சிறைச்சாலைகள் வதைக்கூடங்களாக இருக்க வேண்டும் என்பவரா நீங்கள் ?

சிறைச்சாலைகள் வதைக்கூடங்களாக இருக்க வேண்டும் என்பவரா நீங்கள் ?

சசிகலா இருக்கும் கர்நாடகா சிறையில் வழக்கமாக நோயுற்ற ,வயதான கைதிகளுக்கு வழங்கப்படுகிற சலுகைகள்தான் சசிகலாவுக்கு வழங்கப்பட்டவை என்று இன்று வெளியாகும் தகவல்கள் பேசுகின்றன.பார்ப்பன அக்ரகாரச் சிறை மேனுவல் சிறை அதிகாரிகளின் அனுமதியோடு நோயுற்றவர்களுக்கும்  ,வயோதிகர்களுக்கும் சில சிறப்பு சலுகைகள் வழங்கலாம் என்று சொல்கிறது.தனியே அடுப்பு வைத்து சமைத்துக் கொள்வது,ஒரு உதவியாளரை நியமித்துக் கொள்வது ,மேஜை செய்தித்தாள்களுக்கான அனுமதி,புத்தகங்களை வருவித்துப் படிப்பதற்கான அனுமதி ஆகியவை சிறை மேனுவலில் குறிப்பிடப்பட்டிருக்கின்றன.சசிகலா பெற்று வந்த சலுகைகள் சிறை மேனுவலுக்கு உட்பட்டவையே தவிர சட்ட திட்டங்களுக்குப் புறம்பானவை அல்ல.நமக்கு பொதுவாகவே அதிக பட்ச புனித பிம்பங்கள் தேவைப்படுவது போலவே அதிக பட்ச வில்லன் கதா பாத்திரங்களுக்கும் தேவையாக இருக்கின்றன.இந்த  இரண்டிற்கும் இடைப்பட்ட  வாழ்வை நம்மால் எதிர்கொள்ள முடிவதில்லை.நோயுற்ற குரங்கை மனநோயாளி பாதுகாப்பது போல இந்த நிலவரத்தை மனக் கோணல் அதிகாரிகள், ஊடகங்கள் சமமாக பங்கிட்டுக் கொள்கின்றன.

சிறைகள் பற்றிய நமது பொதுமனச் சித்திரம் அறுநூறு ஆண்டுகளுக்குப் பழமையானது.சாதாரணமான மனிதர்களுக்குரிய அத்தனை உரிமைகளும் கைதிகளுக்கும் பொதுவானவைதான்.பொதுச் சமூகத்திற்கு அச்சுறுத்தலாக இருக்கிறார்கள் என்பதால் மட்டும்தான் அவர்கள் தனித்து வைக்கப்படுகிறார்களே அன்றி அவர்களின் மனித உரிமைகள் எதையும் அப்புறப்படுத்துவதற்கான நியாயங்கள் கொண்ட அமைப்புகள் உலகில் எங்குமே கிடையாது.இந்திய சிறைகள் இன்னும் பலவிதங்களில் தங்களை மேம்படுத்திக் கொள்ள வேண்டிய நிலையில் இருப்பவை.சிறைகள் கடினமாக இருக்க வேண்டும் என்னும் எண்ணம் எதிரிகள் வதை   செய்யப்பட வேண்டியவர்கள் என்னும் எண்ணத்திலிருந்து கருக்கொள்ளக் கூடியது.

1998  வாக்கில் என நினைக்கிறேன் சிறைகளில் தொலைக்காட்சிப் பெட்டிகள் வைக்கத் தொடங்கியிருந்த காலம்.தினமலர் நாளிதழில்  ஒரு தலையங்கம் எழுதியிருந்தார்கள்."சிறை என்பதே தண்டனையை அனுபவிக்கத் தானே ? இவர்களுக்கு இரவு பனிரெண்டு மணிவரையில் தொலைக்காட்சி பார்க்க வேண்டுமாம் "என்று .இது மன்னர்கால மனோபாவத்தை பிரதிபலிக்கின்ற கண்ணோட்டம் .தொடர்ந்து தினமலர் போன்ற இதழ்களை வாசிப்பவர்களுக்கென்றே சில உடல் உபாதைகளும் மன உபாதைகளும் உண்டு.ஒருவர் பேசுகின்ற இரண்டு முதல் வாக்கியங்களைக் கொண்டே அறிமுகமற்ற ஒருவரைக் கூட   தினமலர் வாசகரா என அறிந்து கொள்ள முடியும்.அந்த அளவிற்கு அருதப் பழைய காலத்தின் மனோபாவங்கள் இவை.ஒருவர் கைதியாக அறிவிக்கப்பட்ட நொடியிலிருந்தே அவருக்கான மனித உரிமைகள் கூர்மையடைய வேண்டும் ஒரு நல்ல சமூகத்தில்.குற்றங்கள் பிற்காலங்களில் நியாயங்களாக   மாறிவிடுதலுக்கான அனைத்துவிதமான சந்தர்பங்களையையும் கொண்டவை.

சசிகலாவை ஒரு சராசரியான கைதியாகக் கொண்டே ஒரு கேள்வியைக் கேட்கிறேன்.சசிகலாவை பற்றிய பத்து நொடிக் குறும்படங்கள் கூட சந்தையில் அமோகமாக விற்பனையாகிறது.இரண்டு லட்சம் தொடங்கி ,பத்து லட்சங்கள் வரையில் .இதற்கென குற்றப் பின்னணி கொண்ட கும்பல்கள் ,ஊடகங்கள் தொழில்படுகின்றனர் .இதனைப்பற்றிய செய்தி ; நேற்றைய தமிழ் இந்து நாளிதழில் வெளியிடப்பட்டிருக்கிறது.அவர்களும் ஒருவர் பின்னால் இவ்வாறாக சூதுபடுகிற இழிவில் புகார் ஏதுமில்லாமல்தான் இந்த செய்தியை வெளியிட்டிருக்கிறார்கள். இவையெதுவுமே அரசியல் பின்னணியிலாதவை ,வெள்ளந்தியானவை என நம்புகிறீர்களா ? சசிகலா ஒருவருக்கும் ஆகாதவர் என்றே வைத்துக் கொள்வோம் .ஒரு சிறைக் கைதி சட்டவிரோதமாக குற்றப் பின்னணி கொண்ட கும்பல்களாலும் , ஊடகங்களாலும் இவ்வண்ணம் துரத்தப்படுவது நியாயமானது என்றுதான் நினைக்கிறீர்களா ? சிறைக்குள் இதற்கெல்லாம் எப்படி சட்டபூர்வமான அனுமதிகள் கிடைக்கின்றன ?

இப்போதுதான் இந்திய சிறைகளில் அவலங்கள் தெரியும் என்பது போல இவ்விஷயத்தில் உரக்க குரல் எழுப்புகிற அதிகாரிகளுக்கு வேறு நோக்கங்கள் உண்டு .அவர்கள் புனித பிம்பங்களை முன்வைக்க பயன்படுத்துகிற பிரதி பிம்பங்கள் மிகவும் பயங்கரமானவை.பிசியோதெரபி சிகிழ்ச்சை மருத்துவ உதவி பெறுகிற கைதிகளின் குறும்படங்களை வெளியிட்டு அவர்கள் பரபரப்பு ஏற்படுத்துவதற்கும் பின்னால் அவர்கள் திட்டங்களின் ஆயிரம் கால்கள் கொண்ட சிலந்திப் பூச்சிகள் ஒளிந்திருக்கின்றன.முதல் தகவல் அறிக்கைகளையே உண்மையென்று நம்புகிற மக்கள் மனோபாவமே அவர்கள் ஏறி விளையாட பயன்படுத்துகிற காலிமைதானம்.

ஊழலை மிகைப்படுத்துவதில் உயர்சாதித் தன்மை ஒளிந்திருக்கிறது

ஊழலை  மிகைப்படுத்துவதில் உயர்சாதித் தன்மை ஒளிந்திருக்கிறது

எங்கள் பகுதியைச் சேர்ந்த சட்டமன்ற உறுப்பினர் ஒருவரிடம் பேசிக் கொண்டிருந்த போது ஒருமுறை அவர் பேசிய விஷயம் என்னை வெகுவாகக் கவர்ந்தது .அவரை அவருடைய செயல்களால் எனக்குப் பிடிக்கும் .அவை எதுவும் வெற்றுப் பாசாங்கு வேலைகளாக இருந்ததில்லை.நடைமுறை சார்ந்து அனுபவத்துடன் பேசுபவர்.ஒருமுறை பேருந்து நிலைய வேலை நடைபெற்றுக் கொண்டிருக்கிறது ,அவரும் ஒற்றை ஆளாக வந்து நின்றார்.ஏராளமான ஆழ் துளைகள் மூலம் பேருந்து நிலையத்திற்குள் தண்ணீர் தேங்காமல் இருப்பதற்காக நடைபெற்ற பணி அது.அரைகுறையாக வேலையை செய்து வைத்திருந்தார்கள்.எவ்வளவு ஆழத்திற்கு குழிகள் அமைக்கப்பட வேண்டுமோ ,அந்த அளவு சரியாக அமைக்கப்படவில்லை . அவரிடம் ஒப்பந்தக்காரர் சரியாகத்தான் இருக்கிறது என்று காரணங்களை சொல்லிக் கொண்டே இருந்தார்.ஒரு அளவிற்கு மேல் பொறுமையற்று நானும் கொத்தனாக இருந்து இந்த நிலைக்கு இன்று வந்திருப்பவன்தான் என்று கூறிய அவர் நேரடியாக வேலையில் இறங்கி; எவ்வளவு குறைவான ஆழத்தில் குழிகள் இருக்கின்றன என்று நேரடியாக செய்து காட்டினார்.பின்னர் அத்தனை குழிகளும் மீண்டும் வேலைகள் செய்து சரி செய்யப்பட்டன.

மற்றொரு முறை நண்பர் ஒருவரோடு சந்தித்த போது இப்போதெல்லாம் ஊழல் அதிகமாகிவிட்டது என்கிறார்களே ? நீங்கள் என்ன நினைக்கிறீர்கள் என்று நண்பர் அவரை கேட்டார் .முந்தைய தலைமுறையில் அரசியல்வாதிகள் நாலு தலைமுறைக்கு செலவச்  செழிப்புள்ள குடும்பத்தில் இருந்து வந்தார்கள் ,அவர்கள் காரில் வருவது உங்கள் கண்களை உறுத்தவில்லை .இப்போது நான் முதல் தலைமுறை .நான் வருகிற கார் முழுவதிலும் என்னுடைய முழு உழைப்பின் வியர்வையும் நனைந்திருக்கிறது.ஆனால் இதனைக் காண உங்களுக்குப் பொறுக்கவில்லை.நான் இப்போது இந்த காரில் வருவது உங்கள் கண்களை உறுத்துகிறது .இவன் எப்படி காரில் வரலாம் ,இவன் அப்பன் மண் சுமந்தவன் ,இவன் அம்மை களை பறித்தவள் இவனுக்கு என்ன சொகுசு வேண்டியிருக்கிறது ? என்று நினைக்கிறீர்கள்.இதுதான் அடைப்படை பிரச்சனை என்று பதில் சொன்னார்.ஆனால் அந்த காரிடம் நின்று விசாரித்துப் பாருங்கள் ,நான் ஒருபோதும் நான்கு மணிநேரத்திற்கு அதிகமாக தூங்கியதில்லை என்பது அதற்கு நன்றாகத் தெரியும் என்றார்.சாக்கடை எல்லா இடத்திலும்தான் இருக்கிறது.அதுபோலத்தான் ஊழல்.அத்தனைக்கும் நானா பொறுப்பு ? என்றும் திருப்பிக் கேட்டார்.நான் கடினப்பட்டு சம்பாதித்தவற்றையெல்லாம் அரசியல் இழுத்துக் கொண்டு போகிறது என்பது உங்களுக்கு விளங்காது தம்பி.ஆனால் இதில் எனக்கு சந்தோசம் இருக்கிறது.பத்தாம் வகுப்பே தேறாத எனக்கு இதுதான் ஒரு சமூக அடையாளத்தை ஏற்படுத்தியிருக்கிறது என்று சொல்லி நிறுத்திக் கொண்டார்.அவர் சொல்லியவை அனைத்தும் உண்மை என்பது எனக்குத் தெரியும்.

இங்கே ஊழலை மிகைப் படுத்துபவர்களிடம் நீங்கள் கூர்ந்து கவனித்தால் உயர்சாதித் தன்மை ஒளிந்திருப்பதைக் காண முடியும்.எனக்குத் தெரிந்த வரையில் இந்த தன்மை இல்லாமல் ஊழலைப் பற்றி பேசுகிற மனிதர்கள் மிகக் குறைவு.அப்படியில்லாமல் ஊழலைப் பேசுபவர்கள் அதிகார வெறி நிரம்பியவர்களாக இருக்கிறார்கள்.இதுபோலவேதான் திராவிட இயக்கத்தை முழுமையாக எதிர்ப்பவர்களும் .எனக்கு திராவிட இயக்கம் பேரில் நிறைய பராதுகள் இருக்கின்றன.நான் மதிக்கிற ஒரேயொரு மிகச் சிறந்த முட்டாள் பெரியார் மட்டும் தான்.நான் ஐயப்பன் நடையில் வேண்டுமாயினும் வந்து சத்தியம் அடித்துச் சொல்கிறேன்.ஆனால் நான் வைக்கிற விமர்சனங்களும் ,உயர் சாதித் தன்மையில் நின்று திராவிட இயக்கத்தைக் குறை கூறுகிற குரல்களும் ஒன்று அல்ல.அதிகாரத்தையும் ,அதன் நிமித்தம் பொருளையும் சகல சாதியினருக்கும் ஜனநாயகப்படுத்தியதில் திராவிட இயக்கத்தின் வழி வந்தவர்களுக்கு இணை தமிழ்நாட்டில் கிடையாது.நிறைய போலி செய்திருக்கிறார்கள்.இலக்கியத்தை ,கல்வியை ,அறிவை எல்லாவற்றையும் இவர்களை போன்று போலி செய்த இயக்கமும் கிடையாது.ஆனால் இவர்களை நிராகரிக்க முடியாது.

பிற்படுத்தப்பட்ட ,தலித் சாதிகளை சேர்ந்த தரப்புகள் அரசியல் அதிகாரத்திற்கு வரும்போது பரவலாக வேகமாக இந்த குற்றச்சாட்டை முன்வைக்கிறார்கள்.இது இவர்கள் பெற்று வரும் அதிகாரத்தின் மீதான குற்றச்சாட்டே தவிர ஊழல் மீதான குற்றச்சாட்டு அல்ல.

ஊழல் நீக்கமற நிறைந்திருக்கிறது எல்லா இடங்களிலும்.நமது அமைப்பு ஊழலை மேலாண்மை செய்யவும் பராமரிக்கவும் அதிக பட்ச சாத்தியங்களைக் கொண்டிருக்கிறது.இதில்  பலனடையாதவர்கள் யாருமே இங்கே இருக்கவே முடியாது.நீங்கள் பல சந்தர்ப்பங்களில் உயிர் பிழைத்து வெளியேற இந்த சாக்கடை பாதைகளே உதவி செய்கின்றன என்பது மறுக்கயிலா உண்மை .  பிரிட்டிஷ் காரனிடமிருந்து அப்படியே இந்த ஊழல் அமைப்பை இறக்குமதி செய்திருக்கிறோம்.நாம் எல்லோருக்குமே இதில் பங்கும் பொறுப்பும் இருக்கிறது.இந்த அமைப்பின்   முன்பாக பகுதி நேர்மையாக ஒருவர் இருப்பது மட்டும்தான் சாத்தியம்.நீங்கள் வெறுமனே பழி வாங்கப்படுகிறீர்கள் என வைத்துக் கொள்வோம் .ஊழல் மூலமாகத்தான் நீங்கள் தப்பித்து வெளியில் வர முடியும்.

அரசியல் என்பது கோடி நுண் துளை கண்கள் கொண்டதொரு மகாமிருகம் . நீங்கள் இங்கே  வேறு யாரேனும் ஒருவரின் குரலில் பேசிக் கொண்டிருப்பதற்கும் கூட வாய்ப்புகள் உண்டு.இனிக்கின்ற அனைத்திற்கும் இனிப்புதான் சுபாவமென்று சொல்லவே முடியாது.

அப்பைய்யா இந்திரா காந்தியை காட்டித் தந்தார்

அப்பைய்யா இந்திரா காந்தியை காட்டித் தந்தார்

நான் சொல்வது எழுபத்தைந்து அல்லது எழுபத்தாறாக இருக்கலாம்.கடைசி தம்பி பிறந்து நாகர்கோவில் கோபால பிள்ளை மருத்துவமனையில் இருந்தான்.எங்கள் ஊருக்கும் நாகர்கோவிலுக்கும் ஒன்பது கிலோமீட்டர் தூரம்தான் இடைவெளி .அப்பைய்யா அப்பம்மையுடன் சென்று காண்பதற்காக நாங்கள் குழந்தைகள் கிளம்பிக் கொண்டிருந்தோம்.அப்பைய்யா வெளியூர்களுக்கு செல்ல வேண்டுமெனில் ஏகதேசம் வெளிநாடுகளுக்குச் செல்வது போல கிளம்புவார்.அப்போதெல்லாம் நாகர்கோவிலுக்குச் செல்வது கூட தொலைதூரத்திற்குச் செல்வதை போன்றதுதான்.அப்பைய்யா குளிப்பது வரையில் சாதாரணமாக இருப்பார்.குளித்து முடித்து விட்டார் எனில் மிகவும் துருசமாக நடந்து கொள்வார்.அப்பைய்யா என்று நான் குறிப்பிடுவது என்னுடைய அப்பாவின் தகப்பனாரை .அதாவது தாத்தா .அவர் பெயர் ஆதி நாராயணன் நாடார்.அப்பம்மை என சொல்வது பாட்டி சீதா லட்சுமியை .
தாத்தா , பாட்டியை எங்கள் குடும்பத்தில் அப்பைய்யா ,அப்பம்மை என பேரக் குழந்தைகள் அழைப்பதே வழக்கம்.

சிறுவயது சிற்றூருக்கு என் வயதில் மிகப் பெரிய நிதானம் இருந்தது.பர பிரம்மம் சதா நிறைந்திருந்த ஊர் .சாலை கிழக்கிலிருந்து மேற்கு நோக்கிச் செல்லும் .தெற்குப் பக்கம் கிழக்கு நோக்கி வீடு. வேலியை தாண்டியதும் சில செந்தெங்குகள் ,அழகிய கிணறு தாண்டிச் செல்ல விரிந்த களம்.இசைக் கோலம் நிரம்பிய பகுதி இது.தூரத்தில்  கடலடி சத்தமும் கேட்கலாம். இந்த ஊருக்கென்றே இருந்த நிதானம் அப்பைய்யாவின் உடலிலும் இருந்தது.அவர் படுத்துறங்கும் நார் கட்டில்  தலை வைக்கும் இடம் சற்று வளைந்து உயர்ந்தது .சிறுவயதில் குழந்தைகள் அந்த கட்டிலில் புரள்வோம்.போர்வைகளில் அப்பைய்யாவின் நறுமணம் இருக்கும்.அது விஷேசமானதொரு நறுமணம் .அந்த சிற்றூரின் காட்டு நறுமணம் அது.அவர் கட்டில் மிகவும் தண்மையானது .

