போது பெரும்பாலும்
காக்கைகள்
உன் கையில் வந்து அமரத் தொடங்கி விடும்

இத்தனையும் செய்து விட்டு
வீடு திரும்பும் போது எங்கே போயிருந்ததாய் ?
என்று கேட்பார்கள்
சும்மா இங்கே தான் இருந்தேன் என்று
சொல் தைரியமாக
தவறில்லை

கொஞ்சம் அசதியாக இப்படித்தான் செய்கிறேன் என்றால்
கொலைமுயற்சி செய்வாளுன்
 மனைவி
ஈவிரக்கமின்றி
மறைத்து விடு

வெளியே விஷயம் தெரிய வேண்டாம்
தீவிரவாதி என்பார்கள்

கமலாம்மா

கமலாம்மா

அரிதாகச் சிலரே தங்களுடைய தேவதைத்தன்மையைத்  தவிர்த்து பிறவற்றை பிறருக்கு வெளிப்படுத்தாத தன்மையைப் பெறுகிறார்கள்.அதற்கு மிகவும் மனத் துணிச்சலும் ,வாழ்க்கை மீதான நிதானமான பார்வையும் தேவை.ஆழ்  சமுத்திரம் போலும் சலனமின்மை அவசியம்.  நான் அவ்வாறாக உணர்ந்த ஒருசிலரில் கமலாம்மா ஒருவர்.அவர் நிச்சயமாக தேவ பிரகாசம். அவரை கடைசியாக ஒரு பொது நிகழ்ச்சியொன்றில் பார்த்தேன்.பல வருடங்கள் இருக்கும் .இப்போது நண்பர் ஒருவர் அவருடைய புகைப்படங்களை வெளியிட்டிருந்தார்.ஸ்ரீனிவாசன் நடராசன்.அவரின் தன்மையை வெளிப்படுத்தும் புகைப்படங்கள். எவ்வளவோ நினைவலைகள்.

சுராவின் மறுபக்கம் கமலாம்மா. அவருடைய மன அலைவரிசையில் அவ்வளவு தூரத்திற்கு நெருங்கிக் கைகோர்த்திருந்தவர் கமலாம்மா.பெரிய ஆளுமைகளின் துணையாக அமைவது ஆணாக இருந்தாலும் பெண்ணாக இருந்தாலும் சிரமங்கள் நிறைந்ததுதான்.நான்கு தலைமுறை எழுத்தாளர்கள் வந்து தங்கி உரையாடி மீண்டும் கூடும் வண்ணம்  வேகமாக இயங்கிக் கொண்டிருந்த ஒரு வீட்டை நிர்வாகம் செய்தவர் அவர்.எட்டு வருடங்கள் அந்த வீட்டோடு நெருங்கிய உறவு கொண்டிருந்த நான் ஒருபோதும் முகமலர்ச்சியற்றோ ,நிதானமற்றோ கமலாம்மாவை  கண்டதில்லை.பொதுவாக இப்படியிருக்க வாய்ப்புகளே கிடையாது.அப்படிதான் இருக்க வேண்டும் என்கிற அவசியமுமில்லை.ஒரு வீடு என்பது எவ்வளவோ பணிகளை கலங்கலைக் கொண்டதுதுதான்.வீடு என்பதே லௌகீகத்தின் அனைத்து போராட்டங்களும் நிரம்பியதுதான்  . வீட்டை நிர்வகிப்பது என்பது களைக்குச்சியின் உயரத்தில் நின்று களை கூத்தாடுவது போல.வீட்டின் ஆண்,அல்லது பெண் யாரேனும் ஒருவர் இதனைப் புரிந்து கொள்ள வில்லையெனில் வீடு நடுங்கத்  தொடங்கி  விடும்.அப்படியானதொரு அமைப்பு அது. அதிலும் எழுத்தாளனின் ,கலைஞனின் வீடு விசித்திரமானது .சொல்லிக் கொண்டு வருவோரும் இருப்பார்கள்.திடீரென வருவோரும் உண்டு.வருவோருக்கு முதலில் ஒரு காப்பி கிடைக்கும்.காப்பி என்றால் அது காப்பி போல இராது.காப்பியாகவே இருக்கும் .அது வரும்போதே கமலாம்மாவின் முகமலர்ச்சியையும் அகமலர்ச்சியையும் ஒருவர் உணர முடியும்.அப்படி ஒருவர் உணர்வாரேயெனில் இந்த முகமலர்ச்சியும் அகமலர்ச்சியும் ஒருபோதும் நீங்காதவர் கமலாம்மா என்பது தெரிந்து விடும். களைப்புற்று நோயுற்று நான் அவரைக் கண்டதேயில்லை.எப்போதும் குளித்து விட்டு வருகிற போது இருக்கிற மனநிலையில் சதா இருக்கிறவராகவே அவர் எனது மனதில் பதிவாகியிருக்கிறார்.ஏராளமான வேலைகளை செய்து கொண்டே இருக்கும் போதும் கூட ஏராளமான வேலைகளை செய்து கொண்டிருப்பவரைப் போல ஒருபோதும் அவர் தோன்றுவதில்லை.எல்லாவற்றிற்கும் மேலாக அவர் சுராவிடம் மிகுந்த நிறைவை அடைந்திருந்தார்.அவர் யார் என்பதையும் உள்ளூர அவர் அறிந்து கொண்டிருந்ததாகவே நான் கருதுகிறேன்.பல எழுத்தாளர்களின் ,கலைஞர்களின் வீட்டில் அவர்கள் யார் என்பதை   துணையாக இருப்பவர்களால் அறிய  இயலுவதில்லை.தஸ்தேவெஸ்கி ,மார்க்ஸ் போன்றோருக்கு இப்படியமைந்திருக்கிறது.  

சுரா வீட்டிற்கு வந்து சேர்பவர்களிடம் வந்து சேர்ந்தவுடன் டாய்லட் போக வேண்டுமா ? என கேட்கும் சுபாவம் கொண்டவர்.நான் இப்பழக்கத்தை கற்றுக் கொண்டது அவரிடமிருந்துதான்.பிற எல்லாமே இரண்டாவதாக .எங்கிருந்தோ வருகிற பலருக்கும் இது அவசியமாகவே இருக்கும்.சிலர் கேட்கத் தயங்கி அடக்கிக் கொண்டிருப்பார்கள்.அந்த வீட்டை பற்றி சாதி சந்தேகம் கேட்பவர்கள் எல்லாம் தமிழ் சூழலில் இன்றுவரையில் இருக்கிறார்கள்.அந்த வீட்டின் எல்லா அறைகளும் எனக்கு நன்கு தெரியும் .அந்த வீட்டில் மதியம் யாரெல்லாம் இருக்கிறார்களோ , அவர்கள் ஒருங்கே அமர்ந்து சாப்பிடுவதுதான் வழக்கம். அப்படி சாப்பிடாதவர்கள் யாரேனும் இருப்பார்களா என்பது எனக்குத் தெரியாது.இது இயல்பாக நடைபெறுகிற காரியம்.எழுதுகிறவனை,அதிலும் நம்பிக்கையூட்டும் படி எழுதுகிறவனை அந்த வீடு ஏற்றுக் கொள்ள தயங்கியதே இல்லை. கமலாம்மா உணவு பரிமாறுவதில் உள்ள செய் நேர்த்தி சுராவின் உரைநடையில்  காணும் செய் நேர்த்திக்கு சமம்.