அப்பைய்யா அன்று சட்டையும் அணிந்தார்.பொதுவாக அவர் சட்டை அணிவதில்லை.வேட்டி ,தலை முண்டு ,முனை வளைந்த நீளமான  குடை இவைதான் அவர் ஆடைகள் .அவர் சட்டை அணிவது மிகவும் விஷேசம்.அவர் அன்றிருந்த பரவசத்தைக் குறிக்கிற விஷயம் அது.அப்பம்மையும் விஷேசமாகத்தான் கிளம்பியிருந்தாள்.

நாங்கள் நெடுநேரம் பேரூந்துக்காகக் காத்திருந்தது நினைவிருக்கிறது.எங்கள் ஊருக்கு ஒரு  பென்ஸ் பேருந்து மட்டுமே அப்போது உண்டு.ஒரு மணிநேரத்திற்கு ஒருமுறை ஊருக்கு வரும்.வந்து திரும்பும்.

நாங்கள் கிளம்பிச் சென்ற அன்றுதான் இந்திராகாந்தியும் நாகர்கோவிலுக்கு வருகிறார் என்பதை நாங்கள் அறிந்திருக்கவில்லை.வேப்பமூடு சந்திப்பில் இறங்கி எஸ்.எல்.பி மைதானம் கடந்து கோபால பிள்ளை மருத்துவமனைக்கு நாங்கள் செல்ல வேண்டும்.ஜனக் கூட்டம்.இவ்வளவு பேர் இங்கே இருக்கிறார்கள் என்பதை எனது அப்பைய்யா அன்றுதான் பார்த்திருப்பார்.வேப்பமூடு சந்திப்பிலிருந்தே வரிசை .மெல்ல மெல்ல நகர்ந்து எஸ்.எல்.பி வாயிலை வந்தடையும் போது திறந்த ஜீப்பில்  இந்திராகாந்தி வெளியே வந்து கொண்டிருந்தார் .ஒரு மலர் மாலையை எடுத்து அவர் கூட்டத்தின் நடுவில் வீசினார் .மக்கள் பரப்பிரம்ம லகரியில் லயித்து நின்றார்கள்.உண்மையில் தாத்தாவிற்கு அவர்தான் இந்திராகாந்தி என்பது  தெரிந்திருக்கவே இல்லை .தெரிந்திருக்க வேண்டிய அவசியமும் அவருக்கு அன்று இல்லை.பக்கத்தில் இருந்த ஒருவர் எனது கையை பற்றி இந்திராகாந்தி என்று பரவசப்படுத்தினார் .நானந்த  பேரழகிக்கு டாட்டா காட்டினேன் .

கமல் ஹாசனுக்கு உண்மையாகவே அரசியல் தெரியவில்லை.

கமல் ஹாசனுக்கு உண்மையாகவே அரசியல் தெரியவில்லை.

முழுதும் கற்பனையான தளத்திலிருந்து கான்வென்ட் குழந்தைகளின் அரசியல் பேசுகிறார் கமல் ஹாசன் .இங்குள்ள கள நிலவரத்திற்கும் அவர் பேசுகிற அரசியலுக்கும் தொடர்பில்லை.இந்த இடத்தில்தான் அ.தி.மு.க அமைச்சர்களோடு அவருக்கு முரண்பாடு ஏற்படுகிறது.கழிந்த ஜெயலலிதா தலைமையிலான அ.தி.மு.க ஆட்சியைக் காட்டிலும் ,அதற்கும் முந்தைய கருணாநிதி தலைமையிலான தி.மு.க ஆட்சியை காட்டிலும் ஊழல் எடப்பாடி கே.பழனிச்சாமி தலைமையிலான அ.தி.மு.க ஆட்சியில் குறைவு என்பதே உண்மை.இந்த ஆட்சியில் இருப்பவர்கள் ஆட்சியில் இருப்பதற்கே   வாயிலும் வயிற்றிலும் அடித்துக் கொண்டு சதா போதத்தோடு இருந்தாக வேண்டிய சூழ்நிலையில் இருக்கிறார்கள்.ஊழலை பொறுத்தவரையில் கடந்த இரண்டு ஆட்சிகளை விட இப்போது சிறப்பு என்றுதான் சொல்ல வேண்டும்.ஆனால் இந்த உண்மைக்கு புறம்பாக கற்பனையான, யார் மீது வேண்டுமாயினும் சுமத்த தக்க  ,உயர் வர்க்க மிகை புகார்களை ; இந்த ஆட்சியின் மீது சொல்லும் போதுதான் பிரச்சனையாகிறது."நாங்களே பட்டினியில் இருக்கிறோம். நீ எங்களை ஸ்டார் கோட்டால் சாப்பாடு என்பாயா ? "என்கிற விதத்தில் அமைச்சர்கள் எதிர்வினையாற்றுகிறார்கள்.கமல் ஹாசனின் இத்தகைய நடத்தையை கிரண்பேடி போன்றோரின் எலைட் அப்பாவித்தனத்துடன் ஒப்பிடலாம்.இந்த அப்பாவித்தனத்தினுள் ஒளிந்திருப்பது வெற்று அதிகாரத் திமிர் கொண்டதொரு வேட்கை மிருகம் .

பொதுவாக எல்லாம் கேட்டு விட்டது ,ஊழல் மலிந்து விட்டது என்பது போன்ற பொது புகார்களை சொல்பவர்கள் ,அது யாருக்குப் பொருந்துகிறது என்பதை அறிந்து பேசுவதில்லை.கமலிடம் வெளிப்படுவது இது போன்றதொரு அப்பாவித்தனம்தான்.ஆசிரியர்கள் பணியிட மாற்றத்திற்கு இவ்வளவு,உதவி காவல் ஆய்வாளர் பதவிக்கு இவ்வளவு,பொதுப்பணித்துறை ஒப்பந்தங்களில் கட்சிக்கு இவ்வளவு என வரையறுத்து எம்.ஆர்.பி .விலையில் ஊழல் கருணாநிதியின் ஆட்சியில் தொடங்கப்பட்டு,ஜெயலலிதா காலத்தில் விலையில் மேற்படி மாற்றம் செய்யப்பட்டது.இது ஒருபுறம் எனில் சமூகத்தில் பொது புகாருக்கு உள்ளாக்கப்படும் பல விஷயங்கள் தேவைகளின் அடிப்படையில் வாழ்பவை .  ஊழலால் மக்கள் பாதிக்கப்படுகிறார்களா என்றால் உண்மைதான் பாதிக்கப்படுகிறார்கள் .ஆனால் அதனைக் காட்டிலும் அதிகமான அளவிற்கு பாதுகாக்கவும் படுகிறார்கள்.அதனால்தான் ஊழலின் இருப்பு சாத்தியமாகிறது.ஊழல் உள்ள அரசாங்கத்தைக் காட்டிலும் ஊழலற்ற அரசு கொடூரமானது என்கிறார் சாம்ஸ்கி.இதே எண்ணம் அமர்த்திய சென் போன்றோருக்கும் ஏகதேசம் இருக்கிறது.

இங்கே நீங்கள் ஒரு குற்றச்சாட்டை ஒருவர் மீது முன்வைக்கும் போது அது அவருக்குப் பொருந்துகிற வண்ணம் சொல்ல வேண்டும் ."இப்போதைய அ.தி.மு.க அரசு பா.ஜ. கவின் எடுபிடி அரசு என்று "ஒரு குற்றச்சாட்டை முன்வைத்தால் இருநூறு சாதமானம் அது பொருந்துகிற குற்றச்சாட்டு .அதனைச் சொல்லும் திராணி கமல் ஹாசனுக்கு ஒருபோதும் வராது.இது போன்ற கிளிப்பிள்ளை புகார்களை வேண்டுமாயின் அவர் வாழ்நாள் முழுதும் தெரிவித்துக் கொண்டே இருக்கலாம்.அதனால்தான் அவருக்கு அரசியல் தெரியவில்லை என்கிறேன்.

பொருந்தா புகார்களை தெரிவிப்பது என்பது நமது மக்கள் மத்தியில் குற்றத்தைக் காட்டிலும் அதிக வெறுப்பிற்கு உரியது.இதனை எவ்வாறு ?
என்று கமல் புரிந்து கொள்ள வேண்டுமெனில் , அவர் மீண்டும் குழந்தை பருவத்திலிருந்தே தவழ்ந்துதான் வந்தாக வேண்டும் பாவம் .

குண்டர்கள் மீது குண்டர் தடுப்பு சட்டம் பாய்வதே கூட தவறு எஜமானர்களே

குண்டர்கள் மீது குண்டர் தடுப்பு சட்டம் பாய்வதே கூட தவறு எஜமானர்களே



வளர்மதி குண்டர் தடுப்பு சட்டத்தில் கைது செய்யப்பட்டிருப்பது தொடர்பாக மூன்று நாள்களாக எழுத நினைத்து இயலாத மனநிலை .இது முற்றிலும் தவறானது என்பதை இங்கே புரியச் செய்வதில் ஒருவிதமான கடுமை சூழ்ந்திருப்பது தெரிகிறது.நமது கூட்டான மனநிலைகள் அசாதாரணமாக மாறிவருவதாக தொடர்ந்து உணர்ந்து வருகிறேன்.வளர்மதியின் அரசியல் பின்னணி காரணமாகவோ அல்லது அவருடையது போன்ற அதிருப்தி அரசியலின் உள்நோக்கங்கள் புரியாமலோ இதனை நான் சொல்லவில்லை.வழக்கமாக குண்டர்கள் மீது இவ்வழக்கைப் போடுவதே கூட சட்டத்திற்குப் புறம்பான செயல்.அந்த சட்டம் முறைப்படியான சட்டம் அல்ல.மனித உரிமைகளின் மாண்பைக் குலைக்கிற ,மனித உரிமைகளில் அளவிற்கு அதிகமாக அத்துமீறுகிற ஒரு சட்டம். அப்படியிருக்கும் போது இதுபோல மாணவர்கள்,அரசியல் இயக்கங்களில் உள்ளவர்கள் எதிரிகள் எல்லோர் மீதும் இதனை பிரயோகப்படுத்தலாம் என அரசு நினைப்பது மிகவும் ஆபாசமானது.முதலமைச்சர் இந்த வழக்கு பற்றி பேசிய விதம் மிகவும் அருவருப்பானது.அரசாங்கம் ஒருவிதமான காண்டாமிருகத் தன்மையை அடைந்து வருவதையே இச்செயல்கள் உணர்த்துகின்றன.இதனை கூட்டு மனங்களுக்கு புரியச் செய்வதில் ஏற்படுகிற இடர்பாடுகள் அவையும் காண்டாமிருகத்துடன் இணைந்திருப்பதையே சுட்டிக் காட்டுகின்றன .

காண்டாமிருகம் நாடகம் படித்தவர்களுக்கு தெரிந்திருக்கும் .அது ஒரு ஜெர்மன் நாடகம்.க்ரியா வெளியிட்டிருக்கும் முக்கியமான மொழிபெயர்ப்பு நாடகங்களில் ஒன்று அது.அந்த நாடகத்தில் இங்கே எல்லோரும் காண்டாமிருகமாக மாறிக் கொண்டிருக்கிறார்கள் என்று ஒருவன் கத்திக் கொண்டே ஓடுவான்.அவன் அப்படியோடிக் கொண்டிருக்கும் போதே அவனுடைய கரங்கள் காண்டாமிருகமாக மாறிக் கொண்டிருப்பதனையும் அவன் பார்ப்பான்.இதுவொரு குறியீடுதான்.ஆனால் சர்வாதிகாரத்தை நோக்கி அரசு வேகமாக நகருவதை உணர்த்துகிற குறியீடு அது.திருமுருகன் காந்தி ,வளர்மதி போன்றோரின் அரசியல் பின்னணிகள் பேரில் எனக்கு கிஞ்சித்தும் மதிப்பில்லை. ஆனால் இவர்களை குண்டர் தடுப்பு சட்டத்தில் கைது செய்து ஒடுக்குவது என்பது மகா கேவலமான வழிமுறை.அதிலும் முதலமைச்சர் போராட்டங்களை தூண்டினால் இதுபோல செய்யத்தான் செய்வோம் என சூழுரைப்பது சட்டம் அறியாத ஆபாசமான நிலை.ஜனநாயக நெறிமுறைகளுக்கு எதிரானது.ஊர் நாட்டாமை முழக்கம். மோதல் கொலைகளை ஒரு முதலமைச்சர் நியாயம் செய்து பேசுவதற்கு ஒப்பானது , இது போன்ற குண்டர் தடுப்பு கைதுகளை நியாயம் செய்வது.போராட்டங்களை சட்டவிரோதமாக ஒடுக்கி வெற்றியை நிலைநாட்டுவதல்ல அரசாங்கத்தின் வேலை.

போலீசார் கூட்டமெனில் அரசியல் பேசுவீர்களா ? மோடிக்கு எதிராகப் பேசுவார்களா ? என்றெல்லாம் இப்போது கேள்விகள் எழுப்புகிறார்கள்.நாங்கள் என்ன பேச வேண்டும் ? எதனைப் பேசக் கூடாது என்பதை முடிவு செய்யும் வேலையை இப்போது புதிதாக போலீசாரிடம் பணித்திருக்கிறோமா என்ன ? இங்கே என்ன நடைபெற்றுக் கொண்டிருக்கிறது என்பது சரியாக விளங்கவில்லை.ஆனால் ஏதோ தொடர்ந்து தவறாக நடைபெற்றுக் கொண்டே இருக்கிறது என்பது மட்டும் உறைக்கிறது. நடைபெறுகிற இத்தகைய அரச செயல்கள் மிகவும் ஆபத்தானவை. மனித உரிமைகளுக்கு குந்தகம் விளைவிப்பவை.

தமிழ் ,மலையாள கவிஞர்கள் சந்திப்பு

தமிழ் ,மலையாள கவிஞர்கள் சந்திப்பு

இடம் :
லெனின் பாலவாடி,வழுதக்காடு, திருவனந்தபுரம்-14
16.07. 2017 ஞாயிறு காலை 9.30

தமிழ்,மலையாள கவிஞர்கள் சந்திப்பு முதற்கட்டமாக நாளை திருவனந்தபுரத்தில் நடைபெற உள்ளது.தமிழில் இருந்து ஆறு கவிஞர்களும் , மலையாளத்தில் இருந்து ஒன்பது கவிஞர்களும் இந்த நிகழ்வில் பங்கேற்கிறார்கள்.மூன்று மாதங்களுக்குப் பின்னர் மீண்டும் இதன் அடுத்த கட்ட சந்திப்பு நடைபெறும்.

வெறும் ஸம்ப்ரதாயமானதொரு நிகழ்வாக அல்லாமல்,தமிழ் கவிதைகளை மலையாள மொழியிலும் ,மலையாள கவிதைகளை தமிழுக்கும் இந்த சந்திப்புகள் கொண்டு செலுத்தும்.இரண்டு மொழிகளின் இந்த பரிவர்த்தனை இரண்டு மொழிகளின் வளத்திற்கும் புதிய ஊட்டம் சேர்க்கும்.மலையாள கவிஞர்கள் இதில் பெரிய ஆர்வம் கொண்டிருக்கிறார்கள்.நாமும் நமதார்வம் கொள்வோம்.

இந்த சந்திப்பின் கவிதைகளும் இரண்டு மொழிகளிலும் மொழிபெயர்ப்பாக உள்ளன.ஓராண்டு காலத்திற்குள் தமிழின் இயங்கிக் கொண்டிருக்கும்  எந்த கவிஞனும் விடுபட்டு விடாத வண்ணம் இந்த சந்திப்புகளில் இடம்பெறச் செய்து விட வேண்டும் என்கிற முனைப்பு எனக்கு உண்டு.அதுபோலவே இதுவரையிலான தமிழ்,மலையாள பரிவர்த்தனை நிகழ்வுகளில் இருந்த குழு மனப்பான்மையைக் கொண்டிருக்கக் கூடாது என்பதில் இரு மொழி தரப்பினருக்கும் இப்போது அதிகமான கவனத்துடன் இருக்கிறோம்.

கவிதை பற்றிய உரையாடல்கள்,மொழிபெயர்ப்பு முயற்சிகள் என்பதாக இந்த சந்திப்புகள் அமையும்.

நாளைய நிகழ்வில் பங்குபெறுகிற கவிஞர்கள்

தமிழ் கவிஞர்கள்
________________
லக்ஷ்மி மணிவண்ணன்
ஜி.எஸ்.தயாளன்
நட.சிவகுமார்
சுதந்திரவல்லி
ரோஸ் ஆன்றா
ராஜன் ஆத்தியப்பன்


மலையாள கவிஞர்கள்
______________________
ஸ்ரீதேவி எஸ்.கர்த்தா
விஜிலா
களத்தர கோபன்
ஏசுதாஸ் டி
அனில்குமார் டி
பி.ஒய் .பாலன்
வி.எஸ்.ராஜிவ்
ஜார்ஜ்
சந்திரமோகன்.எஸ்