சுராவின் இழப்பு நேர்ந்தவுடன் ; தனக்கு என்ன தோன்றியது என்பதை பற்றி ,பின்னர்  கமலாம்மா எழுதியிருந்த பக்கங்களை மனம் கலங்கப் படித்தேன்.கமலாம்மா அது தவிர்த்து வேறு எதுவுமே எழுதியிருக்க இயலாது.புதுமைப்பித்தன் கடிதங்களில் சுரா கண்டடைந்ததெல்லாமே கமலாம்மா மீது ; தான் கொண்டிருந்த பெருங்காதலைத் தான் என்று இப்போது எனக்குத்  தோன்றுகிறது எனக்கு .சுராவிடம் மிகையோ ,ரொமெண்டிசமோ துளியும் கிடையாது.அக்கறைகளை செயலில் வைத்திருப்பவர் அவர்.அந்த வீட்டிற்கு மோசமான நடத்தைத் குழந்தைகள் என்றால்  ஜி.நாகராஜனும் அதன் பின்னர் நானுமாகத்தான் இருந்திருப்போம் என்று நினைக்கிறேன்.ஒருபோதும் அந்த வீடு எங்களைத் தட்டிக் கேட்டதில்லை.

எழுத்தாளர்களின் மனைவிமார்களின் மனோவோட்டம் பற்றி ஜே.ஜே.சில குறிப்புகளில் ஓரிடம் வரும்.நண்பர்களின் மனைவிமார்கள் ஆரம்பத்தில்  எழுத்தாளர்களிடம் காட்டுகிற விரோத மனோபாவத்தை கடுமையாக எதிர்க்கிற எழுத்தாளர்கள் ; நாள்போக்கில் அந்த விரோதத்தை பிரதிபலிக்கிறவர்களாக மாறிவிடுகிறார்கள் என்று .அப்படி மாறாத வீடு அவர்களுடையது.சுரா தவறாக ஏதும் செய்கிறார் என்று தோன்றினாலும் கூட  அது நிச்சயம் சரியாகத் தான் இருக்கும் என்று உறுதியான நம்பிக்கை கொண்டவர் கமலாம்மா.அவருடைய நம்பிக்கைதான் உண்மை .மிக உயர்ந்த வாழ்க்கை அவர்களுடையது .வாழ்வு முழுவதும் செய்தது நல்லறம்.

சுராவின் உடலின் முன்பாகவோ பின்னரோ சரியாக நினைவில் இல்லை. உங்களை போன்ற நண்பர்கள் அவரை பிரியாமல் இருந்திருந்தால் அவர் இன்னும் கூடுதல் காலம் வாழ்ந்திருப்பார் என்று கமலாம்மா சொன்னது நடுங்கும் வாக்கியமாக என்னுடைய மனதில் இருந்து கொண்டிருக்கிறது. சுரா என்னை பற்றி எல்லாம் அல்லது நண்பர்களை பற்றியெல்லாம் என்ன மதிப்பீடு கொண்டிருந்தார் என்பதனை விளங்கச் செய்து கொண்டிருக்கும் வாக்கியம் அது.  கமலாம்மாவிடமும் மிகையை நான் கண்டதில்லை.இந்த வாக்கியத்தையும் கூட அப்போதைய கடுமையான சூழ்நிலையிலும்  அவர் ஓரளவிற்கு நிதானத்தோடுதான் சொன்னார்.நான் நிதானமிழந்திருந்தேன்.

எல்லாமே சரியாகத்தான் நடந்தது என்று எடுத்துக் கொண்டாலும் கூட ,கமலாம்மாவைக் கடந்து செல்லும் துணிவை சுரா பெற்றிருக்கக் கூடாது.

நேற்று எழுத நினைத்திருந்தேன்.இன்று எழுதுகிறேன்.அந்த அம்மையின் காலடி சரணம் .அறிந்தோ ,அறியாமலோ தவறு செய்திருந்தால் மன்னிப்பீர்களேயாக.

சாதியுணர்ச்சி என்னும் உள்வட்ட சக்தி

சாதியுணர்ச்சி என்னும் உள்வட்ட சக்தி

சாதியுணர்ச்சி என்பது அதன் உள்வட்டத்தில் தேங்கி நிற்கிற வினோதமானதொரு காமம்.நமது கூட்டுப் பெருக்கில் நமக்கு கிடக்கிற சில்லிப்பு இருக்கிறதே அதுதான் சாதியுணர்ச்சிக்கு அடிப்படை.தனியே இருக்கும் போது , நாம் ஒரு மனிதனாகவும் நாலுபேர் தொங்கிப் பிடிக்கக் கிடைத்தால் நாம் வேறொரு மனிதனாகவும் இருக்கிறோம்.சாதிகளில் மட்டும் என்றில்லை அமைப்புகளில் ,நிறுவனங்களில் ,கட்சிகளில் ,சாதியெதிர்ப்புக் கூட்டங்களில் கூட இதன் தன்மை உண்டு.ஒருமித்த கொள்கை கொண்டோர் பிறரை கூட்டு சேர்ந்திருக்கும் போது தாக்குவதற்குத் துணை நிற்பதும் இதே உணர்ச்சிதான்.தனியே இருக்கும் போது ஒருவன் எவ்வாறு நடந்து கொள்வானோ அது போலவே கூட்டமாக  இருக்கும் போதும் நடந்து கொள்வானோ அப்போது முதற்கொண்டுதான் நாகரீக மனிதனாகிறான்.அது தான் சார்ந்த கூட்டமாகவும் கூட இருக்கலாம். இல்லாமல் இருப்பதெல்லாம் பொய்யுருக்கள் .

முதலில் தனி மனிதன் தனியாக வாழ்வது எப்படி என்பதை தெரிந்து வைத்திருக்க வேண்டும்.  சாய்வு கொண்ட கூட்டத்தில் மட்டும்தான் உனக்கு ஜொலிப்பு இருக்கிறதென்றால் உனக்கின்னும் அருகதை கூடவில்லை என்று பொருள்.தனியே வாழ்வதற்கு பயத்தை முதலில் வெல்வது எப்படி ? என்கிற பொருள் குறித்து ஜே.கிருஷ்ணமூர்த்தி போன்ற ஞானிகள் நிறைய விவாதித்துப் பொருள் கண்டிருக்கிறார்கள்.கூட்டத்தில் மட்டுமே பயமின்றி இருப்பது தொல்குடிகளின் நிலை.உதாரணமாக நீங்கள் எதிரியைத் தாக்குவதற்குரிய அனைத்து சக்தியையும் கைவசம் வைத்திருக்கும் போதும் தனியே இருப்பது போல நடந்து கொள்ள வேண்டும்.தாக்க நேருமாயினும் கூட நீங்கள் தனியே இருந்து தாக்குவது போலவே தாக்க வேண்டும். கூட்டம் திரளாமல் இருக்கும் போது நீங்கள் உங்களை பற்றி என்ன நினைக்கிறீர்களோ அதுவே உங்களுடைய நிஜம்.களரி போன்ற வித்தைகளை கற்றுத் தருகிற ஆசான்கள் கற்றுத் தருவதற்குத் தொடங்கும் போது ; இதையெல்லாம் நீ கற்றுக் கொள்வது யாரையும் தாக்காமல் இருப்பது எப்படி ? என்பதை அறிந்து கொள்வதற்குத் தானே தவிர தாக்குவதற்காக இல்லை என்பதை சொல்லித் தருவதுண்டு.