நிகழ்ச்சி ஏற்பாடு - Triva Contemporary

தமிழ்நாட்டு மாணவர்கள் பேரில் நீதிமன்றம் போர் தொடுக்கிறது


  • தமிழ்நாட்டு மாணவர்கள் பேரில் நீதிமன்றம் போர் தொடுக்கிறது
NEET -
தமிழ்நாட்டு மாணவர்கள் பேரில் நீதிமன்றம் போர் தொடுக்கிறது
இப்போதைய கெடுபிடிகள் கல்வியில் நீடித்தால்; இப்போது நடைபெற்று வருகிற காரியங்களின் எதிர்விளைவு அறியப்படுவதற்கு இன்னும் ஐந்தாறு வருடங்கள் ஆகும் . தமிழ்நாட்டில் உள்ள அனைத்து மருத்துவக் கல்லூரிகளிலும் வெளி மாநில மாணவர்கள் ஆக்ரமித்து இங்குள்ள மாணவர்கள் விறுதே இருக்க வேண்டிய நிலை ஏற்பட்டால் அப்போதுதான் இப்போதைய கெடுபிடிகள் என்ன ,வேதனை என்ன ? என்பது விளங்கும்.குஜராத் போன்ற மாநிலங்களில் ஆறோ,ஏழோ மருத்துவக் கல்லூரிகளே உள்ளன.மொத்தமாகப் பார்த்தால் 600 இடங்கள் வரும்.ஆனால் தமிழ் நாட்டின் நிலை அதுவல்ல.சுமார் 4000 இடங்களை இழக்கும்.
அகில இந்திய தேர்வுகள் என்பவை எளிமையாகச் சொன்னால் பணக்காரர்களுக்குரியவை.ஆறேழு ஆண்டுகள் பத்து லட்சத்திற்கும் அதிகமான பணம் செலவழித்து பயிற்சி மையங்களில் எட்டாம் வகுப்பு நிலையில் இருந்தே பயிற்சியை தொடங்குபவர்களுக்குரியது.அவை அனைத்துமே நகரங்கள்,பெரு நகரங்கள் சார்ந்த பயிற்சி மையங்கள்.நேரடியாக பயிற்சி மையங்களின் துணையின்றி இந்த தேர்வுகளில் பங்கேற்கிற திறன் வாய்ந்த மாணவர்களால் அகில இந்திய தேர்வுகளில் எழுபது சதமானம் தொடங்கி எண்பது சதமானம் வரையிலே மதிப்பெண்கள் பெற முடியும்.உண்மையில் இந்த மாணவர்களே திறன் வாய்ந்தவர்கள்.ஆனால் இந்த தேர்வுகளின் வழியே இவர்கள் நிராகரிக்கப்பட்டு விடுவார்கள்.பதிலாக பயிற்சி மையங்களில் பணம் செலவு செய்கிற மாணவர்களுக்கு அனைத்து கதவுகளும் திறக்கப்பட்டிருக்கும்.அவர்கள் இந்த வழியிலும் செல்லலாம் இல்லையெனில் அவர்களுக்கு தனியார் கல்லூரிகளிலும் இடம் திறந்தே இருக்கும்.இத்தகைய தேர்வுகள் மூலம் அரசாங்கம் திறன் வாய்ந்த ஏழை மாணவர்களை நிராகரிக்கும்.இது முழுக்க முழுக்க வர்க்கம் சம்பந்தப்பட்ட பிரச்சனை.ஏழை மாணவர்களை எங்கும் அண்ட விடக்கூடாது என்பதன் சூழ்ச்சிகளே இந்த தேர்வுகள்.இந்த தேர்வுகளின் பலன் தெரிந்தோருக்கு இதனை விளங்குவதில் சிரமம் இருக்காது.
உதாரணமாக ஜிப்மர் அகில இந்திய தேர்வை எடுத்துக் கொள்ளுங்கள்.99 சதமானம் அதற்கும் மேல் மதிப்பெண் பெற்றுத் தேறுகிறவர்களே 3000 த்துக்கும் அதிகமாக வருகிறார்கள். இவர்கள் அனைவருமே பயிற்சி மையங்களில் இருந்து வருகிறவர்கள்.ஜிப்மரில் உள்ள இடங்கள் மொத்தம் 200 .இந்த மூவாயிரத்தில் பிறப்படுத்தப்பட்ட ,மிகவும் பிற்படுத்தப்பட்ட ,தலித் மாணவர்களும் அடக்கம்.நேரடியாக இந்த தேர்வுகளில் கலந்து கொள்கிற திறன் வாய்ந்த மாணவர்களால் இங்கும் எழுபது சதமானத்திலிருந்து, எண்பது சதமானம் வரையில் மட்டுமே மதிப்பெண் பெறமுடியும்.அப்படியானால் இந்த தேர்வுகள் அப்பட்டமாக ஏழை மாணவர்களுக்கு எதிரானவை என்பது விளங்குகிறதா ? ஏழைகளை வடிகட்டி விடுவதுதான் அரசாங்கத்தின் தற்போதைய நோக்கம்.இது மீண்டும் நம்மை பழைய கால முறைகளை நோக்கி நகர்த்த துடிப்பவை.
இத்தகைய தேர்வுச் சூழல்கள் ஏற்படாதவரையில் ஒரு கிராமத்தில் இருக்கும் ஏழை மாணவனுக்கும் உயர் தொழிநுட்ப படிப்புகளிலும்,மருத்துவம் போன்ற படிப்புகளிலும் பயின்று சமநிலை நோக்கி முன்னேறி விட முடியும் வாய்ப்பு இருந்தது.அந்த வாய்ப்பை பலவந்தமாக அவனிடமிருந்து பறிப்பதற்கு இப்போதைய அராசாங்கங்கள் முயல்கின்றன.இந்த சதி இன்னும் பலருக்கும் விளங்கவில்லை .பல உயர் படிப்புகள் ஏழை மாணவர்கள் எட்டித் தொடவே முடியாத விலைகளில் தனியார் நிறுவனங்களின் வசம் நேரடியாக மத்திய அரசாங்கத்தால் ஒப்படைக்கப்பட்டு வருகின்றன.இதற்கு தகுதி என்ற மேலங்கி போட்டு மறைத்து விட முடியும் என்று அரசாங்கம் உறுதியாக நம்புகிறது .அதற்கு நீதி மன்றங்கள் உதவி செய்கின்றன.இனி வருங்காலங்களில் ஒரு மாணவன் எந்த கிராமத்தில் எந்த இடத்தில் படிக்கிறான் என்பதை வைத்து அவன் தலைவிதி எப்படியிருக்கும் ? என்பதை என்னைப் போன்ற ஒரு சாதாரணனால் கூட சொல்லிவிட முடியும் என்கிற நிலை நோக்கி நாம் முன்னகர்ந்து கொண்டிருக்கிறோம்.
ஏறக்குறைய ஐம்பதினாயிரம் மாணவர்கள் தமிழ்நாடு அரசின் அறிவிப்பை நம்பி மருத்துவப் படிப்பிற்கு 85 % சதமானம் உள் ஒதுக்கீட்டின் அடிப்படையில் சேர முடியும் என்கிற ஆசையில் விண்ணப்பித்திருக்கிறார்கள்.ஆனால் இந்த மாணவர்கள் அத்தனை பேரின் தார்மீக நியாங்களுக்கும் செவி சாய்க்காது ,உரிமைகள் பற்றிய கவலை இன்றி ஒரு சி.பி.எஸ்.ஈ மாணவனின் மனுவின் அடிப்படையில் நீதிமன்றத்தால் மாநில அரசாங்கத்தின் அரசாணையை தடை செய்து உத்தரவு பிறப்பிக்க முடிகிறதென்றால் நீதிபதிகள் ,நீதி மன்றங்கள் தற்போது அடைந்து வருகிற மேட்டிமை மனோபாவத்தைப் புரிந்து கொள்ளுங்கள்.மாநில அரசாங்கம் இந்த விஷயத்தில் மாநில பாடத்திட்டத்தில் பயின்ற மாணவர்களின் தரப்பு என்கிற நினைவே நீதி மன்றத்திற்கு துளியும் இல்லை
கல்வியை மாநிலங்களின் கையில் இருந்து மத்திய அரசாங்கம் பிடுங்குவதே இந்திய அரசியல் அமைப்புச் சட்டத்திற்கு எதிரான செயல்.அவர்கள் ஏற்றுக் கொண்டிருக்கிறார்கள் இவர்கள் ஒழுகி வருகிறார்கள் என்கிற பிரச்சனை அல்ல.இது.யார் ஒழுகி வந்தாலும்,பழகி வந்தாலும் கல்வியை ,உரிமைகளை வீட்டுக் கொடுக்க வேண்டிய அவசியங்கள் கிடையாது.மத்திய தீவிரவாத தடுப்பு மையத்தை ஜெயலலிதா போன்ற ஒரு சிலர்தான் எதிர்த்தார்கள் .எல்லோரும் ஏற்றுக் கொண்டுவிட்டால் விஷத்தை அப்படியே தின்று விடுவீர்களா என்னா ? கல்வியை முழுவதுமாக மாநில அரசாங்கங்கள் தங்கள் பிடிக்குள் கொண்டுவர வேண்டும்.இந்தியை எதிர்ப்பதெல்லாம் சுலபம்.இவற்றை சாதிப்பதுதான் கடினம்.தமிழ் நாட்டின் சட்ட வல்லுநர்கள் மீண்டும் ஒரு புரட்சி போல முன்னின்று இந்த உரிமைகளை மீட்காவிட்டால் மிகவும் பின்னகர்ந்து போவோம் என்பதில் சந்தேகமே வேண்டாம்.
ஏழைகளின் கரத்தில் இருந்து கல்வி பறிக்கப்படுகிறது.அதற்கு எதிரான போர் ஏழைகளிடமிருந்து தொடங்கபடுதல் காலத்தின் முன் நிற்கும் தேவை.அனைத்தையும் மத்தியில் கொண்டு போய் குவிப்பதற்கு இங்கே தேவையில்லாமல் ஒரு மாநில அரசாங்கம் எதற்கு ?

வினைப்பதிவுதான் அந்த நறுமணம் குன்றா மாலை

வினைப்பதிவுதான் அந்த நறுமணம் குன்றா மாலை

நானொன்றும் புதிதாகச் சொல்வதில்லை

வினையை ஒரு கட்டத்தில் நிறுத்தக் கற்றுக் கொள்ளவேண்டும்.இது மிகவும் எளிமையானது.எல்லா வினைகளும் பதிவாகும்.பதிவு ; நாம் கூறுகிற நியாயங்களைக் காரணங்களை பொருட்படுத்துவதில்லை.அது உள்ளது உள்ளவாறு பதிவாகும்.இப்படித்தான் பதிவாக வேண்டும் என்று நாம் அதன் மீது எந்த செல்வாக்கையும் பயன்படுத்தவே முடியாது.அறிவின் செல்வாக்கையோ,அறத்தின் செல்வாக்கையோ ,செய்த பேருபகாரங்களின் செல்வாக்கையோ,திருப்பணிகளின் செல்வாக்கையோ,அருங்கொடைகளின் செல்வாக்கையோ  எதையுமே அதன் மீது செலுத்த முடியாது.இவற்றின் மூலம் கொஞ்சம் அதன் ஆங்காரம் தணிக்கலாம் அவ்வளவுதான்.வினையை நிறுத்திக் கொள்வோமெனில் அதன் வேகம் தணிந்து பதிவுகள் செல்வாக்கை இழக்கும்.அது புதுத்தன்மை  பெறும்.

வினையை நிறுத்திக்  கொள்ளுதல் என்பதற்கு செயல்பாட்டை நிறுத்திக் கொள்ளுதல் என்று பொருள் கிடையாது.தேவையற்ற வினைகளின் ஓட்டத்தைக் காரியங்களில் இருந்து பொறுப்பை விலக்கிக் கொள்ளுதல் அது.அதன் மூலம் தேவையான காரியங்களின் செயல் ஓர்மைக்குள் வரும்.தேவையான செயல்கள் துரிதமாகும்.

நாம் பொதுவாகவே தேவையற்ற அனைத்திற்கும் பொறுப்பேற்று எதிர்வினை செய்து கொண்டேயிருப்பவர்கள்.தன் முனைப்பும் ,அங்காரமும் தணியும் போது இந்த குணங்கள் அடங்கும். நான்  பெருவாரியான எனது காலங்களை  தேவையற்ற காரியங்களுக்கு பொறுப்பேற்றுக் கொள்வதிலேயே விரயம் செய்தவன்.தெருவில் இருவர் கட்டிப் பிடித்து உருண்டு கொண்டிருந்தால்  நின்று விடுவேன்.நமக்கு இதில் ஏதேனும் பொறுப்பு உண்டா ? என்று கேட்டுக் கொள்வதே இல்லை.பொறுப்பு உண்டா இல்லையா  என்பதை எப்படியறிவது ? நடக்கும் காரியத்தை மேம்படுத்துவதற்கு அந்த சந்தர்ப்பத்தில் நம்மிடம் ஒரு காரியம் கைவசம் இருக்கிறது என்றால் நிச்சயமாக கடந்து செல்லக் கூடாது.அப்படியில்லையெனில் அங்கே நிற்கவே கூடாது.விஷயம் இவ்வளவுதான்.நாம் நிற்பதன் மூலம் நடக்கும் காரியம் மேலும் சுருள்வதற்கே வாய்ப்பிருக்கிறது என்றால் திரும்பியே பார்க்கக் கூடாது,போய்விட வேண்டும்.ஒரு விபத்து .நீங்கள் நின்றால் நிச்சயம் பலனுண்டு என்றால் கடந்து சென்றால் பாவம்.அதே சமயம் அங்கே ஏற்கனவே இருக்கிறவர்கள் பார்த்துக் கொள்வார்கள் என்னும் நிலை இருக்கும் போது சென்று மூக்கை நுழைக்கக் கூடாது.எல்லா விஷயங்களிலும் போய்   சிக்கிக் கொள்வதென்பது நமது அகங்காரத்தால் விளைவது.நேடிக் கொள்வது.எந்தெந்த செயல்களில் நமது மனநிறைவும் மகிழ்ச்சியும் அதிகமாகிறதோ அவையே  உரிய செயல்கள்.மன நிறைவு தருகிற மகிழ்ச்சியே மகிழ்ச்சி.

இந்த உரிய செயல்கள் ஒருவருக்கு ஒருவர் மாறுபடும்.ஏனெனில் மன நிறைவுக்கு பல்வேறு மாறுவேடங்கள் உண்டு.ஒருவரிடம் இருப்பது போல  மற்றொருவரிடம் இருக்காது.ஒருவருக்கு காய்கறி நறுக்கினாலே மன நிறைவு ஏற்பட்டு விடும்.மற்றொருவருக்கோ கடலில்  இறங்கி முதலைகளுடன் சண்டையிட  வேண்டியிருக்கும் .மன நிறைவு என்பது  அகத்தில் ஏற்கனவே ஏற்பட்டிருக்கும் பள்ளங்களை பொறுத்த விஷயம். எனவே எந்த நீதி போதனைகளுக்கும் இவ்விஷயத்தில் இடமில்லை.மாதிரிகள்  இல்லை.இதனைச் செய்தால் எல்லோரும் மன நிறைவோடு இருப்பார்கள் என்று சொல்லத் தகுந்த காரியங்கள் எதுவுமே இன்னும் கண்டுபிடிக்கப் படவில்லை.ஒருவர் செய்ய விரும்பாத  காரியத்தை மற்றொருவர் செய்வதால்  அவருக்கு மன நிறைவு உண்டாகலாம்.எனவேதான்  பகவான் குற்றங்களை பார்ப்பதில்லை,குணத்தை மட்டுமே பார்க்கிறான் என்றோரு வாக்கியம் கீதையில் வருகிறது.இந்த வாக்கியம் நான் சொல்லி வருகிற செய்தியோடு முரண்படுவது போல தோன்றலாம் .நீங்கள் உங்களுக்கு மன நிறைவு தருகிற விஷயங்களோடு ஒப்பிட்டுப் பார்த்தால் இதில் முரண்பாடு இல்லை என்பது விளங்கி விடும்.ஒரு கணத்தில் கொலை செய்த்து விட்டு வாழ்க்கை முழுவதும் திருங்கத் திருங்க விழித்துக் கொண்டிருப்பவர்கள் இருப்பார்கள்.உண்மையில் யோசித்துப் பார்த்தால் அது அவன் வேலையில்லை,ஆனால் எப்படியோ நடந்து முடிந்திருக்கிறது.

வஞ்சமும் ,பழியுணர்ச்சியும் இருக்கும் வரையில் செல்வம் தங்குவதில்லை.அனைத்தும் தீரட்டும் என்று அது காத்துக் கிடக்கும்.அனைத்தையும் அடித்துக் கொண்டுபோய் நிறுத்தும் .

கடவுள் நின்று நடத்திய சில கொலை வழக்குகள் உண்டு.அது போல கடவுள் முன்னின்று உடனடியாக காட்டிக் கொடுக்கும் கொலை வழக்குகளும் உண்டு.பக்கத்து சுடலைக்கு மாலை அணிவித்து விட்டு அந்த மாலையை எடுத்து பிணத்தின் மேல் வீசி எரிக்கும் பழக்கம் கொண்ட  குழு.ஒரு வெளியூரிலிருந்து வந்த அப்பாவியைக் கொன்று உறுப்பறுத்து எரித்து விட்டார்கள்.காலையில் வந்து பார்த்தால் காவ்லத் துறையினரின் கண் முன்னால் அந்த மாலை நறுமணத்துடன் எரிபடாமல் புத்தம் புதிதாக கிடந்தது.அந்த கொலை வழக்கின் தடயமே அந்த வாடாத மாலைதான்.ஒரு நாளில் குற்றவாளியைத் தூக்கி விட்டார்கள்.

வினைப்பதிவுதான் அந்த நறுமணம் குன்றா மாலை.அது வாடுவதே இல்லை.

நானொன்றும் புதிதாகச் சொல்வதில்லை

காலம் முழுக்க மோதல் கொலைகள் செய்து புகழ் பெற்ற நேர்மையான அதிகாரியொருவர்,செய்யாத சாதாரணமான பெற்றிக் கொலை வழக்கில் மீள முடியாமல் ஓய்விற்கும் முந்தைய தினத்தில் பணியில் இருந்து விலக்கப்பட்டார்.வழக்கில் கொலையுண்டவனின் மனைவி சொன்ன சாட்சி மிக கடுமையானதாக இருந்தது. அந்த சாட்சியை யாராலும் விலைக்கு வாங்கவோ ,வளைக்கவோ இயலவில்லை.ராமச்சந்திரன் நாயரின் "நான் என் வாழ்ந்தேன் என்பதற்கான சாட்சி "என்ற நூலைப் பற்றி ,நீங்கள் என்ன நினைக்கிறீர்கள் ? என்று நான் அவரிடம் ஒருமுறைக் கேட்டபோது ,சிரித்துக் கொண்டே ராமச்சந்திரன் நாயர் ஒரு கோழை என்று பதில் சொன்னவர் அவர்.

உடலின் பாதி நோய்கள் மனம்தான் .மீதி வயோதிகம்

உடலின் பாதி நோய்கள் மனம்தான் .மீதி வயோதிகம்

எனது உடலின் பாதி நோய்கள் மனம்தான் என்பதை மிகப்பெரிய தாமதத்திற்குப் பிறகுதான் கண்டு கொண்டேன்.சிறு வயது தொடங்கி ஏதேனும் மாத்திரைகளைத் தின்று கொண்டிருக்க வேண்டும்.இல்லையெனில் எல்லாம் சரியாக இருக்காது என்றோர் எண்ணம்.இந்த பழக்கம் கொஞ்சம் கொஞ்சமாகப் பெருகி ஒருவேளைக்கு 100  கிராம் அளவிற்கு மிச்சர் தின்பதை போல மாத்திரைகள் பெருகி விட்டன.

தூக்கப் பிரச்சனை எனக்கு இருபதாண்டுகளுக்கு முன்னர் ஏற்பட்டது.அதுவரையில் அளவற்ற தூக்கம்.தூக்கப் பிரச்னையை இதுகாலம் வரையில் மாத்திரைகளைக் கொண்டே இழுத்து வந்தேன்.கழிந்த  ரமலான் தினத்தன்று எனக்கு முக்கியமாக தேவைப்படக் கூடிய தூக்க மாத்திரை கிடைக்கவில்லை.அது வழக்கமாக நான் மருந்துகள் வாங்கிற இஸ்லாமியரின் கடையில் மட்டுமே கிடைக்கும்.நகரம் முழுக்க தேடியலைந்தும் வேறு எங்குமே கிடைக்கவில்லை.தூக்கம் ஒருநாள் கெட்டால் சரியாக உணவு உண்ண முடியாது,இரண்டு நாட்கள் கெட்டால் வலிப்பு உண்டாகி விடும் என்பதே மனப்பதிவு.அப்படித்தான் நடக்கவும் செய்யும்."அப்பாவை புனிதப்படுத்துதல் "கவிதை நூலை வாசித்தவர்களுக்குத் தெரிந்திருக்கும்.பலர் அப்பாவை தாமதமாக கொலை செய்யத் தொடங்கியிருந்த காலத்தில் அப்பாவை புனிதப்படுத்த தொடங்கிய கவிதைத் தொகுப்பு அது. அந்த நூலை ஏராளமான தூக்க குளிகைகளுக்குத் தான் சமர்ப்பணம் செய்திருப்பேன்.

ரமலான் அன்று வழியின்றி தூக்க மாத்திரையின்றி இருபதாண்டுகளுக்குப் பின்னர்  படுத்தேன்.ஆனால் என்ன விஷயம் ! நன்றாகத் தூங்கி விட்டேன் .காலையில் விழிக்கும் போது தாங்கவே முடியாத ஆச்சரியம்.மறுநாளிலிருந்து மாத்திரைகளை நான் தேடவில்லை.எல்லாம் சரியாகாது தான் போய் கொண்டிருக்கிறது.நமது மனபதிவுகள் எல்லாவற்றையும் , எல்லா மாயைகளையும் உண்மை என்றே நம்பும் இடத்திற்கு கொண்டு வந்து விடுகின்றன.

மிகவும் முக்கியமான மருந்துகளை நீங்கள் எடுக்கத் தொடங்கிய பின்னர் படிப்படியாக அதன் அளவை குறைத்து வந்தாலும் கூட ; ஒரு குறிப்பிட்ட படிக்கும் கீழே குறைக்க முடியாது என்கிற விதமாகவே பெரும்பாலான ஆங்கில மருந்துகளின் மில்லி கிராம் அமைக்கபட்டிருக்கும் .தேவைப்படாத போதும் கூட பழக்கத்தை நீங்கள் அந்த மில்லி கிராமிற்கு கீழே இறக்கவே முடியாது.ஆனால் அந்த சந்தர்ப்பத்திற்கு கீழே விழுந்து தப்பிப்பதை ஒரு இலக்காக வைத்துக் கொள்வதே நல்லது.

எனக்குத் தெரிந்த ஆயுர்வேத மருத்துவர் ஒருவர் நிபுணர்.தெரிசனங்கோப்பு மகாதேவ ஐயர்.பதினொன்றாம் வகுப்பு படிக்கும் போது அப்பா என்னை அவரிடம் அழைத்துச் சென்றார்.தொடர்ந்து தீராத தலைவலியில் ஆங்கில மருந்துகள் பலனளிக்காதது மட்டுமல்ல,எதிர்விளைவுகளை என்னிடம் தொடங்கியிருந்த காலம் அது.இப்போது இருப்பவரின் தகப்பனார்தான் அப்போது வைத்தியர்.மூன்று மாதங்களில் எனக்கு குணமாயிற்று .அதன் பின்னர் இதுவரையில் எனக்கு அந்த இடர்பாடு   ஏற்பட்டதே இல்லை.மகாதேவ ஐயரிடம் ஒரு விஷேசம் என்னவெனில் மனதிற்கும் நோய்க்கும் இடைப்பட்ட தொடர்பை ஆச்சரியப்படும் விதத்தில் சொல்லிக் கொண்டே போவார்.சமீபத்தில் ஒரு நண்பரை அழைத்துச் சென்றிருந்தேன். மனைவியோடு முரண்பாடு ,வயிற்றில் ஜீரணக் கோளாறு ,நரம்பியல் உஷ்ணம் என்று சொல்லிக் கொண்டே போனார்.அதனைத் தொடர்ந்து என்னென்ன மருந்துகள் எடுத்துக் கொள்ள வேண்டும் என்கிற குறிப்புகள் வாய்ப்பாடமாக   அவரிடமிருந்து வந்து கொண்டே இருக்கும்.

முரண்பாட்டைப்  போக்க வழியில்லையெனில் மருந்தை உணவாக்கிக் கொள்ள வேண்டியதுதான்.வேறு என்ன செய்ய முடியும் ?

இணக்கம் நம்பிக்கை அன்பு மாற்றுப்பண்புகள்

  இணக்கம் நம்பிக்கை அன்பு  மாற்றுப்பண்புகள்

மோதுதல்,சந்தேகித்தல் ,வெறுத்தல் ஆகிய பண்புகள் எண்பதுகளின் பிற்பகுதியில் கருத்தியல் ரீதியில் தமிழ்நாட்டில் அரசியல் தரப்பினரால் முன்வைக்கப் பட்டன.இந்த மூன்று பண்புகளையும் தங்கள் அரசியல் தன்னிலையில் கொண்டிருத்தலே தீவிர நிலை என்று நம்பப்பட்டது.அதற்கு முன்பு வரையில் இந்த பண்புகள் அடிப்படைவாதிகளின் பண்பாகவும் , பழமைவாதிகளின் பண்பாகவும் இருந்தவை.முற்போக்கு அரசியல் முகாம்களில் இந்த பண்புகள் அரசியல் குணங்களாக வரையறுக்கப் பட்டபோது ,பெரிய உள்ள கிளர்ச்சி ஏற்பட்டது.அனைத்தையும் சந்தேகி,அனைத்திலும் வேறுபட்டு வெறு .பின்னர் சந்தகித்தவற்றை மோது.தன்னிலையில் போர்க்குணம் பெருக இது உதவும் என்பதே இந்த குணங்களை அரசியல் குணங்களாக முன்வைத்த அரசியல் ஆசான்களின் உபதேசம்.இன்று அரசியல் அரங்குகள் அத்தனையிலும் கோலோச்சுகிற பண்புகளாக இவை ஒவ்வொரு அரசியல் தன்னிலையிலும் உறுதிப்பட்டிருக்கிறது.

இந்த மூன்று குணங்களையும் அடிப்படையாகக் கொண்டிராத நபர்களை ,நான் இப்போதெல்லாம் தீவிரமான  சூழலுக்குள் சந்திப்பதே இல்லை.இந்த மூன்றில் இரண்டு மட்டுமே இருக்கும் ஒருவரைப் பார்த்தால் நீங்கள் முகமன் செய்து சிரிக்கலாம்.ஒன்றுதான் இருக்கிறது என்றால் கொஞ்சம் உரையாட வாய்ப்பிருக்கிறது என்று அர்த்தம்.மூன்றும் செவ்வனே ஒருவரிடம் பூர்த்தியாகியிருக்குமெனில் நீங்கள் ஒதுங்கி கொள்வதே நல்லது.

இந்த தீவிரமான சூழலுக்கு வெளியே பிரமாண்டமானதொரு உலகம் இருக்கிறது.அந்த உலகம் மிகவும் ஆபாசமாகக் கருதுகிற குணங்கள் இவை.தீவிர சுழலுக்குள் முழுநேரமும் வசிக்கும் பிரதான புரட்சியாளர்கள்,தீவிரத்தின் மோகிகள் கூட ,இந்த பிரமாண்டமான உலகத்திற்குள் பிரவேசிக்க நேர்கையில் ,அந்த நேரம் குறைவானதாக இருந்தாலும் கூட இந்த மூன்று குணங்களையும் அடக்கியே வாசிக்கிறார்கள்.பேருந்துகளில் பயணம் செய்யும் போது குழந்தைகளைக் கொஞ்சுகிற ,மடியில் சக பயணி தலை வைத்து உறங்குவதை அனுமதிக்கிற தீவிர மோகிகள் பலரை கண்ணால் கண்டிருக்கிறேன்.எனது நண்பர் ஒருவர்.பெருங்கவி.உட்கார்ந்து பேசினால் மிகவும் நன்றாகக் பேசிவிடுவார்.அவரை நின்று பேசச் சொன்னால் ரத்தக் கொதிப்பிற்கு உள்ளாகித்தான் பேசுவார்.நின்று பேசித்தான் அவர் உடல் ஆற்றல் அத்தனையும் கரைந்தது.ஆரம்பம் முதலே உட்கார்ந்தது பேசுவதை அவருக்குப் பழக்கியிருந்தால் வாழ்க்கையின் இருபது  வருடங்களை சேமித்திருக்கலாம்.

சரி இந்த குணங்கள் உண்மையாகவே அரசியல் குணங்கள் தானா? காலனிய நாடுகளை ஆக்கிரமிப்பு செய்யும் நாடுகள் கைப்பற்ற கையாளுகின்ற போர் குணங்கள் இவை.அவர்கள் வெளியேறிய பின்னரும் உள்நாட்டு போரில் அவர்கள் தங்களின் மண்டையை உடைத்துக் கொள்வது இதனால்தான்.அப்படியானால் இந்த அரசியல் ஆசான்கள் உள்ளபடியே அப்பாவிகளாகக் கொண்டு இவற்றை கொட்டினார்கள் என்று கொள்ளலாமா ?

நமது தன்னிலையில் அரசியல் குணங்களாக மாற்றம் கொள்ள வேண்டிய குணங்கள்.முதலில் இணக்கம்   ,ஏற்பு ,நம்பிக்கை.அன்பு ஆகியவை.பிறரோடு இணங்குங்கள் முதலில் .அதனால் இடையூறுகள் ஏற்பட்டால் கூட பரவாயில்லை.பிறரை ஏற்றுக் கொள்ளுங்கள்.ஏற்றுக் கொள்ளுதல் என்பது வாழும் கலை.அது ஒரேயடியாக விளங்காது ,கொஞ்சம் கொஞ்சமாக விளங்கும்.நம்புங்கள்.நம்ப  மறுத்தால் உங்களை நம்புவதற்கு ஒருவரும் இருக்க மாட்டார்கள்.முடிவில் உங்களையும் சந்தேகிக்கத் தொடங்குவீர்கள்.தற்போது நமக்குத் தேவை இவைதான் உரையாடவும் மேன்மைப்படுத்திக் கொள்ளவும்.சந்தேகித்து நோக்கம் கற்பித்துக் கொண்டே வருகிற ஒரு தன்னிலையை என்ன செய்வது ? என மிகவும் நெருடலாக இருக்கிறது.

தெரசா வங்காள   வீதியினுள் ஒரு சமயம் இறங்கி தொழுநோயாளிகளுக்காக பிச்சையெடுக்கும் போது,அவரது கரங்களில் காறியுமிழ்ந்து கொடுப்பான் ஒருவன்.தெரசா கைகளை தன்னை நோக்கி இழுத்து "இது எனக்கு இருக்கட்டும்...அவர்களுக்கு ஏதேனும் கொடு" என்று வஞ்சகம் இல்லாமல் கேட்டு நிற்பார்.இது ஒரு புனிதரின் செயல் .அவ்வளவிற்கு யாருக்கும் இயலாது.ஆனால் அதில் ஒரு சிறுபருக்கை நம்மாலும் முடியும்.இன்றைய வாழ்விற்கும் அரசியலுக்கும் பற்றாக்குறையாக இருப்பதும் ,தேவைப்படுவதும் இதுவே.

"இடங்கை இலக்கியம் "

"இடங்கை இலக்கியம் "


ஜெயமோகன் அந்திமழை இதழில் எழுதியுள்ள இடதுசாரி இலக்கியம் பற்றிய "இடங்கை இலக்கியம் " என்னும் கட்டுரை தமிழ்நாட்டில்; இன்னும் ஐம்பது ஆண்டு காலத்திற்கு இடதுசாரி இலக்கியம் பற்றிய வரையறைக்கு போதுமான கட்டுரை .இந்த கட்டுரை குறித்து காலையில் பேசிய கோணங்கி "இடதுசாரி இலக்கியம் பற்றியும் ஜெயமோகன் அளவிற்கு வேறு யாராலும் பேச இயலாதிருப்பது இங்குள்ள சோகம்தான்" என்றார்.பரந்து விரிந்த அர்த்ததளத்தில் வைத்து ,பெரும்பாலும் யாரையுமே தவிர்க்காது இந்த கட்டுரையினை ஜெயமோகன் எழுதியிருக்கிறார்.இடதுசாரிகள் பற்றிய இந்த கட்டுரையின் முக்கியத்துவத்தை இந்த கட்டுரை வழியாக அறிவது ஒரு வழியென்றால், ஒரிஜினல் இடதுசாரிகள் இந்த இதழின் பிற பக்கங்களில் எழுதியிருப்பவற்றைப் படிப்பது மற்றொரு வழி.பெரும்பாலும் அவர்கள்  உளறியிருக்கிறார்கள் என்று சொல்வதே பொருத்தமானது.

ஜெயமோகன் அளவில் விரிந்த தளத்தில் ; இடதுசாரி இலக்கியம் என்பதற்கு சொல்லியிருக்கும் வரையறை மிகவும் முக்கியமானது.மனித மையம்,வரலாற்றுணர்வு ,பொருளியல் அடைப்படை ஆகியவற்றை முதன்மை கொள்ளச் செய்யும் படைப்புகளை இடதுசாரிப் படைப்புகள் எனலாம் என்கிறார் ஜெயமோகன்.இதில் மனித மையம் ,வரலாற்றுணர்வு இரண்டும் பின் வந்த சிந்தனைகளின் பால் கேள்விகளுக்கு பகிரங்கமாக உட்படுத்தப்பட்டவை.தங்களை காப்பாற்றிக் கொள்ளும் திறன் இழந்து இன்று  நிற்பவை.இடதுசாரிகளின் மனித மையமும் ,கிறிஸ்தவத்தின் மனித மைய சிந்தனைகளும் தொடர்புகள் கொண்டவை.

சுந்தர ராமசாமியை இரண்டிற்கும் இடைப்பட்டவராகக்  காண்கிறார் ஜெயமோகன்.அது சரியான கணிப்பென்றே எனக்கும் தோன்றுகிறது.ஜெயகாந்தன் தொடங்கி யவனிகா ஸ்ரீராம் வரையில் என நீண்ட பட்டியல் இந்த கட்டுரையில் இடம்பெற்றிருக்கிறது.ஒவ்வொருவரைப் பற்றியும் ஓரிரு வாக்கியங்களேனும் அவர்களை புரிந்து கொள்ள வகை செய்யும் வண்ணம் இந்த கட்டுரையில் அமைந்துள்ளது.

ஜெயமோகனின் கட்டுரை இவ்வாறு முடிவடைகிறது.அது இன்னும் அவருக்கு இடதுசாரி எழுத்துக்கள் பேரில் நம்பிக்கை இருப்பதையே காட்டுகிறது.

"இடதுசாரிக் கட்சி அரசியல் அதன் இடத்தை மெல்ல இழந்து வருகிறது.அதன் பொருளியல் வாதம் இலக்கியத்தில் வெகுவாக மறுக்கப்பட்டு விட்டது .ஆனால் மானுட மைய நோக்கு ஒரு உயர் லட்சியவாதமாகவே நீடிக்கும் என நினைக்கிறேன்.அதன் வரலாற்றுவாதம் ஒரு தத்துவக் கருவியாக இன்னும் நெடுங்காலம் சிந்தனையில் வாழும்.ஆகவே இடதுசாரி எழுத்து உருவாகி வந்து கொண்டுதான் இருக்கும் "

ஜெயமோகனின் இந்த கட்டுரையைக் காட்டிலும்   இடதுசாரிகளுக்கு   பெரிய பத்திர பிரமாணங்கள் இருக்க இயலாது என்றுதான் நினைக்கிறேன்.ஆனால் என்னுடைய பிரச்சனை அவர்களுடைய பொருளியல் நோக்கு அன்று . வரலாற்று மையவாதமும்,மனித மைய நோக்கும் சிந்தனைத்தளத்தில் சரிந்து விழுந்து கிடைப்பதைத்தான் அவர்களுடைய  பெரிய பிரச்சனைகளாகக் கருதுகிறேன்.அவற்றிலிருந்து வெளியேறுவது எப்படி என்று தெரியாமல்தான் அவர்களுடைய கம்பனிக் குதிரைகள் ஓடிய வளாகத்தையே சுற்றிச் சுற்றி ஓடிக் கொண்டிருக்கின்றன.பிராங்பர்ட் மார்க்சியர்களை ஏற்றுக் கொள்ளாதவரையில் இவர்களால் சிக்கலில் இருந்து ஒருபோதும் வெளியில் வரவே இயலாது.

வஞ்சம் என்பது அகத்தைக் கொல்லும் விஷம்

வஞ்சம் என்பது அகத்தைக் கொல்லும் விஷம்

வஞ்சம் என்பது அகத்தைக் கொல்லும் விஷம்
உங்களை ஒரு விஷயம் பாதிக்கிறது .பாதித்துக் கொண்டே இருக்கிறது.ஆனால் இதனை நீங்கள் வெளிப்படுத்தினால் உங்களை சுற்றியிருக்கும் நண்பர்கள் நவுசுவார்கள்.உங்கள் குழு உங்களை
சந்தேகிக்கும் . சமூகம் கீழிறக்கும் என்பவை கருதி எப்போது மூடிக் கொள்கிறீர்களோ அப்போதிலிருந்து உங்கள் அகமும் மூடிக் கொள்கிறது.அதன் வழியாக அத்தனை நச்சுக்களும் சிறுகச்சிறுக உங்களை பற்றிக் கொள்கின்றன . கொஞ்சம் கொஞ்சமாக நீங்கள் உங்களையும் அறியாமலேயே கீழிறங்கி கொண்டிருப்பீர்கள்.பிறகு பல சமயங்களில் அகம் எவ்வாறு தன்னிடம் மூடிக் கொண்டது என்பது கூட விளங்குவதில்லை.அகம் மூடிக் கொள்கிறவன் ஒருபோதும் எழுத்துக்கு லாயக்குப் படவே மாட்டான்.அவனிடம் விழிப்புணர்ச்சி தூண்டபட்டு ; கடின உழைப்புடன் அகத்தை மீண்டும் முதலிலிருந்தே தொடங்க வேண்டுமாயின் ,முதலிலிருந்தே அவனைப் பாதிக்கத் தொடங்கியவர்களிலிருந்தே சொல்லித் தொடங்கி வர வேண்டும். பாதிப்பு என நான் குறிப்பிடுவது,ஏற்கனவே உங்களிடம் இருந்த அகம் உடைந்த விதத்தைப் பற்றியே.
இந்த வஞ்சத்தில் மற்றொரு ரகம் உண்டு.பாதிக்கிற எழுத்தாளனை அரைகுறையாக உள்வாங்கி வாழ்நாள் முழுதும் அவனை எதிர்த்து கொண்டிருத்தல்.அவன் குறிப்பிடுகிற நூல்கள்,எழுத்தாளர்கள் , கவிகள் எல்லோரையும் எடுத்துக் கொள்வார்கள்.அவனை தீவிரமாக எதிர்த்துக் கொண்டிருக்கும் இந்த பண்பு தமிழில் அதிகமானோருக்கு இருக்கும் நோய்.மதிப்பீடுகளை உருவாக்கும் எழுத்தாளர்கள் அதிகம் பாதிக்கும் தன்மை கொண்டவர்கள் என்பதை ஏற்க இயலா நோய் இது.
முதல் வீச்சில் நம்பிக்கைக்குரிய சில அடிகளை எடுத்து வைத்து விட்டு உள்ளுக்குள் அடைத்து தாழ்பாள் போட்டுக் கொள்கிற பல கவிஞர்களை அறிவேன்.அவர்கள் பெயர்களை இப்போது பட்டியலிட்டால் ஆள் வைத்தேனும் அடிக்க வருவார்கள் என்பதால் சொல்லத் துணிவில்லை.தமிழில் எழுதுகிறவர்கள் பற்றி நீங்கள் ஆதரவாக ஐநூறு வார்த்தைகள் பேசியிருக்கலாம்.ஆனால் எதிர்மறையாக ஐந்து வார்த்தைகள் பேசியிருந்தாலும் அவர்கள் மரணப் படுக்கையில் இருக்கும் போது கூட நினைவில் வைத்துக் கொண்டே இருப்பார்கள்.சுய எழுத்துக்களின் பேரில் இவ்வளவு தூரத்திற்கு உடமை மனோபாவம் கொண்டவர்களை வேறு மொழிகளில் பார்க்க முடியுமா தெரியவில்லை.ஐந்து வார்த்தைகள் எதிர்மறையாகப் பேசியிருந்தால் நீங்கள் அவன் பிணம் எரியும் போது கூட அருகில் செல்லாமலிருப்பதே சிறந்தது.அப்படி நீங்கள் சென்றால் அவன் அவள் பிணம் எழும்பி உங்களை நாலு வார்த்தைகள் திட்டிய பின்னர்தான் எரியத் தொடங்கும்.எரியூட்டுவர்களுக்கு
இதுவொரு இடையூறும் கூட.
முதல் வீச்சுக்குப் பின்னர் தங்களை பலரும் அரசியல் , கொள்கை,குழு என்று மூடிக் கொள்ளுவதே இந்த அவலத்திற்கு காரணம்.ஒவ்வொரு படைப்பாளிக்கும் இரண்டாவது ஒரு எழுச்சி என்பது உண்டு.அது இல்லாதவர்கள் பெரும்பாலும் முழுமை பெறுவதில்லை.
இந்த இதழ் அம்ருதா கிடைத்ததிலிருந்து அதில் வெளியான ஷங்கர்ராம்சுப்பிரமணியனின் ஒரு கவிதை பற்றி நான்கைந்து பேரிடம் பேசி விட்டேன்.அவருடைய மூன்று கவிதைகள் இந்த இதழில் வெளிவந்துள்ளன.மூன்றில் ஒன்று தலைசிறந்த கவிதை.
ஷங்கர் தன்னை மாற்றி எழுத முற்படும் கவிகளில் ஒருவர்.வேறு ஆடை அலங்காரம் செய்து கொள்வதை போன்றதுதான் இச்செயல்.ஆனால் முக்கியமானது.ஒரு
சட்டையில் , சுடிதாரில் ,ஜீன்ஸில் அழுகி நாறுவதற்கு பதிலாக இப்படி புதிய ஆடை அலங்காரத்திற்குள் நுழைய முற்படுத்தலே சிறப்பானது. உத்தமம்.ஷங்கரின் இந்த மாற்றுறுப்பு அறுவை சிகிச்சை பரிசோதனை பற்றி எனக்கு ஒரு பாராட்டுணர்வும் அதே வேளையில் அதில் அதிருப்தியும் கூடவே இருந்தன.விக்ரமாதித்யன் அண்ணாச்சியிடம் கூட "ஷங்கர் உணருவதையெல்லாம் கவிதை என நம்பும் இடத்திற்கு வந்து சேர்ந்து விட்டார் போலிருக்கிறதே அண்ணாச்சி ?" என்று கழிந்த சந்திப்பில் கேட்டேன்."அவருடைய ஆனந்தக் கவிதைகள் பயங்கரமான பாதாளத்தில் இருக்கிறதே ! என்றேன்.அவர் சிரித்தார்.அம்ருதாவில் வெளியாகியிருக்கும் இந்த கவிதை அந்த எண்ணத்தை உடைத்து எறிந்து விட்டது.இதையும் நான் உடனடியாக வெளியில் சொல்ல மறுத்து உள்ளில் புழுங்குவேன் எனில் என் நெஞ்சமே என்னை காறியுமிழும்.அந்த கவிதை இது.
"மழை பெய்த தெருவில்
கூழாங்கற்கள்
தவளைகளாக மாறின.
வட்டமாய் அணிவகுத்து
துள்ளித் தொடங்கின
தங்கள் இலக்கில்லாத முற்றுகையை .
தவளைப் போர் வீரர்களே
தவளைப் போர் வீரர்களே
உங்கள் பிறப்பின் உற்சாகத் துள்ளலை
வீட்டுத் திண்ணையில் படுத்திருக்கும்
நாய் பார்த்துக் கொண்டிருக்கிறது
நான் பார்த்துக் கொண்டிருக்கிறேன்"
கவிதையின் ரசாயனம் கச்சிதம் அமைய பெற்ற கவிதை இது.
நமது சூழலின் பெருத்த சீர்கேடுக்குக் காரணமே ஏற்படும் பாதிப்பிலிருந்து விலகிக் கொள்வதுதான்.பாதிப்புகளை மனம் மோதி எதிர்ப்பதுதான். மனம் விலகாது உடல் விலகியிருக்கும்.இந்த முரண் வஞ்சம்.தீமை.
பாதிப்பை ஏற்கத் தொடங்குங்கள் வஞ்சம் தீரும்