இங்கே நீங்கள் கவனித்தால் தெரியும் .தனியே இருக்கும் போது மிகவும் சுருங்கிப் போயிருப்பவன்,நாலுபேர் கூட்டணி சேர்ந்தால் எப்படி ஊதி  பெருத்து விடுகிறார்கள் என்பதை.இதை ஏதோ வெளியாட்களுக்குச் சொல்லுவது போல சொல்லவில்லை.நாம் இவ்வாறுதான்  இருக்கிறோம்.நீங்களோ நானோ இதற்கு விதிவிலக்கில்லை.

பின்னணியற்ற பெண் எனில் நமக்கு அவளிடம் ஈர்ப்பு கொட்டினால் அடங்கி விடும்.பின்னணியற்ற ஆணிடம் பெண்ணுக்கும் இங்கே வசீகரம் கிடையாது.தனியாகவெனில் அவள் எவ்வளவு கொடூரமாக துண்டாடமுடியுமோ அந்த எல்லைவரைக்கும் சென்று  துண்டாடுவாள்.எல்லா குறையையும் எடுத்து பரப்பிவிடுவாள்.இரண்டொரு  நாளில் தீர்ந்து போவார்கள்.காதல் திருமணங்கள் அடைகிற வேதனைகள் இதன்பாற்பட்டது.பின்னணி கடுமையாக இருந்தால் மட்டும்தான் நம்மால் அடங்க முடியும்.தனிமனிதனாக நாம் இன்னும் வாழத் தொடங்காததிலுள்ள குறை இது.

ஒருசமயம் எங்கள் பகுதியே  எண்ணம் கொண்டாலே பயந்து நடுங்கும் ஒருவருக்கும் எனக்கும் முரண்பாடு பகை .நானோ ஊரிலிருந்து பொது இடம் ஒன்றில் வந்து வாழ்கிறவன்.தனியன்.அவனுக்கோ ஏராளமான குடுமிகள்.தடுக்கி விழுந்தால் நாலு குடுமிகள் வந்து முந்துவார்கள்.ஆறுமாத காலங்களுக்கும் மேலாக பகை நகர்ந்து ஓடிக் கொண்டிருக்கிறது.நள்ளிரவில் எங்கேனும் போய்விட்டது திரும்பிக் கொண்டிருப்பேன்.வழிமறித்து மல்லுக்கு வருவார்கள்.தாங்கி கொள்ள இயலாத சல்லித்தனங்கள்.ஒவ்வொரு எடுபிடியும் தலையின் பெயரை சொல்லித் தாக்க வருவான்.என்ன செய்வது என்றே தெரியவில்லை.குடிப்பழக்கம் கொண்ட ரௌடியெனில் காலையில் அவன் குடிப்பதற்கு முன்னரே சென்று பார்த்து விட்டீர்கள் எனில் தலை தொங்கித்தான் கிடப்பான்.எனக்கு வாய்த்த எதிரியோ குடிப்பழக்கம் இல்லாதவன்.ஸாகா செய்யக் கூடியவன் காலையில்.வீட்டுக்கு வெடிகுண்டெல்லாம் வைத்து விடுவோம் என்று அவன் குடுமிகள் வலிபேசித் திரிந்தன.

பொறுக்க இயலவில்லை.காலையில் நேரடியாகக் கிளம்பி அவனுடைய வீட்டிற்குச் சென்றேன்.குடுமிகள் பயிற்சியில் இருக்க தலை சட்டையில்லாமல் நின்று கொண்டிருந்தது.அவனுக்கு வாய்ப்பு எதுவுமே வைக்காமல் " அரிவாள் நீ வெட்டினாலும் வெட்டும் நான் வெட்டினாலும் வெட்டும்."; நாலுபேரோடு மட்டுமே எப்போதும் சுற்றித் திரிந்து கொண்டிருக்கிற நாய் நீ ? நான் தனியாக இருப்பவன்.உனக்கு என்ன செய்ய வேண்டும் ? என்று கேட்டேன்.எனக்கும் அதற்கும் ஒரு சம்பந்தமும் இல்லை என்று சொல்ல நடுங்கினான்.எனக்கு இந்த அனுபவமே புதிய அறிவாக அமைந்தது.பின்னர் எப்போதென்றாலும்   எனது நண்பர்களுக்கென்றாலும் சரி ,இது போன்ற சிக்கல்கள் தோன்றினால் எதிரியை தனியாக பார்க்கவே சொல்லித் தருகிறேன்.அவன் பக்கம் சந்திப்பின் போது ஆட்கள் இருக்கலாம்.உங்கள் பக்கம் ஒரு சல்லிப்பயல் கூட இருக்கக் கூடாது.  மிகவும் தெளிவாகத் தான் நான் அன்று துணைக்கு ஒருவரையும் அழைத்துச் செல்லவில்லை. அவ்வளவுதான் விஷயம்.அதன் பிறகு அவர்கள் எனது வீட்டிற்கு குண்டு வைக்கிற கொள்கை முடிவை மாற்றிக் கொண்டார்கள்.

பேனரோடு தாக்க முற்படுபவர்களை பேனர் இல்லாமல் தனிமைப்படுத்தி எதிர்கொள்ள வேண்டும்.துவண்டு போவார்கள். பேனரை இணைத்து விட்டீர்கள் எனில் சக்தி கொண்டெழும்பி விடுவார்கள்.  .கூட்டம் என்பது தாழ்வுணர்ச்சியின் காம ஆற்றல்.நாய் ஒருபோதும் பயப்படாதவர்களை கடிப்பதில்லை.அதனால் பயத்தை மட்டுமே கடிக்க முடியும் .நாயைக் கட்டுவது என்று சொல்வார்களே அது ஒன்றுமே கிடையாது .சாந்தி யோகத்தில் இருக்கத் தெரிந்தவனிடம் நாயால் குரைக்கக் கூட இயலாது.

நாம் தொடர்ந்து கூட்டமாக மட்டுமே வாழப் பழகி வைத்திருக்கும் சமூகம்.தனிமனித வாழ்வு என்பது என்ன என்பதனை அறிந்து கொள்ளாதவரையில் சாதியை நம்மால் கடக்கவே இயலாது என்பதுதான் உண்மை.ஏனெனில் நம்முடைய காமம் சேகரமாகியிருக்கும் இடம் அது. இதற்கு மதத்தையும் பிசாசுகளையும் காரணம் காட்டுவதால் ஒரு பலன் கிடையாது.மேலும் மேலும் சாதிகளை உருவாக்கிக் கொண்டுதான் இருப்போம்.கொள்கைகளும் கோஜங்களும் புதிய புதிய சாதிகளாக.

கொஞ்சம் கொஞ்சமாக நல்ல பிராமணன் ஆகிவிட வேண்டும்

கொஞ்சம் கொஞ்சமாக நல்ல பிராமணன் ஆகிவிட வேண்டும்

பிராமணன் ஆதல் என்பது பிராமணன் என்னும் சாதியாக ஆவது அல்ல.நல்ல முஸ்லீம் ஒரு பிராமணன்தான்.நல்ல பவுத்தன் ஒரு பிராமணனே .பிராமணன் ஆதல் என்பது ஒரு விசேஷமான இடத்திற்கு வாழுமிடத்திலிருந்தே சென்று சேருவதைக் குறிப்பது.உடல் கொண்டு அனுபவம் கொண்டு வாழாமல் அந்த இடத்திற்கு வந்து சேர இயலாது. உடலும் அனுபவமும் கொண்டு சேர்க்கும் பாதைகள்.   இசை ஞானி இளையராஜாவை பலரும் அவருடைய ஆன்மீக நகர்தலை குறித்து விமர்சனங்கள் எழுப்பும் போது உண்மையாகவே சங்கடப்பட்டிருக்கிறேன்.ஒருகாலகட்டத்தின் இசையை முழுவதுமாக தன்வயப்படுத்திய ஒரு மேதை அனுபவம் கொண்டு அடைந்த இடம் ; தவறாக இருக்கும் என்று எந்த கருத்தின் ,கொள்கையின் ,அறிவின் அடிப்படையில் கருதுகிறார்கள் ?.அவர் இன்றிருக்கும் இடத்திற்கு நாளை நீங்களும் வந்து சேருவதுதான் நல்லது என்பதை அனுபவத்தால் கண்ட பின்னர்தான் விளங்க இயலும்.

இசையையும் ,மொழியையும் தன்வசப்படுத்தும் ஒருவன் பிராமணன் ஆகாமல் இருக்க இயலுமா என்ன ? ஜேசுதாஸ் சபரிமலையில் மடியுருகி நிற்கிறாரே அந்த பரவசமான இடத்திற்கு இன்றில்லையாயினும் என்றேனும் ஒருவன் வாழ்க்கையில் வந்து சேராமல் இயலாது.அந்த இடம் என்ன என்பதை ஒருவன் அறிந்து பின்னர் ஏதேனும் மாறுபட்டுச் சொல்கிறான் எனில் அவனிடம் பயில மேலும் கூடுதலாக ஏதேனும் இருக்கலாம் .அறியாதவனின் பழிச்சொல் அறியாமை அன்றி வேறொன்றும் இல்லை.பிராமணன் ஆகுமிடத்தில் பரமானந்தம் நிறைந்திருக்கிறது.அது முழுதுமாக ஒருவருக்கு வசப்பட்டு விடும் என்று எனக்கு நம்பிக்கையில்லை.அனுபவத்தில் கண்ட ஞானியரைக் கண்டே இதனைச் சொல்கிறேன். கொஞ்சம் கொஞ்சம் துளித் துளியாக அவ்வப்போது வசப்பட்டாலும் கூட போதுமானது என்றே சொல்வேன்.கிராமங்களில் பிறப்பால்  பிராமணர்கள் அல்லாத சாதாரண மனிதர்கள் பலருக்கு இந்த தன்மைகள் வசப்பட்டிருப்பதைக் கண்டிருக்கிறேன்.கிழவிகளிடம் வசீகரம் கொண்டிருக்கிறேன்.அப்படிப் பார்த்தால் என்னிடம் எழுகிற தாயே என்னும் ஒலியில் கன்றின் சாயல் தொனிக்கும் .அந்த அன்னையரை கண்ணசைவிலேயே கண்டறியும் ஞானம் உண்டெனக்கு.

தட்டுங்கள் திறக்கப்படும் என்கிற கூற்று புலப்படுவதற்கு ஒரு மனிதனுக்கு எவ்வளவு   கால அவகாசம் தேவைப்படும் ? என்பதை அறுதியிட்டுச்   சொல்ல இயலாது.எனக்கு வசப்பட்டு விட்டது என்று அறிவித்தாலே அவருக்கு வசமாகவில்லை என்பதுதான் அர்த்தம்.நெருங்கி நெருங்கிச் செல்ல முடியும் அவ்வளவுதான் .உள்ளிலும் வெளியிலும் நிறைந்திருக்கும் ஒன்றோடு இணைப்பு வலுப்படுந்தோறும் வசமாகும் .கவிஞனாக எனக்கு வசப்படுவதற்கு எவ்வளவு இடையூறுகள் இருக்கின்றன என்பது மட்டுமே தெரியும்.

சித்தர் ஒருவரை திருச்செந்தூர் அருகில் பார்க்கச் சென்றிருந்தேன்.பதினைந்து வருடங்களுக்கு முன்னர். அப்போது திமிரை மட்டுமே சொத்தென கொண்டு நடந்த காலம்.இப்போதும் என்ன முன்னேறி விட்டது ? இப்போதும் அதுதான் நிலை.என்றாலும் முன்னதுக்கு இது பரவாயில்லை.உயிரைத் தவிர்த்து அவரிடம் ஒன்றுமே இருக்கவில்லை.துளையிட்டு ஊடுருவும் கண்கள்.இப்போதும் நினைவில் இருக்கிறது.அன்னையின் கண்களை போன்ற கருணையும் கொண்ட கண்கள்."உள்ளுக்குள் எதுவும் யாருக்கும் சரியாகாது.நீ எங்கே உடைந்தாயோ அங்கே குணப்படவேண்டும்.அதுவரையில் போராடிக் கொண்டேதான் இருக்க முடியும் .அதுதான் இயற்கையின் நியதி" என்றார்.அவர் என்னை நிர்வாணமாகப் பார்த்துக் கொண்டிருக்கிறார் என்று தோன்றியது எனக்கு.அவருடன் விடைபெற்றுத் திரும்பி விட்டேன்.இருந்திருந்தால் முன்னது பின்னது இரண்டையும் சொல்லிவிடுவார்  என்று பயமாக இருந்தது.அப்போது அதனைத் தாங்குகிற மனவலிமையிலும் நான் இல்லை.

சற்றைக்கும் முன்பாக   கால இடைவெளிக்கு பின்னர் விக்ரமாதித்யனிடம் பேசினேன்.அவரிடம் எவ்வளவோ பேசியிருக்கிறேன்.அவரது அதிகம் சுற்றியிருக்கிறேன்.இன்று பேசும் போது ஒருகாரியம் பிடிபட்டது.அவரிடம் பேசும் போது எதோ ஒன்று நம்மிடம் குணப்படுகிறது.குணக்கோளாறுகள் அத்தனை  பேரும் சரக்குடன் ஏன் அவருக்காகக் காத்திருக்கிறார்கள் ? அவர் ஒரு கவி என்பதால் மட்டுமல்ல.அவர் ஒரு பிராமணனும் கூட .சைவப் பிள்ளைமார் என்று அவர் கூவித் தீர்வது ஒரு மாறுவேடம்.  அவர் ஒரு சாக்கடை சாமியல்லவா ? என்று எவரேனும் கேட்கலாம்.சாக்கடைச் சாமிதான் ஆனால் அவருள் ஒரு பிராமணன் வசிப்பதை அதனால் தட்டிவிட முடியுமா என்ன ? மாயம்மா இருக்கிறாள்தானே ! உருவத்தால் பிறப்பால் ஆவது ஒன்றுமில்லை.நாளைக்கே விக்ரமாதித்யனைக் காணச் சென்று விட வேண்டும் என்கிற கொதி உண்டாகிவிட்டது.அவர் எதோ ஒன்றினை உள்ளத்தில் கொத்திச் சரிபடுத்துகிறார்.எப்படியென்று எனக்குத் தெரியாது.