கிராமத்து பிராமணர்களுக்கு இடஒதுக்கீட்டில் இடம் தரப்பட வேண்டும்

கிராமத்து பிராமணர்களுக்கு இடஒதுக்கீட்டில் இடம் தரப்பட வேண்டும்

அனைவரும் அர்ச்சகராவது காலத்தில் எவ்வளவு முக்கியமோ , அதேயளவிற்கு கிராமத்து பிராமணர்களுக்கு இடஓதுக்கீட்டில் இடம் ; வாய்ப்புகளில் ஏற்படுத்தித் தர வேண்டியதும் முக்கியம்.இரண்டுமே தவிர்க்கப்படக் கூடாதவை .இந்த இரண்டில் ஒன்றை மட்டும் ஏற்கிறேன் என்று எவரேனும் பேசுவார்களேயானால் ,குரல் எழுப்புவார்களேயாயின் அவர்கள் வெறும் அரசியல் தரப்பினர் மட்டுமே .பண்பாடு தொடர்பான விஷயங்களில் வெறும் அரசியல் குரல்கள் மட்டுமே போதுமானவை அல்ல.அதுபோல பண்பாடு சார்ந்த விஷயங்களில் பிறர் உரிமைகள் காக்கப்படுதல்  அவசியமானது.இன்றைய நிலையில் கிராமத்து பிராமணர்கள் ஒடுக்கப்படுபவர்கள் மட்டும் இல்லை.பாதுகாப்பின்மையை உணர்ந்து கொண்டிருப்பவர்கள்.வறுமைக் கோட்டிற்கு கீழ் வாழ்கிற பிராமணர்கள்  அனைவரையும் ஒடுக்கப்பட்டோராக கருதுதலே நியாயம். நீதி.யாரையுமே வஞ்சிப்பது நல்லதல்ல என்னும் போது பிராமணனை மட்டும் வஞ்சிப்பது எப்படி நீதியாக இருக்க முடியும் ?

அனைவரும் அர்ச்சராக வேண்டும் என்பது சரிதான்.ஆனால் அதற்கு வெறும் பட்டையப் படிப்புகள்  மட்டுமே போதுமானவை அல்ல.அர்ப்பணிப்பும் ஆன்மீக நாட்டமும் சிறுவயது தொடங்கி அவசியம்.ஆனால் இங்கே கிறிஸ்தவர்களுக்கு உள்ளது போல ,இஸ்லாமியர்களுக்கு உள்ளது போல நிறுவனம் சார்ந்த படிப்புகள் இன்னும் தொடங்கப்படவே இல்லை.அப்படியிருக்கும் குறைந்தபட்ச படிப்புகளை தவிர்க்க இயலாமல் சிறுவயது முதற் கொண்டு படிப்பவர்கள் இங்கே பிராமணர்களாக மட்டுமே இருக்கிறார்கள். கேரளாவில் ஈழவர்கள் அனைத்து ஆன்மீகச் செல்வங்களையும் தங்கள் வயப்படுத்தியிருக்கிறார்.அது போலவே தமிழ் நாட்டிலும் தலித்துகள் உட்பட ,பிறர் ஆன்மீகச் செல்வங்களை முதலில் அர்ப்பணிப்புடன் தங்கள் வயப்படுத்த வேண்டும்.

பிராமணர்கள் காலம் காலமாக செய்து வருவதால் ,பயின்று வருவதால் அவர்களுக்கு கோவிலில் நின்று புழங்குதல் எளிமையாக இருக்கிறது.அதற்குப் பதிலாக அங்கே ஒருவர் வந்து நிற்கும் போது வெறும் உரிமையுணர்ச்சி மட்டுமே காணாது.நிபுணத்துவம் இருத்தல் வேண்டும்.பாடமாக ஒன்றிரண்டு ஆண்டுகள் மட்டுமே கற்றதை வைத்து அங்கே நிற்பது சிறப்பல்ல.சிறுவயது முதலே கற்றுத் தேர்ந்து கொள்ளுகிற ஆன்மீக அறிவும் ஞானமும்  அர்ப்பணிப்புணர்வும் அவசியம்.இதற்கென தொடக்க காலக் கல்விச் சாலைகள் பிராமணர்களைக் கொண்டே தமிழ் நாட்டில் தொடங்கப்படுதல் நலம். ஓதுவார்களையும் ,பிற ஆன்மீகச்  சான்றோர்களும் இத்தகைய கல்விச் சாலைகளில் பங்கெடுக்க வேண்டும்.இத்தகைய கல்விகள் புழக்கத்திற்கு வராத வரையில் வெறுமனே வாய் பேசியோ ,பிராமணர்களை   அவதூறு செய்தோ ஒரு பலனும் ஏற்படப் போவதில்லை.அவர்கள் காலம் காலமாக ஆன்மீக வளங்களைக் காக்கிறார்களோ இல்லையோ கோவிலைக் காத்து வருகிறார்கள்.இந்த உண்மையை ஏற்காதோருடன் உரையாடல் செய்வதாலும் ஏதும் பலன் இல்லை.

திருக்காதல் செய்வோருக்கு வழித்துணைக் கவிதைகள்

காதல் அந்தாதி -
திருக்காதல் செய்வோருக்கு வழித்துணைக் கவிதைகள்

1

நீ வந்து சேருவது வரையில்
ஜடமாக இருந்தேன்
இப்போது கொழுந்து விட்டு எரிகிறது
திருமேனியெங்கும்
உயிர்த்தீ

பருகக் கொஞ்சம்
நீர் கொடு
அந்நீரில் மட்டுமே
தணியும்
பற்றியிருக்கும்
நெருப்பு

2

இந்த பிரபஞ்சம் ஏன் இத்தனை
அழகாய் இருக்கிறது
என்பது
உன்னைச் சந்தித்த பின்னரே
விளங்குகிறது

ஜோதி பிரகாச ஓசைகள்,காட்சிகள்
மெல்லிய ஓடையிலிருந்து நிலத்தில்
கசிந்து விழுவது போல
எனக்குள்
விழுந்து கொண்டிருக்கின்றன

இத்தனை நாட்களாய்
படாத சலனங்கள்
மூச்சிரைக்க உன்னை நோக்கி ஓடி வந்து
இடைப்பட்ட நாட்களை
தினசரி காலண்டரிலிருந்து
கரைத்துக்
கொண்டிருக்கிறேன்

ஒவ்வொரு நாளும் குறையக் குறைய
என் உயிரிலிருந்து
வளர்ந்து கொண்டிருக்கிறது ஒளியின்
பிறை நிலவு

3

நம்மைப் பார்த்து
எல்லாமே அதிசயிக்க வேண்டும்
காடுகள்
மலைகள்
மேகங்கள்
நதிகள்
கடற்கரைகள்
நட்சத்திரங்கள் எல்லாமே

கைகள் இறுக கோர்த்து
ஓரேயுயிராக
பயணிப்போம்

நமது குழந்தைகளின்
மீது நட்சத்திரங்கள் ஜொலிக்க
வேண்டும்

4

உன்னைத் தொடுவது போலே
தொட்டென்னை குளித்துக் கொண்டிருக்கிறேன்

பூவாளியில் நிறைந்த நீர்
உச்சியிலிறங்கி
நெற்றில் துளைக்கிறது

மூக்கைத் தொட்டு
பின் கழுத்துகிறங்கி
மார்பில் கைதடவி

இறங்கும் நீர்
இறங்குகிறது
உன் சுனை நோக்கி

கையேந்தியுன்னை அகட்டிக்
கைகளில் தாங்கி
வில்போலும் வளைந்த என்னுடல்
சீறியுன் மேல் சரிய

குளித்தது குளிர் நெருப்பிலா
எரிகின்ற நீரிலா
சொல்

5

இன்றைய பௌர்ணமியிடம்
நானொன்று கேட்பேன்

நீ இதுவரையில் என்னவளை
எத்தனை முறை பார்த்திருப்பாய் ?
அவள் உன்னை எத்தனை முறை பார்த்திருப்பாள் ?

என்னை எத்தனை முறை பார்த்திருப்பாய் ?
நான் உன்னை எத்தனை முறை பார்த்திருப்பேன் ?

அது என்ன பதில் வேண்டுமாயினும்
சொல்லட்டும்
பௌர்ணமியிடம் நான் சொல்லவிருக்கிற
பதில் இதுதான்

" பொறுத்திருந்து பார்
அடுத்த இரண்டாவது சுற்றில் நீ வரும்போது
நானும் அவளும் ஒரே காட்சியில்
உன்னை பார்ப்போம்
நீ
எங்களையும்தான்

6


என் பயணப் பையில்
புத்தகங்கள் ,உடைகள்
எல்லாவற்றையும்
எடுத்து வைத்துக் கொண்டேன்

நீ இருந்து நினைவுபடுத்த வேண்டிய
ஏதேனும் பொருட்கள்
மறந்திருக்கலாம்

இதயத்தில் உன்னை எடுத்துக்
கொண்டதும்
பயணம்
தயாராகிவிட்டது

7

என்னிடம் ஒரு  ராக்ஷஸன் இருந்தான்
எனது தேவதை  வரும் நேரமாகிவிட்டது
கிளம்பிச் சென்று விடு என்று சொல்லிவிட்டேன்

ஐந்து வண்ணங்களை பட்டாம்பூச்சிகளிடம்
வானவில்லில் சேகரித்துத் தர கேட்டிருக்கிறேன்

ஒரு இதமான மழைச் சாரல்
எப்போதும் வேண்டும்
ஒரு குடைக்குள்
நாமிணைந்து
நனைந்து
செல்ல

நனைந்த படி
நாம் நுழைந்து விடவேண்டும்
சேர்ந்து
நமது காதலின்
வனத்திற்குள்

8

மழை சாரல்
நனைந்தபடி பயணிக்கும்
எனது வாகனத்தில்
நீயும் உடனிருப்பது போல மாயை

திடுக்கிட்டு விழிக்கும்
தூக்கம்
நீ முன்னமர்ந்து
அமைதியாகத் தூங்கு
என்கிறாய்
எனக்குள்ளிருந்து உடனெழும்பிய
அத்தனை பேய்களும்
அமைதியடைந்து
அமைதியாகத் தூங்குகின்றன
கட்டிலில்

கனவுகளில்
உனது நடமாட்டம்

9

நாம் சேர்ந்து நனையும் முதல் மழை
என்னவாக இருக்கும் ?
நமது மழையாக
இருக்கும்

நமது முதல் வெயில்
நமது முதல் பனி
முதல் கடல்
முதல் கூடல்
எல்லாம் நம்முடையவை

முதல் கூடலில்
நாம் இவற்றை
நட்சத்திரங்களுக்கு
சமர்பிப்போம்

10

ஏன்
மரங்கள் இப்போதெல்லாம் நான் வெளியேறிச் செல்கையில்
கைகாட்டிப் பேசுகின்றன ?

உனக்குத் தெரியுமா
பார்க்கும் காட்சிகள்
அத்தனையிலும்
உன் முகம்

பறவைகள் என்னைக் காதலிக்கின்றன
கிளிகளின் பாஷை எனக்கு புரிகிறது
உனக்கு புரிகிறதா ?

என்னை நீ எடுத்துக் கொண்டுவிட்டதை
அவை தெரிந்திருக்குமா என்ன ?

உன் பிம்பம் எல்லாவற்றிலும்
எதிரொளிக்கிறது

எனக்குள்ளும் பறவைகள்
பறந்து கொண்டிருக்கின்றன
மீன்கள் நீந்துகின்றன
கடவுள் உள்ளே அடியெடுத்து வைக்கிறார்.

என்ன தவம் செய்தேனோ
உன் மடியில் நான் அமர்ந்து
கனவு
காண

11

நேற்று போல இன்றும் விடிகிறது
என்றான் நண்பன் ஒருவன்

இல்லையென்றேன்
அவள் பேசாத நாட்களில்
எனக்கு மேகங்கள் நகருவதில்லை
சாரல் மழை இனிப்பதில்லை
உலகம் எனக்குத் திறப்பதில்லை

எனக்குள் இரண்டு நாட்கள்
இருக்கின்றன
ஒன்று அவள் பேசித் துவங்கிற நாட்கள்

மற்றொன்று அவள் பேசாது கடக்கும்
கசப்பின் சுவை பருகத் தரும்
வலி நாட்கள்

எனது தினசரிக்கு
வேறேதும் ஏழு நாட்கள்
இல்லை நண்பா

12

என்னையொரு சர்ப்பம் தீண்டி
கிடக்கிறேன்
உன் காதல் எனும் சர்ப்பம்
உடலெங்கும் நீலம் பாரித்து விட்டது

நீலம் பாரித்த உடலோடு
செய்யும் தவத்தில்
நெற்றியில்
நின்றாடுகிறது
விஷம்

தவம் நின்றாடும்
சிவன்
ஒருபாதியை உனக்குத் தந்து விட்டு
மீதியுடலுடன்
தரையில் கிடந்து
துடித்துக் கொண்டிருக்கிறான்

நீ வந்து
அமுதூட்டு
நீல கண்டத்தில்
நின்றுவிடும்
நீலம்

13

ஒரு நாளை எப்படி தொடங்க வேண்டும் ?
உனக்குத் தருகிற முத்தத்திலிருந்து

ஒவ்வொரு கணத்தையும்
உன் நியாபகத்தால்
அர்த்தம்
செய்ய வேண்டும்

கசிந்துருகி
உன்னில் கரைந்து
சொட்டுச் சொட்டாக
சிந்தி
ஒருநாள் மீது
வணக்கம் சொல்ல வேண்டும்

முடிவடையாமல்
தொடங்குவோம்
நாளையின்
முத்தத்தை
இன்றின் விளிம்பில்

இடைவெளியின் வெப்பச் சூடு
கனல் தீ
மூட்டுகிறது அன்பே பேரன்பே

14

கூட்டத்தில் இருக்கிறேன்
ஆனால் தனியாக

மஞ்சள் விளக்குகளைக்
கடந்து சாலைக்குள் நுழைகிறேன்
ஆனால் தனியாக

சாப்பிடுகிறேன்
குளிக்கிறேன்
துயில்கிறேன்
எல்லாம் சரிதான்
எல்லாமே தனியாக

உன்னைப் பிரிந்திருப்பதைப்
போன்று
கடுந்துயர்
வேறில்லை

15

சமவெளியும் மேடும் கடந்து வந்து
சேர்ந்தேன்
இந்த ரயில் பயணத்தை

மேய்ச்சலில் இருந்த ஆடுகள் காட்சிகளின்
பின்பாக திரும்பிக் கொண்டிருக்கும் போது
சுடர் அந்தி

பின்னர் நிலாவுடன்
பல வண்ண விளக்குகள் ஒளிர
சிறிய நகரங்கள்

ரயில் எல்லா காட்சிகளையும்
இழுத்துக் கொண்டு
ஓடுவது போலிருந்தது

நானும் நீயும் இணைந்தே
பார்த்துக் கொண்டிருந்தோம்

மஞ்சள் ஒளியுனுள்
நிலையத்தில் இறங்கி நடக்கிறேன்
தனிமையின் மாயை
இதயத்தில் தீயாய்
 சுடுகிறது
 நீ இல்லாத இந்த இரவு

16

உன்னை சந்தித்த பொழுதிலிருந்து
என் மீது பரவத் தொடங்கின
வண்ணங்கள்

உன்னை பருகத் தொடங்கியதிலிருந்து
உருகத் தொடங்கியது
இந்த பனிப்பாறை

உன்னை ஏற்கத் தொடங்கியதிலிருந்து
எனது படுக்கையறையில் பூத்து விரிகின்றன
கனவுகள்

நான் உன் உயிரின்
சாறு

17

எனது அகம் முழுதும்
உனது மடியில் சிதறிக் கிடக்கும்
பன்னீர் புஷ்பங்கள்
இப்போது

அது மெல்ல மெல்ல கட்டியெழும்பியது
யாருக்கும் பணியாதது
உதிர்ந்து
கிடக்கிறது
உனக்காக மட்டுமே
உதிர்ந்தவை போன்று

அவை உன்னிடத்தில் பேசும் ரகசியம் உனக்கு கேட்கிறதா என்ன?