கோவில் கோபுரங்களுக்கு இணையான அனுபவத்தை மசூதி அமைப்புகள் எனக்கு ஏற்படுத்துகின்றன.அனந்தபுரத்தில் ஏற்படுகிற அதே பரவசம் எனக்கு எல்லா மசூதி அமைப்புகளைக் காணும் போதும் உண்டு.சுடலையின் ,வாதைகளின் வெட்ட வெளியமைப்புகளிடமும் இதே அனுபவம் எனக்கு உண்டு.அதில் கிடையாது என்பது நம்பிக்கையில் இருந்து புறங்கூறல் .அனுபவத்தில் அது உண்மையல்ல.இதனையெல்லாம் யாரும் வேடிக்கையாகச் செய்து வைக்கவில்லை.காணும் போது காட்சிகள் திறக்கும்.

சமீபத்தில் நான் சந்தித்த தமிழ் அறிஞர் ஒருவர் எல்லோரும் பிராமணனாக முயற்சிக்கிறார்கள் என்று கவலை தெரிவித்தார்.எல்லோரும் பிராமணனாவதுதானே நல்லது.பிராமணனுக்கு சாதியில்லை.மதமில்லை.நிறுவனம் இல்லை.பேதமில்லை.கொள்கையில்லை.இலட்சியங்கள் கிடையாது.எல்லோரும் பிராமணன் ஆவதுதானே நல்லது இல்லையா ? மாணிக்க வாசகரைப் போல ,நம்மாழ்வாரை ஒப்ப , பெரியார் பீரப்பாவைப் போல 

நீட் தேர்வு வெளிப்படையான அரசியல் மோசடி

நீட் தேர்வு வெளிப்படையான அரசியல் மோசடி

ஒரு சமூகத்தின் கல்வி என்பது படிப்பது ,வேலை பார்ப்பது ,தொழில் புரிவது என்பவற்றோடு மட்டும் தொடர்புடைய ஒரு காரியம் அல்ல.எந்த சமூகம் கல்வியில் தன்னை முழுமையாக ஈடுபடுத்திக் கொள்கிறதோ அப்போது முதற்கொண்டு அது தனது அரசியல் உரிமைகளை நிலைநாட்டத் தொடங்குகிறது என்று பொருள்.நமது நவீன சமூகத்தில் மருத்துவம் நேரடியான அரசியல் தொடர்பை வெளிப்படுத்தாத போதும் ,அல்லது வெளிப்படுத்தும் போதும் அரசியல் உரிமைகளை மீட்கும் சக்தி கொண்டதொரு படிப்பு .மருத்துவர்கள் அதிகம் உள்ள ஒரு சமூகம் அதிகபட்ச பாதுகாப்பையும் பெறுகிறது ,அரசியல் அதிகாரம் பெறுகிறது  என்பது கடந்த காலங்களில் நிகழ்ந்த அரசியல் எழுச்சிகளின் உண்மை.தகவல் தொழில் நுட்பம் போன்ற துறைகளுக்கு கூட நமது சமூகத்தில் இல்லாத மறைமுக அதிகாரம் இது.அரசியல் அதிகாரத்தை அடைவதில் மருத்துவம் முதற்படி.இந்த அதிகாரத்தை  மாநில அரசியலில் நிலை கொள்ளுதலில் இருந்து பிடுங்கி மத்திய அதிகாரத்தோடு இணைக்கும் முயற்சியே நீட் நுழைவுத் தேர்வு என்னும் அரசியல் மோசடி.

பெரும்பாலும் தமிழ்நாட்டில் உருவான மருத்துவர்கள் முத்துக் கருப்பனும்,பேச்சி முத்துவும் மாநில அராசாங்கத்தின் அதிகாரத்தில் உள்ளீடாக வினையாற்றியவர்கள்.காங்கிரஸ் போன்ற தேசியக் கட்சிகளில் பங்கெடுத்த மருத்துவர்களும் கூட இதுவரையில் மாநில அரசின் அதிகாரத்தில் அடையாளத்தில் பங்கெடுத்தவர்கள்தாமே அன்றி மத்திய புரோக்கர்களாக தொழில் பட்டவர்கள் இல்லை.மாநிலத்தில் அரசாங்கம் ஸ்திரமாக அமைவதில் தமிழகத்தில் மருத்துவர்கள் பங்காற்றியிருக்கிறார்கள்.இந்த இணைப்பு இதுநாள் வரையில் குலைந்ததில்லை.நீட் தேர்வு வழியாக அவர்களை அப்படியே ஒரு எலைட் சமூகமாகப் பிடுங்கி மத்தியில் கொண்டுபோய் நிறுவுதலுக்கான முயற்சியை டெல்லி இப்போது துரிதப் படுத்துகிறது.தகுதி போன்ற பழுதடைந்த கருத்தாக்கங்கள் வழியே மருத்துவத்தை அதிகாரக் கடத்தல் செய்வதில் டெல்லி வேகமெடுக்கும் நூதன முயற்சியே நீட்.பச்சையாகச் சொன்னால் முத்துக் கருப்பனை  "இனி நீ முத்துக் கருப்பானாக இருந்தது போதும் ,முடியுமானால் ரெட்டியாக இரு இல்லையெனில் இந்த சிஸ்டத்தை விட்டுவிட்டு வெளியேறி விடு " என்கிறது டெல்லி.

மாநில அரசாங்கத்தின் கைக்குள் கல்வி  இருக்கும் வரையில்தான் மட்டுந்தான்  இந்தியா போன்றதொரு நாட்டில் அரசியல் பாதுகாப்பும் சமநிலையும் இருக்கும்.மாநிலத்திற்கு மாநிலம் இங்கே கலாச்சார வேறுபாடுகள் அதிகம்.கதகளியை ஒரு மலையாளி மத்திய அரசின் பாடத் திட்டத்திலிருந்து ஒரு   கற்க வேண்டிய நிலை ஏற்படுமேயானால் அது எவ்வளவு துன்பியலாக இருக்குமோ அது போலத்தான் திருவள்ளுவனை சி.பி.எஸ்.ஈ வழியே கற்க முயல்வதும்.இது பண்பாட்டுத் துறைகளுக்கு மட்டுமல்ல.தொழில் துறைகளுக்கும் பொருந்தும்.பஞ்சாபின் விவசாயமும் கேரளத்தின் தொழில்பேட்டைகளும் ,தமிழ்நாட்டின் வியாபாரமும் ஒன்று அல்ல. கல்வி ஒன்று போல அமைய வேண்டும் என்கிற குரல்கள் இந்தியாவை பொறுத்தவரையில் ஆபாசமானவை.மாநிலத்திற்குள் உள்ள ஏற்ற தாழ்வுகளையும் ,அவற்றில் ஏற்பட்டாக வேண்டிய சமநிலையையும் அதிகார பகிர்வையும் மாநில அரசு தான் கணிக்க ,சரிப்படுத்த இயலும் அன்றி எல்லாவற்றையும் கொண்டு போய் மேலிடத்தில் ஒப்படைக்க இயலாது.இத்தகைய முயற்சிகள் பின்னாட்களில் ஏற்படவிருக்கிற ,அதிகார சமநிலையின்மையிலிருந்து தோன்றவிருக்கிற கலகங்களுக்கான இரைகள்.இந்தியா போன்ற பன்முகத் தன்மைகள் அதிகம் கொண்டதொரு நாட்டில் முற்றிலும் இந்திய இறையாண்மைக்கு எதிராகப் பேசும் குரல்கள்  எவ்வளவு ஆபத்தானவையோ,அதே அளவிற்கு மாநில உரிமைகளை கீழிறக்க உதவிகரமாக இருக்கும் குரல்களும் மிகவும் ஆபத்தானவை.

தகுதி பற்றிய பேச்சு  என்பது உண்மையில் தகுதி பற்றிய பேச்சு அல்ல.அது சுதந்திரத்திற்குப் பிறகு அதிகாரமடைந்து வருகிற பிற சமூகங்களின் எழுச்சியில் அதிருப்தியை வெளிப்படுத்திடும் குரலின் கருத்தாக்கம்.இந்த கருத்தாக்கம் எங்கெல்லாம் பேசப்படுகிறதோ அங்கெல்லாம் ஒரு அபாயமான உட்பொருள் நிரம்பியிருப்பதை உணர இயலவில்லை எனில் அதனை அரசியல் இம்பொட்டன்சி என  கருதவேண்டும்.  இந்த தகுதி என்கிற அந்தரத்தில் தொங்குகின்ற கருத்தாக்கம் அதிபயங்கரமான வஞ்சகமும் சூதும் நிரம்பியது.சாதிய கண்ணோட்டங்களின் ஆணி வேரிருக்கும் பதுங்கு குழி இந்த கருத்தாக்கம்.

மாநில அதிகாரங்களைப் பறித்து மையத்திற்கு கடத்துகிற ஜோலி இப்போது பா.ஜ  .க அரசிற்கு மட்டுமே உரியது என்று சொல்லயியலாது ஆனால் பா.ஜ.க அதனை நோக்கி விரைவு படுத்துகிறது என்று வேண்டுமானால் சொல்லலாம்.டெல்லிக்கு என்றே சில விஷேஷ குணாம்சங்கள் உள்ளன.கட்டுடைத்தால் சிதறி விகாரமாகத் தோற்றமளிக்கக் கூடிய குணங்கள் அவை.மீண்டும் மீண்டும் டெல்லியிடமிருந்து தன்னை மீட்கும் குணங்களும் சாமர்த்தியமும்  கொண்ட தலைமையும் ,பிரதிநிதித்துவமும் இந்திய மாநிலங்களுக்கு எப்போதும் அவசியம்

எனக்கு எப்போதும் இரண்டு தலைநகரங்கள்.ஒன்று டெல்லி எனில் மற்றொன்று கவர்ச்சி மிக்க சென்னை.எனக்கு எப்போதும் ஒற்றைத்  தலைநகரம் கிடையாது.சென்னைதான் என்றால் அருகில் வராதே ஓடிப்போய் விடு என்பேன்.டெல்லி மட்டும்தான் என்றால் கல் கொண்டு எறிவேன்.கலகம் புரிவேன் .இங்கே நான் என்பது நான் மட்டுமல்ல.

கிராமத்து பிராமணர்களின் உணவுப் பழக்கம் தவறு

கிராமத்து பிராமணர்களின் உணவுப் பழக்கம் தவறு

கிராமத்து பிராமணர்கள் தவறாக சைவ உணவுப் பழக்கத்தைக் கடைபிடிக்கிறார்கள்.அசைவத்தை ஏற்றுக் கொண்டுள்ள பிராமணர்களின் அளவிற்கு சைவ உணவுப் பழக்கம் கொண்ட பிராமணர்களுக்கு அறிவும் குறைவு ,உடல் ஆற்றலும் குறைவு .உள்ளத்தாலும் உடலாலும் கிராமத்து பிராமணர்கள் வீரியம் குன்றியிருப்பதற்கு சைவ உணவுப் பழக்கம் ஒரு முக்கியமான காரணம்.உண்மையாகவே மனிதனுக்கு சைவ உணவுப் பழக்கம் விஞ்ஞான ரீதியானது கிடையாது.மட்டுமல்ல .சைவ உணவுப் பழக்கத்திற்கும் ஆன்மீகத்திற்கும் ஒரு தொடர்பும் கிடையாது.சைவம் உயர்வானது என்கிற நம்பிக்கை ஒரு மாயை.

வாயுத் தொல்லைகள்,புரதக் குறைவு போன்ற வியாதிகளும் அதனால் ஏற்படுகிற பழுப்பு ,துர்நாற்றம் போன்றவை சைவ உணவால் ஏற்படக்கூடியவை.கிராமத்து பிராமணர்களில் இரண்டு கிலோமீற்றர் அளவிற்கு நீளமாக குசு விடுபவர்கள் எல்லாம் இருக்கிறார்கள்.பிறரில் குறைவு இது  .  அவர்கள் தவறாக பல காலமாகப் பின்பற்றி வருகிற சைவ உணவுப் பழக்கமே இதற்கு காரணம்.பிராமணர்களின் உடலில் இருந்து வீசுகிற தவறான வாடைக்கும் அவர்கள் மேற்கொண்டு வருகிற உணவுப் பழக்கத்திற்கும் தொடர்பு உண்டு.என்னுடைய பிராமண நண்பர்களில் பலர் அசாதாரணமான அசைவ உணவுப் பிரியர்கள்.அவர்களிடம் காணப்படுகிற தெம்பிற்கு அசைவம் காரணமாக இருப்பதைக் கவனித்திருக்கிறேன்.அவர்கள் அசைவ உணவுப் பிரியர்கள் என்றால் அவ்வளவு அலந்து அசைவத்தின் மீது சாடுபவர்கள் .அவர்களிடம் இப்படி ஒரேயடியாக உங்கள் தலைமுறைகள் விட்டது அனைத்தையும் ஒரே நேரத்தில் எடுக்க முயலக்கூடாது என்று கூட அறிவுரைகள் சொல்லியிருக்கிறேன்.மீன் உணவுகள் ,கடல் உணவுகள் சர்க்கரை நோயாளிகளுக்கு கூட மிகவும் பாதுகாப்பானவை.நீள் ஆயுளைத் தர வல்லவை.

சர்க்கரை நோயாளிகளுக்கு ஏற்படுகிற புரதச்சத்து குறைபாட்டைப் போக்குவதற்கு கடல் உணவு போல அமுது கிடையாது.சூரையும்,சாளையும் நோயுற்றவரின் உடலில் கூட பரம்பொருளை உணர்ச்சி செய்யும் சக்தி கொண்டவை.விலை மலிவு. பூதேவியின் சாமர்த்தியமே கடல் உணவுகள்.சர்க்கரை நோயாளிகள் நண்டு வகைகளை புறந்தள்ள வேண்டும்.அவை குழந்தைகளுக்கு நன்மை செய்யும்.அவர்களை விடைக்க வைக்கும்.பெரியவர்களுக்கு அதிலும் சர்க்கரை நோயாளிகளுக்கு நண்டு உவப்பானதில்லை.கடலில் நண்டு தவிர மீதமுள்ள அனைத்துமே சர்க்கரை நோயாளிகளுக்கு அமுதுதான்.மாற்று புரதமாகக் கடைகளில் கிடைக்கிற புரதங்கள் அனைத்துமே கடலுணவிற்கு நிகர் ஆகாது..