​உன் காதல் அவற்றின் மீது பெய்திருக்கும் வானவில் வண்ணங்கள்

மெல்ல மெல்ல நீ சேர்த்தெடுத்துக் கோர்த்தால்
மீண்டும் எழும்பி
ஒன்று சேரும்
உன்னை வாசனையால் சூழும்
பன்னீர் மரமாக

அப்படியே இருக்கட்டும் என்றால்
உன் இஷ்டம் சகியே
அப்படியே கிடக்கட்டும்
உன் மடி மீதில்

18

காற்று இடைவெளிகள் ஏதுமற்று
உன்னை இறுக பற்றிக் கொண்டிருக்கிறேன்
என் கைகளின் சிறு நடுக்கம் உன் இதயத்திற்கு மட்டுமே
கேட்டுக் கொண்டிருக்கிறது
உனக்கு மட்டுமே இது என்ன என்பதும்
விளங்கும்

அது வேறொன்றுமில்லை
இனி பிறக்கவிருக்கிற புதிய
இசைக்கான குறிப்பு
என்னுயிர் உன்னில்
எவ்வாறு இறங்கிக் கொண்டிருக்கிறது
என்பதையுணர்த்தும்
எனது நரம்பியல்
தடயம்

உனதணைப்பில் அல்லாது
எனது நடுக்கம் அடங்கும் நிலம் வேறெங்கே உள்ளது
என் தீப்பெருஞ்சோதியே ?

19

உன்  கைகளை இறுக  பற்றிப் பிடித்து கொண்டுதான்
நடக்கிறேன்
சாப்பிடுகிறேன்
தூங்குகிறேன்
பயணிக்கிறேன்

அருகில் இல்லாத போதும்
எப்போதும் உடனிருந்து கொண்டேயிருக்கிறாயே
என் மாய பெண்ணே !

உன் கைகளை இறுக பற்றி கொண்டு  நிலா பார்க்கிறேன்
நிலாவில் நீ இருப்பது போல தோன்றும் போது
சற்றைக்கு
பதற்றம் வந்து
தணிகிறது.

நீர் பார்க்கிறேன்
அதில் உன்  முகம் தெரிகிறது
எனக்கு

என்னில் நிறைந்து நீராயிருப்பவள்
நீயல்லவோ ?

20

முதல் ஆதாம் ஏவாளும் நாம் தான்
உலகின் கடைசி ஆதாம் ஏவாளும் நாம் தான்


நீயொரு முடிவிலி
நான் உன்னுடைய  முடிவிலி

நமது காமத்திற்கும் காதலுக்கும்
முடிவில்லை

நான் உனக்குள்  
சொட்டு சொட்டாய்
இறங்கவிருக்கும்
வெண் துளி
நீ அது காக்கும்
நிலம்

நாம்தான் பிரபஞ்சமெங்கும்
நிறைந்திருக்கிறோம்
நீர் நிலம் காற்றாய்

21

ரத்தம் முழுதும் நெருப்பாக
பாரஸ்ட் பிளேம்  பூக்கள் மலர்ந்திருக்கின்றன
நீ உள்ளீடாய் அமர்ந்திருக்கிறாய்

சட்டைப் பொத்தானை நான்  மாற்றிச் சொருகியிருப்பதாகச்
சொன்ன நண்பர் அறிவாரா இதனை ?

நேற்றைய சிறு தூறல் மழையில்
நனைந்து திரிந்தவை

​சிறு மழையாய் சொரிந்தவள்
நீதானே என் பேரன்பே ...

22

எப்போதும் மலராகவே இருக்கும் தேவ மலர்
சரணடைந்தவனின் கால்களின் விலங்குகள்
உடைந்து நொறுங்குகின்றன

தேவபிரகாசம் கண்டு ஓடிச் சென்ற நதி
கடலில் கலக்கும் சமீபத்தில்

எல்லைகள் ஏதுமில்லை
சிறகுகள் விரியத் தொடங்கி விட்டன
இந்த தனிமை பூத்த இரண்டு
பறவைகளுக்கு

23

உள்ளமெல்லாம் கோடை சரக்கொன்றையாகச் செய்தாளை
உடலெங்கும் மஞ்சள் நிறம் எழும்பிப் பூத்தாளை
நெய் நெய்யாய்யுருகி
மனம் அறியப் பணித்தாளை

பூவரசம் பூவின் மேனி பொங்கும் நிறத்தாளை
அம்மன் என்றேன்
ஆருயிர் என்றேன்

சரண் புகுந்து கலந்தேன்

துளித்துளியாக நான் கரைந்து
விழுந்ததெல்லாம்
உன்னிடம் தானேயென்
அபிராமி ?

நீங்கள் என்னிடம் வேறு எதையோ எதிர்பார்க்கிறீர்கள்

நீங்கள் என்னிடம் வேறு எதையோ எதிர்பார்க்கிறீர்கள்
-கவிதைகள்


1

பாதி ஆயுள்
முடிந்தது
மூன்று கழுதை வயதும்
ஆகிறது

நீ கொல்லப்படுவதற்கான
எத்தனை தகுதியை
வளர்த்து வைத்திருக்கிறாய்
இதுகாறும் ?

நான் கொல்லப்படுவதற்கான
அனைத்து தகுதிகளையும்
கைக்கருகிலேயே
வளர்த்து வைத்திருக்கிறேன்

உனது தகுதியைச் சொல்லி
விரைந்து வந்து எனது
அறைக் கதவைத் தட்டு
தேவைப்படும் ஆயுதங்கள் அனைத்தையும்
உனக்கு நானே பரிசளிக்கிறேன்

2

படித்துறையில்
சாயங்காலம் இறங்கிக் குளிக்கும் செல்ல மகளை
இடுப்பில் எடுத்து கொஞ்சிக் கொண்டிருக்கிறது இந்த புனிதக்குளம்
அவள் மூழ்க
ஆடைகள் எழும்பி
தாமரை வட்டம்
குதூகலம்

பக்கத்து படித்துறையில்
இறங்கி கொண்டிருக்கும் பையனை
ஏனென்று கூட
கேட்க தயாராயில்லை

3

தள்ளாடி ஆட்டோவில்
வந்திறங்கும் தந்தையின் கையில்
பால் பாக்கட்
கைக்குழந்தையை ஒரு கையால் தூக்கிச் செல்வது போல
செல்கிறான்
தள்ளாடுகிறது குழந்தை

அத்தனைத் தள்ளாட்டத்திலும்
அவன் கை
குழந்தையை
கைவிடவில்லை
பால்பாக்கட் முனையை
சுருட்டிப் பிடித்திருக்கிறான்

பால்பாக்கட்டை எடுத்து
கொண்டு தருகிறேன்
என்று சொன்னவனை சீறி கொண்டே
உள்ளே
நுழைகிறது
பால் பாக்கட்

அனாதையில்லை செல்லமே நீ
குழந்தை ஏசு

4

எனக்கு நன்றாக சைக்கிள் ஓட்டத் தெரியும்
நீங்கள் என்னிடம் வேறு எதையோ எதிர்பார்க்கிறீர்கள்

டியூப் லைட் முதுகில் கட்டி
தலைகீழாகவும்
சைக்கிள் ஓட்டுவேன்

விண்ணில் கட்டியிருக்கும் அந்தரக்கயிற்றில்
இந்த துருவத்தில் இருந்து அந்த துருவத்திற்கு
சைக்கிள் ஓட்டுவது எனக்கு
தண்ணீரில் நீந்துவது போல

முன்சக்கரத்தில் நிறுத்தி பின்சக்கரத்தை
மேலுயர்த்தும் போது
மேளதாளங்கள்
முழங்கட்டும்

ஆனால் நீங்கள் வேறென்னவோ
கேட்கிறீர்கள்
கரகரக்கும் குரலில்
தகரத்தில் ஒலி கேட்கிறதா உங்களுக்கு
பதிலாக

அதனை உங்களுக்கு கேட்பதற்காகத் தான்
வைத்திருக்கிறேன்
வித்தை காண்பவனுக்கு
அக்குரல்
கேளாது


5

என்னோடு எப்போதும்
உள்ளமர்ந்து வரும் வேட்டை நாயோடு
இன்றைய மாலை நடைப்பயிற்சி
அதன் தடம் ஒவ்வொன்றிலும் காலடியெடுத்து வைத்து
இருவரும்
சென்று கொண்டிருந்தோம்

குன்றின் தொடர்ச்சி
சென்றமர்ந்த மலையடிவாரம்
தெளிந்த சுனையின் மேல்
பறந்து கொண்டிருக்கிறது
பஞ்ச வர்ணக் குருவி

நெடுநேரம்
வண்ணங்கள் நீர் ஆழத்தில் பிரதிபலிக்க
சிறுமீன்கள் மேலெழும்பிக்
கொத்துகின்றன வண்ணங்களை

குருவியின்
பறத்தலில் அசைகிறது பார் இந்தக் குளம் என்று
வேட்டைநாயிடம்
திரும்பிச் சொன்னேன்

எனதன்புதான் அதிகம் என்று பதில் சொன்ன
வேட்டை நாயின் காலடித் தடங்கள்
கரையிலிருந்து ஒவ்வொன்றாக குளத்திற்குள்
இறங்கிக் கொண்டிருந்தன
மீனுக்கிரையாக

இரவில் இச்சுனை இப்போதின்னும் கூடுதல்
வெப்பமாயிற்றே


6

ஒரு திரியை எப்படியேனும்
பற்ற வைத்து விடு
உனக்குள் எல்லா பிம்பங்களிலும்
விளக்கெரியும்

ஒரு அம்மன் துலங்கினால்
போதும்
அரசின் அத்தனைக் கொளுந்தும்
துரியம் உயரும்

துரியம் உயர
ஒரு நடராஜர்
உனக்குள் எழும்பி நடனமாடட்டும்

கண் காண
காட்சியுண்டாக
அம்பிகை என்ன
வராமலா
போய்விட முடியும் ?

நீ செய்ய வேண்டியது
இதுதான்
மலை மேலேறி
உன்னைக் காண வேண்டும்

காட்சியெல்லாம் நீயென்றானால்
பிம்பமெல்லாம் நீயென்றாவாய்
பின்னே ஏனிந்தப் புலப்பம் ?
தணிந்திரு
வேகம் குறைத்திரு

சும்மாவேயிரு
என்
சிவமே
செல்லமே

இறந்த காலத்தைப் பேசுதல் அல்லது புணர்தல்

இறந்த காலத்தைப் பேசுதல் அல்லது புணர்தல்


நம்மில் பலருடைய பிரச்சனையே சதா நாம் இறந்த காலத்தைப் பற்றியே பேசிக் கொண்டிருக்கிறோம் என்பதுதான்.அப்படியொரு காலம் நாம் கருதுகிற அளவிற்கு சச்ரூபமாகக்  கிடையாது.இறந்த காலத்தை பற்றி பேசுவதில் மிகைக்கு அளவே கிடையாது.அது ஒரு கற்பனை காலவெளி.புனைவு வெளியும் கூட. அதிலிருந்து நிகழ் காலத்திற்குள் பிரவேசிக்கும் தரிசனங்களும் ,கண்ணோட்டங்களும் இருக்குமேயானால் அதுவே படைப்பூக்கம்  நிறைந்தது.நான் காணும் மனிதர்களில் பெரும்பாலோர் கடந்த காலத்தைப் பேசுபவர்கள்.அதனாலேயே புலன்கள் ,அறிவு,உடல் அவர்களிடம் செயலற்றுப் போகிறது. மன அழுத்தம் மித மிஞ்சுகிறது."முன்பு சரியாக இருந்தது இப்போது எல்லாமே கெட்டு விட்டது" ,என்கிற வாக்கியம் இத்தைகைய பலர் உபயோகிக்கும் பொது வாக்கியம்.இப்போது தின்ற இனிப்பு தித்திக்கவில்லையா ? இல்லை அது முன்னர் இருந்தது போல இல்லை.இந்த முன்பு என்பது ஒருவித மயக்கநிலை.கடந்த காலம் பயங்கரம் என்போரும் , கடந்த காலம் சுவர்க்கம் என்போரும் அடிப்படையில் ஒரே நபர்கள்தான் . குரல்கள்தான் வேறுபடுகின்றன.மயக்கத்தைத் தாண்டி செயலில் முன்னேற இயலாத அனைவருமே இத்தகைய தரப்புகளையே எடுக்கிறார்கள்.

இன்று உங்களுக்கு என்னவெல்லாம் நடந்தது ? என்பது ஒரு எளிமையான கேள்விதானே ! பலரால் பதில் சொல்லவே இயலாத கேள்வி இது.உங்களிடமே கூட இந்த கேள்வியைக் கேட்டுப் பாருங்கள்.இன்று ஒரு சூரியோதயம் இருந்தது,இன்று பல்லிடுக்கில் ஒரு வலி இருந்தது.இன்று மதியம் நல்ல பசி .இப்படியான பதில்கள் உங்களிடம் இருக்குமேயானால் நீங்கள் இறந்த காலத்திடம் இருந்து முழுமையாகத் தப்பித்துக் கொண்டவர் என்று அர்த்தம்.சிலர் கடந்த காலத்தின் வலியை எல்லாக்காலத்திற்கும் சேர்த்திழுத்துக் கொண்டே வருவார்கள்.வலியிராது ஆனால் வலியுணர்வு இருந்து கொண்டே இருக்கும் .இது கடந்த காலத்தில் வாழ்வது.நீங்கள் அழுகிற போது கவனித்துப் பாருங்கள் .நீங்கள் இப்பொழுதில் நின்று அழுகிறீர்களா ? கடந்த காலத்தில் நின்று அழுகிறீர்களா ? என்பது விளங்கும்.பேய்ம்மையை நம்மிடமிருந்து நாமேயகற்ற வேண்டுமாயின் இப்பொழுதிற்கு நமதுடலை சமர்ப்பிக்கக் கற்க வேண்டும்.

நண்பர் ஒருவருக்குத் திருமணமாகி சில மாதங்கள் கழிந்திருந்தது.இருவருமே எல்லாமே உள்ள குடும்பம்.இருவருமே நல்லவர்கள்.ஆனால் கணக்கில் அடங்கா பிரச்சனைகள்.உளவியல் நிபுணர்களை கலந்தாலோசிக்க வேண்டிய அளவிற்கு.எங்கள் பகுதியில் மிகச் சிறந்த ஆற்றுப்படுத்துனர்களிடம் அழைத்துச் சென்றேன்.பல்வேறு விஷயங்களை பேசிப் பேசி கடைசியில் உறவில் வந்து நின்றது அனைத்து பிரச்சனைகளும்.பொதுவாக திருமண மனச்சோர்வு என்று ஒன்று உண்டு.அதற்கு ஆலோசனைகள் ஏதும் தேவைப்படாமலேயே பலர் எதிர் கொண்டு விடுவார்கள்.அப்படி இயலாதவர்களுக்கு வாழ்க்கையில் முதல் முட்டுச் சந்து தென்படும்.அவர்களுக்கு சில எளிய ஆலோசனைகள் தேவைப்படும்.பாலியல் , உறவு பற்றியெல்லாம் மித மிஞ்சிய கற்பனைகள் நம்மிடம் உண்டு.சிலருக்கு உறவு கொள்ளும் போது பனியாறு உருகியோட வேண்டும்.மலர்கள் சுற்றிலும் உதித்து விழுந்து கொண்டேயிருக்க வேண்டும்.அப்படியெல்லாம் உறவின் போது நீங்கள் வணங்குகிற தெய்வங்கள் உட்பட யாருக்குமே நடைபெறுவதில்லை என்பதை சொல்லியுணர்த்துதல்தான் ஆற்றுப்படுத்துனரின் வேலை இவ்விஷயத்தில். நான் இப்பொது இதனை ஒரு வாக்கியத்தில் சொல்லி முடித்து விட்டேன்.சில ஆற்றுப்படுத்துனர்கள் இதனை உணர்த்துவதற்கு தங்கள் இன்னுயிரையே விட வேண்டியிருக்கும்.அவ்வளவு கடினமான பணியிது.

சிலர் எதிர்பாலின் உடல் மணம் இப்படியிருக்கும் கசந்து... என்று எதிர்பார்த்திருக்க மாட்டார்கள்.உறவில் பல்வேறு நறுமணங்களை எதிர்பார்த்திருப்பார்கள்.முத்திரக் குழியின்  வாசனை இதுதான் என்பதில் அஞ்சி நடுக்கிப் போயிருப்பார்கள்.அவர்களை நிலைக்கு கொண்டு வர வேண்டும் .இவையெல்லாம் வழக்கமான பிரச்சனைகள்.

ஆனால் இவர்களின் பிரச்சனை வேறுவிதமானது.நண்பரின் மனைவி உறவே எங்களுக்குள் இல்லை என்கிறார்.நண்பரோ சராசரியாக மூன்று முறை ,சில நாட்களில் நான்கு என்கிறார்.அப்படித்தானா ?  என்றால் அந்த பெண்ணும் ஒத்துக் கொள்கிறார்.ஆம் உண்மைதான் என்று .இந்த உறவில் அவருக்கு கிளர்ச்சி இல்லையோ என்று சந்தேகத்தில் ஆற்றுப்படுத்துனர்கள்,அந்த பெண்ணிடம் கேட்டால் மூன்று தடவைகளில் இரண்டு முறை அவர் உடல் துவண்டு நேரடியாக துக்கத்திற்கு சென்று விடுவதையும் ஒத்துக் கொள்கிறார்.பிரச்சனை அவர் உடல் தற்காலத்தில் இருப்பதை ஒத்துக்கொள்ள ; அவருடைய மனம் பூரணமாக மறுத்து விடுகிறது என்பதில் அடங்கியிருந்தது.பின்னர் அவர் குணப்படுவதற்கும் மிக நீண்ட நாட்கள் தேவைப்பட்டன.

நமது கருத்தியல் தளங்களில் இருக்கும் பலருக்கும் இதேவகையான நோய்தான்.நீங்கள் எதை வேண்டுமாயினும் சொல்லுங்கள்.அவர்கள் பதிலாக வரலாற்றுப் பார்வையிலிருந்துதான் தொடங்குவார்கள்.இரண்டு தரப்புகள் என்று கருதுகிற இருவருமே  இரண்டு  விதமான வரலாற்றுப் பார்வைகளை முன்வைப்பார்கள்.இவர்களிடம் நீங்கள் பேசவே இயலாது.இவர்கள் இருவேறு தரப்புகள் என தோன்றுவதும் ஒரு வித மயக்கமே.இவர்கள் ஒரே வகையினர்தான்.வரலாற்றின் இடத்தில் அன்றாடத்தில் வைத்துப் பேசுகிறவர்கள் இங்கே மிக மிக சொற்பம்.வரலாற்றுப் பார்வைகளின் கீழ் இயங்குகிற அனைத்து விதமான அதிகார அமைப்புகளும் மிகவும் ஆபத்து நிறைந்தவை.ஏனென்றால் வரலாறு என்பது பெரும் புனைவு .அதனை யார் வேண்டுமாயினும் எப்படி வேண்டுமாயினும் வளைக்க முடியும்.அன்றாடத்திற்கு அந்த வசதி கிடையாது.