கோழிமுட்டையை பொறுத்தவரையில் ஆறு மாதக் குழந்தையிலிருந்து எண்பது வயது கடந்த பிராமணன் வரையில் யார் வேண்டுமாயினும் சாப்பிடலாம்.கீரையைக் காட்டிலும் எளிதில் ஜீரணமாகி உயிர் சக்தியாவது முட்டை.இயற்கையாகவே மனிதனின் இயல்பான உணவு அசைவம் .நமது சித்தர்கள்,நாயன்மார்களில் சிலர் அசைவப் பழக்கத்தைக் கொண்டவர்கள்.நாயன்மார்களில் அதிபத்தர் ஒரு மீனவர்.

பொதுவாகவே நீங்கள் அசைவத்தைத் தவிர்த்தால் மருந்தாக அசைவத்தை எடுக்க வேண்டியது வரும்.பிராமணர்கள் எடுக்கிற பசுநெய் ஒரு ஊக்கிதான்.என்றாலும் மீன் எண்ணெய்க்கு நிகர் ஆகாது.அது போல அசைவத்தை மட்டுமே எடுத்துக் கொண்டிருந்தால் சைவம் மாமருந்தாக மாறும் என்பதையும் மறுக்க வேண்டியதில்லை.எது உடலில் மிதமிஞ்சுகிறதோ அது விஷமாகி விடும்.எது பற்றாக்குறையோ அதனை மருந்தாக எடுத்துக் கொள்ள வேண்டியது வரும்.நல்ல ஆரோக்கியமான உடல்நிலையை பெறாத வரையில் தற்போது சைவ உணவுப் பழக்கம் மட்டுமே பராமரிக்கிற பிராமணர்களிடம் தொற்றிக் கொண்டிருக்கிற பிறழ்வை சரி செய்ய இயலாது.அவர்களுக்கு ஆன்மீகமும் கைவசமாகாது.

பொதுவாகவே பிராமணர்களிடம் ஆன்மிகம் குறைவு.மேலோட்டமாக புற விஷயங்களை அவர்கள் தெரிந்து வைத்திருப்பார்களேயன்றி ஆழத்திற்குள் அவர்கள் இறங்குவதில்லை.சிவ வாக்கியனையெல்லாம் அவர்கள் அறிய மாட்டார்கள்.காணியின் கடவுள் சத்தமும் ,வில்லடியின் தெய்வ எழுச்சியும் அவர்கள் அறியாதவை. வேளுக்குடி கிருஷ்ணன் போல ஒரு சிலர் விதி விலக்கு.பிராமணர்கள் தங்கள் பழக்க வழக்கங்களுக்கு வெளியே உலகமே இல்லை என்று அவர்கள் உள்வட்டத்திற்குள் நினைத்துக் கொண்டிருக்கிறார்கள்.வெளியில் கலாச்சாரம் கிடையாது என்று நினைக்கிறார்கள்.தங்கள் ஊருக்கு வெளியில் கலாச்சாரமற்ற விலங்குகள்தான் வாழ்கிறார்கள் என்று இன்னும் பரிதாபகரமாக அவர்கள் நம்பிக் கொண்டிருக்கிறார்கள். படித்த பிராமணர்கள் கூட இவ்வாறு நினைத்துக் கொண்டிருக்கிறார்கள்.அவர்களின் பிறழ்வு முளை விட்டு உதிப்பது இந்த இடத்திலிருந்துதான்.தங்களிடம் இருந்த அனைத்து அதிகாரமும் இறங்கிய பின்னரும் பழக்கத்தை முன்னிட்டு மாயையில் அவர்கள் உழல்கிறார்கள் பாவம்.

எங்கள் ஊரைப் பொறுத்தவரையில் பாரம்பரிய வைத்தியர்களும் ,ஆயுர்வேதிகளும் நிரம்பிய பூமி.எங்கள் குடும்பத்திலேயே ஏராளமான வைத்தியர்கள்.கருவுற்ற பெண்களுக்கு எங்கள் ஊரில் இரண்டு வகையான மருந்துகள் இப்போதும் குடும்பப் பழக்கமாகக் கடைபிடிக்கப்படுகிறது.சைவ உணவுப் பழக்கம் கொண்டவர்கள் எனில் பிரசவத்திற்கு முன்பிருந்தே வைத்தியம் தொடங்கி விடும்.அனைத்துமே அசைவ மருந்துகள்.ஏன் அவர்களுக்கு பிரசவத்திற்கு முன்பிருந்தே வைத்தியம் தொடங்குகிறார்கள் என்றால் அவர்கள் உடல்நிலை பிரசவத்தைத் தாங்கும் சக்தியில் இருப்பதில்லை என்பதே காரணம்.அசைவ உணவுப் பழக்கம் கொண்டவர்களுக்கு பிரசவத்திற்கு பின்னர் வைத்தியம் மேற்கொள்வார்கள்.குடிமிளகு அரைத்துக் குடிக்க வேண்டும்.மீனில் சேர்த்தரைத்து குடிமிளகு குடித்தால் தாய்ப்பால் தானாக இரங்கும்.குழந்தைக்கு பாலை நிறுத்த தாய்மார்கள் படாத பாடுபடுவார்கள்.இரங்கத் தொடங்கியது நில்லாது.பால் கட்டி ஆவேசத்தில் நின்று சுவரில் தண்ணீரைப் பீய்ச்சியடிப்பது போல  தாய்ப்பாலைப் பீய்ச்சியடிக்கிற தாய்மார்களை குழந்தைப் பருவத்தில் எனது இரண்டு கண்களால் பார்த்திருக்கிறேன்.எல்லாமே கடல் மாதாவின் தயவுதான்.அப்படி பால் குடித்து வளருகின்ற குழந்தைகள் எப்படி வளரும் என்பதை யோசித்துப் பாருங்கள்

ஹெச் .ராஜாவிற்கும் தென்திருப்பேரையருகில் ஒரு அய்யனார்தான் குலதெய்வம் .ஆடு வெட்டித் தின்ற அய்யனார்.இப்போது சர்க்கரைப் பொங்கல் வைத்துக் கொடுக்கிறார்கள்.இப்போது அவர் ஒரு சர்க்கரை நோயாளி எண்பது கூட தெரியாமல்.மீண்டும் கிடா அடித்துத் தின்றால் ஊக்கம் பெறுவார். இப்படியெல்லாம் சென்று அவரிடம் போய் உளறினால் வெட்டிப் போடுவார் வெட்டி.

தாடி வைத்தவனெல்லாம் தாகூரும் அல்ல.குங்குமம் வைத்தவன் எல்லாம் இந்துவும் அல்ல.

சுஜாதா பேரில் எனக்குப் பகையொன்றும் இல்லை

சுஜாதா பேரில் எனக்குப் பகையொன்றும் இல்லை

அது போலவே கிளியோ பாட்ரா பேரிலும் எனக்கு விரோதம் கிடையாது.ஒவ்வொரு காலத்திலும் எவ்வளவோ பிரபலங்கள் பிறக்கிறார்கள்.ஒரு காலத்தில் இருந்து மறு காலத்திற்குள் நுழைய முடியாத எவ்வளவோ பிரயாசைகள் இருக்கின்றன.அதனால் அவையெல்லாம் தவறென்றும் இல்லை.கோவி மணிசேகரனும் ,சாண்டில்யனும் ,ராஜேஷ் குமாரும் புதுமைப்பித்தனைக் காட்டிலும் ,மௌனியைக் காட்டிலும் ,சுந்தர ராமசாமியைக் காட்டிலும் தலை சிறந்தவர்களாகக் கூட இருக்கலாம்.ஆனால் இரண்டும் வேறு வேறே .அதுதான் முக்கியமானது.அமிதாப்பச்சன் பிரபலம்தான் அதனால் ரே க்கு என்ன வந்தது ? ஒரு காலத்தில் மஞ்சு வாரியார் மலையாளத்தில் பிரபலம் .அதன் பொருட்டு அரவிந்தனுக்கு என்ன ?

பாலகுமாரனின் ஒரு பத்தியின் அளவிற்கு கூட எழுத வக்கற்ற பலர் தமிழின் தீவிர எழுத்தில் கிடந்தது கத்துவது உண்டு.உண்மை.ஆனால் பாலகுமாரன் அடைய நினைக்கும் இடத்திற்கும்  ,இந்த எழுத முடியாதவன் கொண்டு நடக்கும் இடத்திற்கும் வேறுபாடு அதிகம். கனவும் ஒன்று அல்ல. ஒரே தரத்திலானதும் அல்ல.ஒருமுறை தொண்ணுறுகளில் என்று நினைக்கிறேன்.எதோ ஒரு விருதை நிராகரிக்கும் போது ஜெயமோகன் ஒரு விஷயத்தை வெகுஜனப்படுத்தியிருந்தார்.அந்த விருது கோவி மணிசேகரனுக்கும் ஜெயமோகனுக்கும் சேர்த்து கொடுக்கப்படவிருந்த விருது.ஒரே மொழியில் ,ஒரேவிதமான கருவிகளைக் கொண்டுதான் நானும் எழுதுகிறேன்,கோவி மணிசேகரனும் எழுதுகிறார்  என்பதால் நானும் கோவி மணிசேகரனும் ஒன்று அல்ல என்று கூறி ஜெயமோகன் அந்த விருதை  மறுத்தார்.சுஜாதா வெகுஜன எழுத்திற்கு நல்ல குறியீடு.அதில் பிழையில்லை.அதற்கு எதிரான மனோவிஞ்ஞானத்தையும் ,பயணத்தையும் உள்ளடக்கியது தீவிர எழுத்து.அடைப்படை மனோபாவங்களிலேயே இரண்டும் வேறுபடக் கூடியது.இதன் ஆசையும் அதன் ஆசையும் ஒன்றல்ல.இதன் கதியும் ஒன்றல்ல.

வெகுஜன எழுத்தாளர்களின் பலரது உரைநடைகளில் பிழைகள் குறைவு.மௌனிக்கு உரைநடை வராது.சரிப்படுத்த ஒரு இலக்கியம் தெரிந்தவரின் உதவியும் தேவைப்படுவது அந்த எழுத்து.தீவிர எழுத்தாளர்களின் பலருக்கு வாக்கிய அமைப்புகளை உருவாக்குவதில் ஏராளமான சிக்கல்கள்  .சந்திப் பிழைகளையும் ,எழுத்துப் பிழைகளையும் சரியாக பிரயோகிக்கத் தெரிந்த தமிழ் எழுத்தாளர்கள் கூட குறைவுதான்.ஒருமை பன்மை பிழைகளை வாழ்நாளில் வென்றெடுக்கத் தெரிந்த தமிழ் எழுத்தாளர்கள் கூட குறைவுதான்.பிழை திருத்துனர்களுக்கே கற்றுத் தருமளவிற்கு வித்தை தெரிந்தவர்கள் வெகுஜன எழுத்தாளர்கள்.வித்தகர்கள் எனலாம்.வெகுஜன எழுத்தாளர்களிடம் இருந்து கற்க ஒரு தீவிர எழுத்தாளனுக்கு எப்போதுமே பல விஷயங்கள் இருக்கும்.இருந்து கொண்டே இருக்கும்.ஆனால் ஒரு தீவிர எழுத்தாளனிடமிருந்து கற்க ஒரு வெகுஜன எழுத்தாளனுக்கு எப்போதுமே எதுவுமே இராது.இதுவும் முக்கியமானதொரு வேறுபாடே  .ஆனால் இவன் என்ன சொல்கிறான் என்பது குறித்த அங்கீகார பயம் மட்டுமே இருந்து கொண்டிருக்கும்.என்னைப் பற்றி ராகுல்காந்தி என்ன நினைக்கிறார் என்பது பற்றி எனக்கு ஒருபொருட்டும் கிடையாது.ஆனால் தன்னைப் பற்றி அருந்ததி ராய் என்ன நினைக்கிறார் என்பது ராகுல் காந்திக்கு மட்டுமல்ல.ஷோபா டேக்கும் பொருட்டாக இருக்கலாம்.

வைக்கம் முகம்மது பஷீரும் ,சுஜாதாவும் உண்ட உணவு கூட எதோ ஒரு வகையில் இந்திய தென்னிந்திய வகைபட்டதுதான் என்று முடிவு செய்யப்பட இயலலாம்.ஆனால் இருவரையும் ஒன்றென ஒருபோதும் முடிவு செய்ய இயலாது.ஒன்று ஏற்கனவே இருந்த அகம் உடைந்ததிலிருந்து கட்டியெழும்பியது .அது பெயரிடப்படாத கூட்டான் சோறேயாயினும் கூட .மற்றொன்று ஏற்கனவே இருந்த அகத்திலிருந்து எழுகிற பழஞ்சோறு.

நா.பார்த்தசாரதியின் கால்களின் பளபளப்பின் நளினம் கண்டு வியந்த ஒரு பெண் எழுத்தாளரை பற்றி சுந்தர ராமசாமி ஒருமுறை பேசும் போது அவர் சொல்லியவிதத்திலிருந்து அந்த கால்கள் எப்படியிருந்திருக்கும் என்ற யூகத்தை  சில நிமிடங்கள் வர்ணித்துக் கொண்டிருந்தார்.நா  .பா அவருடைய நண்பரும் கூடத்தான்.ஆனால் நா.பாவின் கால்களுக்கும் நாகராஜனின் கால்களுக்கும் இடைப்பட்ட வேறுபாட்டை துல்லியமாக அறியும் அவர் கண்கள். படைப்பின் கால்கள் அறியாத பாதையைத் துலக்குவதை அறிதலாகக் கொண்டவை என்பதை நா.பா வின் பொற்பாதம் அறியுமா ?

சுஜாதாவைச் சென்று  சேர உருவானதல்ல இந்த  அடியாற்றின் இழுவிசையும்  நவீன இலக்கிய இயக்கமும் .
கால்பாதம் ஒன்றுதான் பாதைகள் வேறு

சமுத்திரம் எவ்வளவு அழகான பெயர் ?
.இந்த பெயரை வைத்துக் கொண்டு ஏன் இவ்வளவு மோசமாக எழுதுகிறீர்கள் என்று சு.சமுத்திரத்தை நோக்கி க.நா.சு ஒருமுறை கேட்டதும் ,சுஜாதா இப்போது நவீன இலக்கியத்தின் பால் கொண்டாடப்படுவதற்கான என்னுடைய விசனமும் பொருளில் ஒன்றுதானே தவிர வேறுபட்டவை அல்ல.

இந்து நாடார்களின் ஊர் நிர்வாகம்

முத்தாரம்மன் கோவில்கள் என்பது இந்து நாடார்களின் ஊர் நிர்வாகம் இந்து நாடார்களின் ஊர் நிர்வாகம் என்னும் மக்கள் அமைப்பு முத்தாரம்மன் கோவில்...