நாம் வாழ்க்கை ,அரசியல்,அதிகாரம் அனைத்தையுமே வரலாறு என்கிற தின் பண்டத்தின் கையில் ஒப்படைத்திருக்கிறோம்.அது தித்தித்து திரண்டோடுகிறது மாயநதி போல  

அரசுப்பள்ளி ஆசிரியர்களின் குழந்தைகள் அரசுப்பள்ளியில் பயிலவேண்டும்

அரசுப்பள்ளி ஆசிரியர்களின் குழந்தைகள் அரசுப்பள்ளியில் பயிலவேண்டும்


இல்லையெனில் தமிழ் நாட்டில் அரசுப்பள்ளிகளை காப்பாற்றவே இயலாது. உங்கள் மதிப்பீடுகள் ,ஆர்வம் ஒரு திக்கிலும் பணி மறு திக்கிலும் இருந்தால்  நீங்கள் பணியை பாரமாகத் தான் பார்ப்பீர்கள்.ஒரே மருத்துவரை நீங்கள் சென்று அரசு மருத்துவமனையிலும் அவருடைய தனியார் கிளினிக்கில் போய் பார்ப்பதற்கும் இடையில் பெருத்த வித்தியாசங்கள் உண்டு.ஒரே மருத்துவர்தான்.ஒரே நபர்தான்.இரண்டு இடங்களிலும் இரண்டுவிதமாக சுபாவத்தில் அவர் மாறுபடுகிறார்.நீங்கள் காலையில் அதே நபரை அரசு மருத்துவமனையில் போய் பார்த்து விட்டு மாலையிலேயே தனியார் மருத்துவமனையில் சென்று பாருங்கள் புரியும். பள்ளியாசிரியர்கள் மட்டும் என்றில்லை .அரசுப் பணிபுரிவோர் அரசு சார்ந்த துறைகளில் பள்ளி ,மருத்துவம்,போக்குவரத்து இப்படி பயன்படுத்த வேண்டும் என்கிற நிலை உருவாகவேண்டும் .இல்லையெனில் சீர்கேடுகளை நாள் தோறும் புலம்பலாமே ஒழிய எந்த முடிவையும் எட்ட முடியாது.

காலையில் தனது வாடகைப் பாடசாலையில்  ஐந்து முதல் எட்டு மணி வரையில் பாடம் நடத்துகிற ஒரு ஆசிரியர் பள்ளி வகுப்பை தூங்குவதற்கான இடமாத்தான் பயன்படுத்துவார் சந்தேகமே வேண்டாம்.இரண்டு சக்திகள் கொண்ட மனிதர்கள் என்று இங்கு யாரும் இல்லை.நான் ஒரு நபரிடம் கவிதை பற்றி ஒருமணிநேரம் பேசிவிட்டேன் எனில் அடுத்து வருகிற நபரிடம் அதே உற்சாகத்துடன் பேசுவது கடினம்.அதிக பணம் கிடைக்கும் இடமாக இருந்தால் ஒருவேளை இந்த சக்தி ஏற்படலாம்.ஒருவேளை அடுத்து வருபவர் பெண் காதலியாக இருந்தால் இந்த சக்தி மீண்டும் ஏற்படலாம்.நீ கலைக்டரோ ,மந்திரியோ யாராக வேண்டுமாயினும் இருந்து விட்டுப் போ.அரசு பள்ளியில் , அரசு மருந்தகத்தில்,அரசு பேருந்தில் உன் உபயோகம் இருக்க வேண்டும் என்றோரு ஆணை இருக்குமெனில் இவையெல்லாமே ஒரே நாளில் மீண்டும் நல்ல நிலைக்குத் திரும்பிவிடும் சந்தேகமே வேண்டாம்.அரசு சம்பளம் எனில் அரசு உபயோகம் என்றிருக்க வேண்டும்.

இரண்டு வருடங்களாக ஒரு அரசு பள்ளியில் பெற்றோர் ஆசிரியர் கழகத் தலைவராக இருந்திருக்கிறேன் .துணைத் தலைவராக இருந்த காலங்களையும் சேர்த்து கணக்கிட்டால் ஐந்து வருடங்கள் .பெண் ஆசிரியர் ஒருவர் பொதுக் கூட்டம் ஒன்றிலேயே "நாங்கள் விபச்சாரியின் குழந்தைகளுக்கும்,குடிகாரர்களின் குழந்தைகளுக்கும் பாடம் நடத்தி கடினப் படுகிறோம் தெரியுமா ?" என்று கேட்டார்.அவர் அவ்வாறு கேட்டது கூட ஆச்சரியமில்லை.பல அரசுப்பள்ளி ஆசிரியர்களுக்கும் தாங்கள் சம்பளம் வாங்குகிற சமூகத் தொண்டில் இருக்கிறோம் என்கிற எண்ணம்தான் பொதுவாகவே இருக்கிறது  .அந்த கூட்டத்தில் பங்கேற்ற பிற உயர் அதிகாரிகளுக்கும் கூட அந்த அம்மணி பேசியதன் அபத்தத்தை உணர இயலவில்லை.அந்த அம்மணியை   தனியாக அழைத்து இதையே பள்ளி வழக்கத்திற்கும் வெளியே வைத்து நீங்கள் சொல்லியிருப்பீர்களேயாயின் செருப்பால் அடி வாங்கியிருப்பீர்கள் என்று தாங்கொணா வருத்தத்துடன் சொல்லிவிட்டுத் திரும்பினேன்.

பல ஆசிரியர்கள் முழுமையான மடையர்கள்.பணிக்கு வந்ததிற்கு பிறகு அவர்கள் தகுதியை வளர்த்துக் கொள்வதே இல்லை.அதற்கான அவசியம் அவர்களுக்கு ஏற்படுவதில்லை.நான் என்னுடைய தகுதியைத் தொடர்ந்து வளர்த்துக் கொள்ள வில்லையானால் எனக்கு இழப்பு ஏற்படும் என்று கருதினால் மட்டும்தானே எனக்கு எனது தகுதியை தக்க வைத்துக் கொள்ளும் அவசியம்   உண்டாகும் ? அரசுப் பள்ளியாசிரியர்கள் தங்களின் தகுதிக் குறைபாட்டால் தங்களுக்கு சிறிய இடையூறைக்  கூட சந்திப்பதில்லை வாழ்க்கையில்.

ஒன்பதாம் வகுப்பில் பயிலும் மாணவி ஒருவரிடம் தவறாக நடக்க முயன்ற ஆசிரியரை இடம் மாற்றம் செய்யக் கோரி ஒருவருட காலம் அலைந்தோம்.முதன்மை கல்வி அதிகாரிகளுக்கு கொடுக்கும் மனுக்கள் அவர் பார்வைக்கே செல்லாது.காவல் நிலையங்களில் பழைய காவலர்கள் நிலையத்தை தங்கள் கட்டுப்பாட்டில் வைத்திருப்பது போலத்தான் ,சங்க பிரதிநிதிகள் கல்வித் துறைகளில் நிரம்பி வழிகிறார்கள்.கடைசி வரையில் அந்த ஆசிரியரை எங்களால் இடமாற்றம் செய்ய இயலவில்லை.அவர் சங்கத்தின் ஆள்.அவர் மீது நடவடிக்கை எடுக்கப்பட்டால் அந்த அதிகாரி போகும் இடம் எங்கும் சங்கத்தின் ஆள் மீது நடவடிக்கை எடுத்த அதிகாரி அவர் என்கிற கறை  இருந்து கொண்டே இருக்கும் என்பதுதான் நடவடிக்கை எடுக்கப்படாமைக்கான காரணம்.ஒவ்வொன்றிலும் வெளியிலிருந்து பார்க்கும் போது அதன் வெண்மையும் உள்ளே சென்று பார்த்தால் சாக்கடையும் புலப்படும்.பதவியிலிருந்து என்னை விலக்கிக் கொண்டேன்.

சமீபத்தில் எங்கள் பகுதியைச் சேர்ந்த ஒரு அரசு பள்ளியை கடந்து செல்லும் போது கண்ணீர்  திரண்டது.அந்த பள்ளியொரு கனவு லோகமாக ஒரு காலத்தில் எனக்கிருந்த பள்ளி.என்.எஸ்.எஸ் முகாம்களில் அந்த பள்ளியில் தங்கி இருந்திருக்கிறேன்.உருத்தெரியாமல் இடிந்து சரிந்து கிடக்கிறது இப்போது.சிறிய வனம் வளாகம் முழுதும் படர்ந்து ,பக்கத்தில் உள்ள கல்லறைத் தோட்டத்தைப் போன்ற கதி நிலை.சென்று சிறிது நேரம் அமர்ந்திருந்தேன்.இத்தனைக்கும் அந்த பள்ளியிருக்கும் ஊரை எங்கள் பகுதியில் குட்டி ஜப்பான் என்றழைப்பார்கள்.அந்த இடிவு ஒரு வெளியுருவம் இல்லை.இன்று நமது அகம் இன்று இருக்கும் தோற்றம்.

டம்ளர் உரிமைகள் என்பது அரசியல் கபட நாடகம்

டம்ளர் உரிமைகள் என்பது அரசியல்  கபட நாடகம்

தமிழர்களை பன்னெடுங்காலமாக ஏமாற்ற பயன்படும் கபடநாடகம்.ஒரு அடையாளம் அரசியல் அதிகாரத்தைத் திரட்டுவதற்காக மட்டும் எப்போது   முன்வைக்கப்படுகிறதோ அப்போதிலிருந்து அது தனது கபட நாடகத்தின் முதற்காட்சியை தொடங்குகிறது.பூர்வீக அடையாளங்கள் அரசியல் ரீதியாக முன்வைக்கப்பட வேண்டியவை அல்ல.இன மேலாண்மைக் குரல்கள் எந்த அரசியல் பின்னணியிலிருந்து கிளம்பும் போதும் அவை இன மையவாதத்தை நோக்கி கீழிறங்கும் தன்மை கொண்டவை.தமிழன் கொண்டுள்ள தாழ்வுணர்ச்சியை அதிகப்படுத்தவே இது உதவும்.நிதர்சனமான பிரச்சனைகளில் இருந்து பின்னகர்த்திக் கொள்ள மட்டுமே இவை உதவும்.

தீவிர தமிழ் பற்றாளர்கள் என்று தங்களை முன்னிறுத்தும் பலரை சிறு வயது முதற்கொண்டு பார்த்து வருகிறேன்.அவர்களில் பலர் தமிழ் மொழி,பண்பாடு சம்பந்தமாக குறைந்தபட்ச  அறிவைக் கூட கொண்டிருந்ததில்லை.இப்படி தீவிர தமிழ் பற்றை ஜோடிப்பவர்களில் பலர் தமிழர்கள் அல்லாதவர்களாக இருப்பதையும் கவனித்திருக்கிறேன்.ஓங்கி இருந்த இனம் என்று தொடங்கி தன் சொந்த சொந்த சாதிக்குள் வந்து சரணடைவார்கள் பலர்.தங்கள் சொந்த சாதியினர் மட்டுமே தமிழர்கள் என்று அவர்கள் பேசத் தொடங்குவதற்கு முன்னர் இடத்தை காலி செய்துவிட்டு ஓடி விடுவதே நல்லது.

தீவிர தமிழ் தேசியர் ஒருவர் நான்கு பக்கங்களுக்கு தமிழ் பற்றை எனக்கு பாடம் சொன்ன பிறகு உங்கள் இயக்கத்தில் தமிழோடு தொடர்பு கொண்ட எத்தனைபேர் இருக்கிறீர்கள் என்று கேட்டேன்.தனது மகள் ராஜ் தொலைக்காட்சியில் பணிபுரிவதாகவும் "தமிலென்றால்" உயிரை விட்டுவிடுவாள் என்றும் சொன்னார்.எழுத்துப் பிழையுடன்தான் அதனை அவர் உச்சரித்தார்.மிகையாகச் சொல்லவில்லை. அவர் எனக்கு பாடம் நடத்திக் கொண்டிருந்த இடம் ஒரு பொது இடம் .என்னால் எங்குமே தப்பித்து ஓடமுடியாதிருந்த இக்கட்டான ஒரு இடம்.தமிழ் தேசியர்கள் பொதுவாகவே ஒரு தொல்குடி குரங்கின மனோபாவம் கொண்டவர்கள்.கண்டாலே தப்பித்து ஓடிவிட வேண்டும்.சிலர் உளறுவது கூட அழகாக இருப்பதுண்டு.இந்த தமிழ் தேசியக் குரங்குகள் அப்படியானவை அல்ல.தன் புண்ணை தானே சுரண்டித் தின்று சாகும் வரம் படைத்தவை.இப்போது புதிதாக கம்யூனிஸ்டுகள் பேசும் தமிழ் தேசியம் இருக்கிறதே, இது கபட நாடகம் மட்டுமல்ல.தமாஷ் நாடகத்தின் லெட்டர் சீன.கம்யூனிடுகளுக்கும் தமிழுக்கும் என்ன சம்பந்தம் "தோலர்களே" !.கூடங்குளம் விஷயத்தில் பெரும்பாலும் தமிழ் தேசியர்கள் முன்வந்து மனமுவந்து  கெடுத்தார்கள்.வந்து குவிந்த மலையாள மக்களை மேடையில்  தமிழ் தேசியம் பேசி விரட்டினார்கள்.

நாங்கள் ஒருமுறை ஆர்வக் கோளாறில் குற்றாலத்தில் மேலேறி மேலேறி மேலேறிச் சென்று விட்டோம்.ஏராளமான தமிழ் குரங்குகள் .எங்களில் சிலர் உணவு வைத்தால் அவை அகலாது, பின்னர் தாக்கத் தொடங்கி விடும் என்பதறியாமல் மிருக நலம் பேணி உணவுகளை தாரை வார்க்க ஐநூறுக்கும் மேற்பட்டைவை எங்களை சூழ்ந்து விட்டன. நாங்களும் தமிழ்தான் என்று நாங்கள் மன்றாடியதை அவை நம்பத் தயாராக இல்லை.போர் தொடுக்கத் தயாராகி  விட்டன.பின்னர் அங்கிருந்த உள்ளூர்வாசிகள்தான் எங்களைக் காப்பாற்றினார்கள்.

நீங்கள் மரபிலும் ,சொந்த மொழியிலும் ,பூர்வீகத்திலும் அக்கறையும் பற்றும் கொண்டவர்கள் எனில் ஒருபோதும் உள் நோக்கி சரியமாட்டீர்கள்.பிறரில் கலப்பீர்கள்.விரிவு படுவீர்கள்.தமிழ் நாட்டின் தமிழ் பற்று சாக்கடையில் கலந்த தேன்.அதிகார சாதி வெறி.தாழ்வுணர்ச்சியின் பெருங்கூச்சல்

உரிமைகளை பேசுவது தற்கொலை செய்து கொள்வதற்காக அல்ல. பற்று என்பது இணங்குவது,அறிவது,விரிவு படுத்துவது.விரிந்தகன்று செல்லுவது.தன் புண்ணை தான் சொரிந்து தான் இறப்பது அல்ல.

நிலமும் விண்ணும் கொள்ளும் முயக்கம் போலே

நிலமும் விண்ணும் கொள்ளும் முயக்கம் போலே

பல கைகள் கிளர்ந்து எழுகிற அம்மன் பெரும் கிளர்ச்சியை ஏற்படுத்துகிறவளாக இருக்கிறாள் .நிலமும் விண்ணும் கொள்ளும் முயக்கம்
போலே .அது சில நிமிடங்கள் மனதை விடுவதில்லை.கட்டியாகப் பிடித்துக் கொள்கிறது.சிதம்பரம் நடராஜர் போலே கிளந்தெழும் இத்தைகைய  அம்மன் வேறு ஒரு வகை .பிரபஞ்ச காஸ்மிக் நிலை உருவகங்கள்.  கவிதையில் அடைகிற கிளர்ச்சி போன்றதொரு கிளர்ச்சியை இத்தகைய அம்மன் உருவங்களும் ஏற்படுத்துகின்றன.

பல்வேறுவிதமான நிலைகளில் உள்ள அம்மன் உருவங்கள் எல்லாமே சிலாகிப்பிற்குரியவைதான்.ஆண்டாள் ஒரு காலை உயர்த்திய வண்ணம் திருவீதி வரும் போது,தாயே எனக்கு மொழியைத் தா ,அருளைத் தா..  என கேட்பது துறந்து,கை  மறந்து  பலசமயங்களில் சரணடையவே மனம் விருப்பு கொள்கிறது.மதுரை மீனாட்சியின் கால்களில் விழாமல் ஏதேனும்
பலனுண்டா ? மாஸான அம்மன் படுத்திருக்கும் வினோதம் என்ன சொல்கிறாள் இவள்  ! என்னும் திகைப்பு கொள்ளச் செய்வது .

கழிந்த முறை மதுரை செல்லும் போது கூடல் அழகர் பெருமாள் கோவிலுக்குச் சென்றோம்.விக்ரமாதித்யன் நம்பி,அதீதன் ,ரோஸ் ஆன்றா,ரிஷி நந்தன் ஆகியோர் உடனிருந்தார்கள்.அந்த கோவிலுக்குப் போகவேண்டும் பாடல் பெற்ற ஸ்தலம் என்பதை நம்பி தான் சொன்னார்.மதுரவல்லி தாயார் அமர்ந்திருக்கும் விதம் கண்டு அப்படியே நின்றுவிட்டேன்.அவ்வளவு கம்பீரமான இருப்பு.பிரமிப்பூட்டுகிற இருப்பு.நிலமாதேவியே அச்சொரூபம்.திரும்பி வர மனமில்லை.சொரூபத்தில் இப்படி இணைகிற அம்மன்கள் நிறைய தமிழகத்தில் உள்ளனர் .கால்கள் அகட்டி அமரும் இத்தகைய சொரூபங்கள் அகத்தை ஆழப் பற்றிக் கொள்ளக் கூடியவை.கலையில் மிகப் பெரிய தாக்கங்களை ஏற்படுத்தும் குழந்தைகளின் தாய்மார்கள் பேரழகிகளாக இருந்திருக்கிறார்கள் என்னும்படியாக விக்ரமாதித்யன் பேட்டி ஒன்றில் குறிப்பிட்டிருப்பார்.அது சரிதான் என்று மரகதவல்லி தாயாரின் இருப்பு நிலை காண்போர் அறிந்து கொள்ள முடியும்.லௌகீகத்திற்கு அப்பாற்பட்ட பேரழகின் இருப்பு பூண்டிருக்கும் பேரழகு அவர் குறிப்பிடுவது.ஏன் இவ்வளவு வினோத அழகில் இருக்கிறார்கள் என்பது போல .ஓவியர் சந்ரு மாஸ்டரின் தாயாரின் புகைப்படத்தை   அண்மையில் பார்த்தேன் .அவருடைய சக்தி எங்கிருந்து அனல் மூண்டு வருகிறது என்பதைக் காண்பது போல அது இருந்தது.

அம்மன்களைப் பற்றி , காணும் ஒவ்வொரு அம்மனாக கவிதை எழுதவேண்டும் அண்ணாச்சி என்று விக்ரமாதித்யனிடம் சொன்னேன்.அவர் எழுதியிருக்கிறார் .உனக்கு முடியுமே என்றார்.முடியுமா தெரியவில்லை.சிலது எழுதி பார்த்து தோல்விதான் அடைந்திருக்கிறேன்.ஒரு விக்ரகம் உணர்த்திவிடுவதை காட்டிலும் கவிதையில் ஏதேனும் மடிப்பு அதிகம் வேண்டும்.இல்லையெனில் கவிதை விக்ரகத்தில் தாழ்வுற்றுப் போகும் ;அம்மன்களை எழுதுவது , அது கடினமான பணியென்று அவரிடம் சொன்னேன்.அப்படியொருவன் அம்மன்களின் நிலையறிந்து அதன் உள்மடிப்பு குலையாமல் எழுதிவிடுவான்   எனில் அவனே தமிழில் இனி வணங்கத்தக்க கவியாக நெடுங்காலம் இருப்பான்.

நமது கவிகளுக்குப் பொதுவாக பொது விருப்பங்களுக்கு அப்பாற்பட்டு பார்வைகளோ,கண்ணோட்டங்களோ ,அவதானிப்புகளோ ,சிந்தனைகளோ இல்லை.உரைநடைகளில் பொது விருப்பங்களையே முன்வைக்கிறார்கள்.கவியின் உரைநடை என்பது முற்றிலும் வேறுவிதமானதாக இருந்தே ஆகவேண்டும்.அந்த வகையில் பார்த்தால் நவீன கவிகளில் ஷங்கர்ராமசுப்ரமணியனின் "கலை பொதுவிலிருந்தும் தனித்திருக்கும் "கட்டுரை நூல் மிகவும் நூதனமானதொரு நூல்.முருகன் என்னும் கட்டுரை மிக நல்ல கட்டுரை.ஒரு பெண்ணின் ஹை ஹீல்ஸ் பற்றிய கட்டுரை ஒன்று அதில்  உள்ளது.கவியால் மட்டுமே எழும்ப முடியும் சித்திரம் அது. தனித்த அவதானிப்புகளை கொண்ட உரைநடை அவருடையது.பிறரில் பலர் பொலிட்டிகள் மட்டைகள்.பலசரக்கு கடை தீப்பொறிகள். ஆனால் அந்த நூல் தமிழ்நாட்டில் எதனாலோ தெரியவில்லை , தமிழ் நாட்டு கவிஞர்களால் கூட அடையாளம் காணப்படவில்லை.பலசரக்குப் பொருட்களுக்கு அப்பாற்பட்ட தேவைகள் மிகவும் குறைவுதான் போல இங்கே .அந்த நூலை பிறர் ஸ்லாகித்து எழுதி  ஒரு கட்டுரை கூட இதுவரையில் படிக்கவில்லை.அந்த நூல் வெளிவந்து குறைந்தது நான்கு வருடங்கள் இருக்கும். பழைய இலக்கியங்களை பார்க்கும் போது நிச்சயம் நிலைமை இவ்வளவு மோசமில்லை என்று தான் தோன்றுகிறது. 

அப்பா

அப்பா

என்னை வேகவேகமாக எதிலேனும் கரையேற்றி விடவேண்டும் என நினைத்தார்.பின்னாட்களில் வருகிற நாட்கள் அவ்வளவு இசைவானவையாக இருக்காது என்று அவருக்குத் தோன்றியிருக்க வேண்டும் .எதிலேனும் ஒன்றில் பற்றிக்கொள்ள மாட்டானா என்பதில் அவருடைய அத்தனை முயற்சிகளும் இருந்தன.அம்மா இறந்ததை உணர்ந்த அன்றிலிருந்தே கடுமையான பாதுகாப்பின்மை என்னை உள்ளத்தில் தொற்றிக் கொண்டது.பாதுகாப்பின்மையை தூண்டும் செயல்களில் இருந்து என்னை விலக்கிக் கொள்ள கடுமையாக முயன்றேன்.அவருடைய அக்கறைகளும் எனது பாதுகாப்பின்மையை தூண்டுவதாக அமைந்தது துரதிர்ஷ்டவசமானது.அம்மாவை இழப்பது என்பது எந்த ஒரு குழந்தைக்கும் தனது சொந்த இயல்பிலிருந்து துண்டிக்கப்படுதலுக்கு ஒப்பான காரியம்

அம்மா அகன்று சென்ற அந்த தினத்தில் நாங்கள் குழந்தைகள் ; அம்மாவின் ஊரில் விளையாடிக் கொண்டிருந்தோம்.அவள் அகன்று விட்டாள் என்னும் செய்தி என்னை வந்தடைந்தது வினோத ஸ்பரிசம் மூலமாகத் தான்.அன்று என்னைத் தொட்டவர்கள் ,தூக்கி வந்திருந்தவர்கள் ,கொஞ்சியவர்கள் ,ஆறுதல் சொன்னவர்கள் எல்லோருமே மிகவும் மோசமானதொரு செய்தியை ஸ்பரிசம் மூலம் அருவெறுப்படையும் விதத்தில் உணர்த்திக் கொண்டிருந்தார்கள்.அந்த ஸ்பரிசங்களில் ஈர்ப்பு குறைந்திருந்தது ,காந்தம்  அகன்றிருந்தது .செயற்கையாக இருந்தது அனைத்துமே.பற்றை செயற்கையாக ஒருபோதும் உருவாக்க முடியாது என்று இன்றுவரையில் எனக்குள் உறைந்து போயிருக்கும் எண்ணத்திற்கு அன்றைய செயற்கையான அத்தனை தொடுதல்களும் காரணம்.செயற்கையான பற்றை என்னிடம் பிரயோகம் செய்ய முயலும் போது உடனடியாக நான் ஒதுங்கிச் செல்ல எத்தனிப்பதற்கும் ,விலகுவதற்கும் ; அது பின்னால் ஒரு மோசமான செய்தியை அழைத்து வருகிறது என்பது மட்டுமே காரணமல்ல.அம்மாவின் மரணத்தை நினைவுபடுத்துவதாக அது எனக்குள் அமைந்து விடுகிறது என்பதும் காரணம்.எனது பாதுகாப்பின்மை இன்றுவரையில் வந்து நுழைகிற இடம் இதுதான்.பாதுகாப்பின்மை எந்த இடத்தில் எனக்குள் நுழைந்ததோ அந்த இடத்தில் அப்பா என்னை அவசரமூட்டிக் கொண்டிருந்தார்.

தொடுகையாக  அம்மாவின் மரணம் வந்து சேர்ந்ததும் நாங்கள் விளையாடி கொண்டிருந்த மைதானத்தில் மஞ்சள் காட்டமாக விரிந்தது.அதனை மைதானம் என்பது சரியில்லை.கொல்லமாங்காடுகளுக்குள் வீடுகள் . மாமரங்களின் பால் வீச்சம் .மண் மேடுகள் பூசிய சுற்று வேலிகள்.இதற்குள் மரங்களுக்கும் குழந்தைகளுக்கும் இடையில் நிறைய விளையாட்டுகள் இருந்தன.கனிகளைத் தரும் மரங்கள்.அவற்றை தின்ன வேண்டியதும் பின்னர் அவற்றில் ஏறி விளையாட வேண்டியதும்தான் விளையாட்டு.அந்த மரங்களுக்கிடையில் மகா சிறுவர் உலகம் இருந்தது.ஒவ்வொரு மரத்திற்கும் ஒவ்வொரு வாசனை உண்டு.பழங்களின் ருசியும் தனித்தனி தான்.ஒன்று போல் மற்றொன்று கிடையாது.கொல்லாம்பழங்கள் மட்டும் இருபது தினுசு இருக்கும்.கொட்டிகள் தொடங்கி பனம்பழம் அளவு வரையில் .அம்மா இருப்பது வரையில் அந்த ஊரில் விஷேசமான வாசனையிருந்தது.மஞ்சள் தரித்து அந்த மைதானம் நின்ற பொழுதிலிருந்து அந்த வாசனை அகன்றது.

அப்பாவும் ஆசிரியர் .அம்மாவும் ஆசிரியர்.இருவருமே தமிழாசிரியர்கள் . சாத்தூரில் நள்ளிரவுகளில் எனக்கு பனி வலிப்பு உண்டாகும்.அம்மா  எனது முகநாடி விழுந்தடிக்கும் வண்ணமாக என்னை தோளில் போட்டுக் கொண்டு நடந்து கொண்டிருப்பார்.எப்படி அவள் விரைவாக நடந்தாலும் அப்பா முந்திச் சென்று ஏதேனும் தெருவில் மறைந்து விடுவார்.அவள் நின்று சுழன்று தேடுவாள்.பின்னர் வழக்கமான பதற்றத்துடன் மருத்துவர் வீட்டைச் சென்றடைவோம்.அப்பா முந்திச் சென்று விடுவதும் அம்மா பின்தங்கி தேடுவதும் ,இடைப்பட்ட உணர்வாகவே அப்பா எப்போதும் மனதில் பதிவாகியிருக்கிறார்.அம்மா அகன்ற பிற்பாடு அப்பாவிற்கு என்னிடத்தில் இந்த அவசரம் இருந்தது.அப்போதும் அவர்தான் முந்திச் சென்று கொண்டிருந்தார்.என்.சி.சி.; ஸ்கவுட் ,என்.எஸ்.எஸ் என எப்போதுமே பள்ளிக்காலங்களில் விரைவாகவே இருந்தேன்.ஏதேனும் ஒரு வழியிலேனும் தொற்றிக் கொள்ள வேண்டும் என அவருக்கிருந்த வேகமே அவற்றிற்கு காரணம்.

ஒரு அப்பாவாக அவருக்கிருந்த பதற்றங்கள் நியாயமானவை ,என்பதை காலம் இப்போதும் மீண்டு வந்து நிரூபிக்கிறது.எனது குழந்தைகளின் விஷயத்தில் நானும் அவரைப் போன்ற அப்பாவாகவே இருக்கிறேன் .சில சமயங்களின் நண்பனாகவும்.அப்பாவாக அப்பா இருப்பது குழந்தைகளுக்கு சிறு வயதில் தண்டனை . வளர்ந்த பின்னர் அதுவொரு பரிசு , விளங்க ஒண்ணா பற்று 

தவம் பயிலுங்கள்

                                                             தவம் பயிலுங்கள்

தவம் என்பதற்கு ஏராளமான அர்த்தங்கள் உள்ளன.நான் அவற்றையெல்லாம் சுட்டவில்லை.எளிமையாக அமர்ந்து ஒரு அரை மணிநேரமேனும்  மனதை ஒருமையில் நிறுத்துவதைச் சொல்கிறேன்.அதற்கு பாடமும் பயிற்சியும் நிச்சயம் அவசியம் .அது முறையான  பாடமாக இருத்தல் வேண்டும்.தனிநபர்களிடம் கற்றுக் கொள்ளுதல் சிறப்பாகாது.இயற்கையின் இயங்கு நிறுவனத்தை நம்மில் கற்றுக் கொள்ளும் முறையியல் அது.தகுந்த பள்ளியில் அதனை கற்பதே நல்லது

நானெல்லாம் நிறைய காலவிரயத்தை ஏற்படுத்திய பின்னர்தான் கற்க தொடங்கினேன் .அதனாலேயே இதிலும் நானொரு பின்தங்கிய மாணவன்.தொடர்ந்து பத்தாண்டு காலத்திற்கும் மேலாக தொடர்ந்தும், விட்டு விட்டும் பயில்கிறேன்.யோகமும் தவமும் எனக்கு உடல் பற்றிய தெளிவை ஏற்படுத்தியவை.வள்ளலார் உடலில் தெளிவு ஏற்படுதலே முதல் இன்பம் என்கிறார்.உடல் நம்முடையதல்ல அது இயற்கையின் ஸ்தாபனம் .புலன்கள் கொண்டு நடக்கும் ஆசைகள் மட்டுமே நம்முடையவை.உடல் என்பது  உலகைக் காணச் செய்யும்,உணர வைக்கும்  அகக்கருவி.புறத்தில் தூண்டப்ப பட்டு நிற்கும் அகக்கருவி அது.மேலை நாடுகளில் ஜப்பான் ,சீனா போன்ற நாடுகளில் தவம் சிறுவயதிலேயே தொடங்கப்படும் பழக்கம்.ஜப்பான் மொழி திரைப்படங்கள் பார்த்தவர்களுக்கு நினைவிருக்கலாம்.அவர்கள் வஜ்ராசனத்தில் அமர்ந்து உணவு உண்பார்கள்.வஜ்ராசனம் என்பது வேறொன்றும் இல்லை.குழந்தைகள் ஓடி வந்து அமரும் ஒரு நிலை.இஸ்லாமியர்களின் தொழுகை நிலை ஏகதேசம் வஜ்ராசனம்தான்.அவர்கள் அமர்ந்து தலை தாழ்த்தி முன் நெற்றி தரையில் படும் வண்ணம் செய்யும் தொழுகை யோகத்தில் மிக முக்கியமானதொரு உடல் பயிற்சி.

யோகத்திலும் ,தவத்திலும் சான்றிதழ் பெறுவதுதான் நோக்கமெனில் பிரம்மஞானத்திற்கு தகுதி உடையவன் நான்.ஆனால் எனக்குத்தானே தெரியும் ? ஒரு ஞானத்திற்கும் தகுதியற்றவன் நான் என்பது.அதனால்தான் திரும்பத்திரும்ப முதலில் இருந்தே தொடங்கி படித்துக் கொண்டிருப்பேன்.வகுப்பில் ஆசிரியர்கள் நம்மை கண்டுபிடிக்காதவர்களாக இருப்பின் மகிழ்ச்சியாக இருக்கும்.சிலர் நான்கு நிலைகள் கடந்த பின்னரும் ஏன் முதலில் இருந்தே தொடங்குகிறீர்கள் என்று கேட்பார்கள்.ஒரு நிலையையும் கடக்க முடியாதவன் என்பதை உள்ளமே நன்கறியும்.பயிற்சிக்காகத் தான் ஆரம்பம் முதலே நான் சென்று கொண்டேயிருப்பது.சிறு வயது முதலே தவமும் யோகமும் கற்றுத் தேறும் குழந்தைகள் பாக்கியம் செய்தவை.

தெய்வ நம்பிக்கையும்,தவமும் ,பயிற்சியும் சான்றோனின் சாதாரணமான இயல்பான காரியங்கள் என்று ஸ்ரீமத் பகவத்கீதை சொல்கிறது.தமிழ் மரபுகளில் தவம் திரும்பத் திரும்ப வலியுறுத்தப்படுகிறது.  தெய்வ நம்பிக்கை பேணிப் பாதுகாக்கப் பட்டிருக்கிறது.எப்படி எதற்காக இடையில் இவற்றையெல்லாம் கைவிட்டோம் என்பது விளங்கவில்லை.

தவமும் யோகமும் பயில்வதற்கு எதிராக சில தடைகள் உண்டு.ஏற்கனவே நமது மனதில் ஏற்றி வைக்கப்பட்டிருக்கும் தடைகள் முதலாவது வகையைச் சார்ந்தவை.பத்தாண்டுகளுக்கும் முன்னர் முதலாவதாக நான் வகுப்பில் இணையும் போது பேசிக் கொண்டே இருந்தேன்.ஆசிரியர்களை வகுப்பு   நடத்தவே அனுமதிக்க வில்லை.அவ்வளவு இடையூறுகளும் தடைகளும் மனதில் இருந்தன.அகந்தையால் வகுப்பை மோதிக் கொண்டே இருந்தேன்.ஆசிரியர்கள் மிகவும் சிரமப்பட்டார்கள்.இப்போது யோசித்துப் பார்க்க வேடிக்கையாக இருக்கிறது.அப்போது எவ்வளவு சிறுமைப்பட்டிருந்தேன் என்பதும் விளங்குகிறது.இப்போது மேன்மை பட்டுவிட்டேன் என்பது இதற்கு அர்த்தமில்லை.ஒவ்வொரு காலத்தையும் நாம் கடந்து செல்லும் போதும்  முன்னர் சிறைப்பட்டிருந்த விஷயங்களும், சிறுமைப்பட்டிருந்த காரியங்களும் விளங்கிக் கொண்டே போகும்.இப்போதைய சிறுமைகள் நாளை விளங்கும்.

இரண்டாவது வகையான தடை ,மயக்கம்   காரணமாக தவத்தையும் ,யோகத்தையும் கற்பவர்களுடையது.அவர்களுக்கு சாராம்சம் ஒருபோதும் விளங்காது.தவத்தையும் யோகத்தையும் மேட்டிமை என தவறாக புரிந்து ஈடுபடுபவர்கள் முற்றிலும் ஏமாந்து போவார்கள்.கற்றலில் ஒருபலனும் அவர்கள் எய்த முடிவதில்லை.ஏனெனின் அவர்கள் கொண்டிருக்கும் மயக்கம் கற்றலுக்கு எதிர்திசை வேகம்.நன்னெறி என அவர்கள் கற்பிதம் கொண்டிருப்பார்கள்.நம்மை நாம் எப்படியிருக்கிறோம் என்பதை அறிவதற்கும் , தேர்வு செய்வதற்கும் கிடைக்கும் ஒரு வாய்ப்பை தவம் ஏற்படுத்தும் அன்றி அது எந்த மந்தரவாதத்தின் மூலமாகவும் எதனையும் சரிபடுத்தாது.ஏராளமான எண்ணங்களில் கட்டுண்டு கிடக்கும் நம்மை ; மொத்தமே உன்னுடையவை ஐந்து அல்லது ஆறு எண்ணங்கள் தான் என்பதை துலக்கும்.அதில் ஏறிப் பிடித்துக் கொள் கட்டியாக என்பதை உணர்த்தும்.கொண்டு செலுத்தும்.இந்த எண்ணங்களில் எதுவாக இருந்தாலும் அதுதான் உங்களுடையவை.காமம்,காதல்,ஆசைகள் இப்படி அவை எதுவாக இருப்பினும். தவத்தில் மிஞ்சுகிற இந்த எண்ணங்களில் இது தவறு அது சரி என்றெல்லாம் கிடையாது.மிஞ்சுகிற எண்ணங்கள்தான் உனது சாட்சியம்.நீ

மிக முக்கியமாக யோகமும் தவமும் சிறுவயதிலேயே தொந்தரவுக்கு உள்ளாக்கப்படுகிற குழந்தைகளுக்கே மிகவும் அவசியம் என்னை போன்று .ஆனால் அவர்களிடத்தேயிருந்துதான் இவற்றைத் தட்டிப் பறித்து தள்ளிக் கொண்டு போய் வைத்திருக்கிறோம் .நமது ஞானிகள் எல்லோருமே சிறுவயதிலேயே தொந்தரவுக்கு உள்ளாக்கப்பட்ட குழந்தைகள்தான் என்பது எத்தனை  பேருக்குத் தெரியும் ? அல்லது சொல்லித் தந்தார்கள் ?

தமிழ்நாட்டை பொறுத்தவரையில் சரியான பள்ளி என வேதாத்ரி மகரிஷியின் அறிவுத் திருக்கோவிலையே பரிந்துரை செய்வேன்.பிற பள்ளிகளின் பாடங்களையும் படித்திருக்கிறேன்.முயற்சித்திருக்கிறேன்.எனது அனுபவத்தில் சிறந்தது வாழ்க வளமுடன் அறிவுத் திருக்கோயில் மட்டுமே

பின்பற்றி பாருங்கள் 

சிறைச்சாலைகள் வதைக்கூடங்களாக இருக்க வேண்டும் என்பவரா நீங்கள் ?

சிறைச்சாலைகள் வதைக்கூடங்களாக இருக்க வேண்டும் என்பவரா நீங்கள் ? சசிகலா இருக்கும் கர்நாடகா சிறையில் வழக்கமாக நோயுற்ற ,வயதான கைதிகளுக்கு வ...